Jeremaia 4:19 - Chuukese Bible

¹⁹ Üa fokun riaföü, üa fokun riaföü. Üa wilikilikiei fän ai cheuch. Riaföün letipei! Lelukei a fokun mwökütüküt. Üsap tongeni fanafanala. Üa rongorong tikin ewe rappwa mi tik fän iten maun.

Jeremaia 4:19 Iomraidhean Croise

Keneses 49:6

Üsap eti ämi mwichen pwüngüpwüng, üsap pwal choni ämi mwich. Pun lon ämi song oua niela mwän, oua pwal pwapwaiti le sorongauei ätemwänin kow.

2. King 4:19

Ekis chök mürin, ewe ät a kechü ngeni saman we o üreni, “A metek mökürei, a metek mökürei.” Nge saman we a üreni nöün chon angang, “Kopwe ekiela ewe ät ren inan we.”

2. King 8:11

Iwe, Elisa a siwil wowon o newenewen ngeni Hasael tori Hasael a säw. Mürin Elisa a kechü.

Kölfel 103:1

Ngüni, kopwe mwareiti ewe Samol mi Lapalap, leuti meinisin, kopwe mwareiti itan mi pin.

Kölfel 116:7

Ngüni, kopwe apilükülüköch, pun ewe Samol mi Lapalap a kirikiröch ngeniei.

Kölfel 119:136

Chönün mesei ra pupu usun chanpupu, pun aramas resap aleasochisi om kewe allük.

Kölfel 119:53

Lingeringer watte a toriei, lupwen üa küna ekewe aramasangau mi purätiu om kewe allük.

Kölfel 146:1

Ousipwe mwareiti ewe Samol mi Lapalap. Ngüni, kopwe mwareiti ewe Samol mi Lapalap.

Kölfel 16:2

Üa kapas ngeni ewe Samol mi Lapalap, “En chök ai Samol. Esap wor ai feiöch lükün en.”

Aisea 15:5

Üa kechüeiti Moap. Chon ra sülong Soar me Eklat Selisia. Ra feitä nge kechü won ewe al mi pal a ale ngeni Lukit, nge won ewe al mi ale ngeni Horonaim ra leüömong le kökkö usun ewe feiengau.

Aisea 16:11

Üa ngüngü ren ai lolilen fän iten Moap, üa fokun letipeta fän iten Kir Heres.

Aisea 21:3

Ren ei inisi a fokun metek, och cheuch a cheriei usun cheuchen fam a cheri eman fefin. Üa fokun niuokus ren mine üa rongorong, üa rükö ren mine üa küna.

Aisea 21:4

A püngüpüng fän mwäri, inisi a chechech ren watten ai niuokus. Üa ösüküsükü lekuniol, nge lupwen üa tori, üa chök niuokus.

Aisea 22:4

Iei mine üa apasa, “Ousap nenengeniei, nge oupwe chök mwüt ngeniei pwe üpwe kekechü. Ousap pwal sotuni le achipaei, pun üa kechüeiti nei aramas kana mi küna feiengau.”

Jeremaia 13:17

Nge are ousap mochen aüseling, üpwe chök kechü lemonomon pokiten ämi lamalamtekia. Üpwe kechüangau, nge chönün mesei repwe suputiu, pun nöün ewe Samol mi Lapalap aramas ra oola.

Jeremaia 20:9

Nge are üa apasa, “Üsap chüen föüni iten ewe Samol mi Lapalap ika kapas fän itan,” mürin om kapas a usun chök ekkei mi kü me lon lelukei, a pwourur me lechüi. Üa resin apwosalong, nge üsap chüen tongeni.

Jeremaia 23:9

Iei än Jeremaia kapas fänäsengesin ekewe soufos: Letipei a tatakis, unusen inisi a chechech. Ngang üa usun chök eman mwän mi pulas, usun eman mi puchala ren wain pokiten ewe Samol mi Lapalap me an kewe kapas mi pin.

Jeremaia 4:21

Ifa ükükün fansoun ai üpwe chök küna ewe filäiken maun o rongorong tikin ewe rappwa?

Jeremaia 4:5

Oupwe asilefeili lon Juta o arongafeili lon Jerusalem, “Oupwe ettiki ewe rappwa lemenen ewe fanü, oupwe kökkö fän leüömong o apasa, ‘Ousipwe chufengen o feilong lon ekewe telinimw mi pöchökül tittir.’

Jeremaia 42:14

o apasa, ‘Ap, äm aipwe feila lon ewe fanü Isip o nonom ikenan ia esap torikem maun me ie, ia aisap rong tikin rappwan maun, aisap pwal echik ie,’

Jeremaia 49:2

Nge epwe war ewe fansoun üpwe föri pwe ekewe chon Amon mi nom lon ewe telinimw Rapa repwe rongorong akürangen maun. Ewe telinimw epwe wiliti eu ioien mettoch mi tala, nge wisoposopun kewe repwe karala. Mürin chon Israel repwe angeesefäli fanüer seni chokewe mi angei seniir me mwan. Ngang ewe Samol mi Lapalap üa kapas.

