Jeremaia 4:11 - Chuukese Bible

¹¹ Lon ena fansoun eman epwe üreni ekei aramasen Jerusalem, “Eu asepwäl mi pwichikar epwe enito seni won ungen ekewe chuk mi amassawa me lon ewe fanüapö o eniti ekewe aramas. Ei asepwäl esap fän iten an epwe limeti ekewe föün wiich o ässala pöör,

Jeremaia 4:11 Iomraidhean Croise

Kölfel 11:6

A apüngätiu molien ekkei me primston won ekewe aramasangau. A apwüngüür ren asepwäl mi pwichikar.

Aisea 22:4

Iei mine üa apasa, “Ousap nenengeniei, nge oupwe chök mwüt ngeniei pwe üpwe kekechü. Ousap pwal sotuni le achipaei, pun üa kechüeiti nei aramas kana mi küna feiengau.”

Aisea 27:8

Ewe Samol mi Lapalap a apwüngü nöün aramas ren an mwüt ngeniir