Jeremaia 50:22

Akürangen maun epwe fis lon ewe fanü, pwal watten feiengau.

Jeremaia 6:24

Ekewe aramasen Jerusalem ra apasa, “Sa rongorong ei pworaus, pöüch ra chök ititiu. Niuokus watte a torikich, pwal cheuch a cherikich usun cheuchen fam a cheri eman fefin.

Jeremaia 8:18

Ai letipeta esap tongeni wes, pun a kon watte, lelukei a tatakis.

Jeremaia 8:21

Lelukei a tatakis, pun nei aramas ra tatakis, üa ngüngüres o fokun rükö.

Jeremaia 9:1

Amwo mökürei epwe eu lenien koluk, nge mesei epwe eu puächen chönün mas, pwe lerän me lepwin üpwe tongeni kechüeiti chokewe mi ninnila me lein nei aramas.

Jeremaia 9:10

Nge ngang üa apasa, “Üpwe ngüngüres fän iten ekewe chuk o kechüeiti ekewe lenien fetil me lon ewe fanüapö, pun ra pwasala. Iei mine esap wor eman a pwerela lor, esap pwal wor eman a rongorong wörüwörün kow me ie. Ekewe machang me ekewe manmwacho ra sü seniir.”

Kölün kechü 1:16

Üa kechü pokiten ekei mettoch, chönün mesei a fokun watte supun. Esap wor eman a nom pwe epwe achipaei, esap wor eman a apöchöküla lelukei. Nei kewe ra fokun riaföü, pun ewe chon oputaei a akufuei.

Kölün kechü 1:20

Ai Samol mi Lapalap, kopwe nenengeni ai riaföü. Leuti a fokun weires. Lelukei a tatakis, pun üa fokun tipis ngonuk. A wor ninni won ekewe al, nge lon ekewe imw a wor mäla.

Kölün kechü 2:11

Mesei a tton ren kechü, leuti a fokun weires. Letipeta a sasewu me lon lelukei pokiten feiengauen nei aramas, pwal pokiten än ekewe semirit me mönükol aiengau won alen ewe telinimw.

Taniel 4:19

Mürin än Taniel mi pwal iteni Peltesasar rongorong ei pworaus, a fanfanala fän mairü, pun letipan a fokun mwökütüküt ren wewen ewe tan. Nge ewe king a apasa, “Peltesasar, kosap niuokus le awewe ngeniei wewen ai we tan.” Iwe, Peltesasar a üreni, “Ai samol, amwo pekingauen wewen om we tan epwe fän iten chon oputok me chon pälüenuk.

Taniel 7:15

Ngang Taniel üa lolilen lon letipei, pun künaei lepwin a eniuokusuei.

Taniel 7:28

Iei ükükün ai pworaus. Nge ngang Taniel üa fokun niuokus ren ai kewe ekiek, pwe wowoi a siwil. Nge üa iseis ei pworaus lon letipei.

Taniel 8:27

Iwe, ngang Taniel üa apwangapwangala o samau lon ekoch rän. Mürin üa pwätä o föri ai angang ngeni ewe king. Nge üa chök rükö ren künaei we, pun üsap wewe ren.

Amos 3:6

Ifa usun, aramas resap niuokus lupwen ra rongorong tikin rappwan maun me lon eu telinimw? Ifa usun, epwe fis feiengau lon eu telinimw, are ewe Samol mi Lapalap esap awarato?

Apakuk 3:16

Üa rongorong usun ekei mettoch, inisi a chechech o awei a sälepwelep ren ai niuokus. Chüi ra kiroula, nge pechei ra täpäp. Üpwe witiwit fän mosonoson fän iten ewe ränin riaföü epwe feito won ekewe aramas mi mauneekem.

Numperis 10:9

Iwe, lupwen oupwe feila maun ngeni chon oputakemi mi ariaföüükemi me lon fanüemi, oupwe ettiki ewe tikin asilesilen maun ren ekewe rappwa. Mürin, ngang ewe Samol mi Lapalap ämi we Kot üpwe alisikemi o amanauakemi seni chon oputakemi.

Nöün Paulus Toropwe ngeni ekewe Souläng lon Rom 10:1

Ämi pwii kana, üa fokun mochen seni lon unusen letipei pwe püsin aramasei kewe repwe küna manau. Üa pwal iotek ngeni Kot fänäsengesiir.

1. Korint 14:8

Nge are ewe mwän mi ettiki ewe rappwa esap fat an ettiki asilesilen maun, iö epwe amolätä ngeni maun?

Kalatia 4:19

Ämi nei kana mi achengicheng! Üa usun chök eman fefin lon fansoun an nöünöü. Üa mefi ei sokun metek fänäsengesimi tori manauen Kraist epwe fis lomi.

Soukapwüng 5:21

Pupun ewe chanpupu Kison a opurela, pupun ewe chanpupu Kison mi pumong. Üpwe kakaris fän pöchökül.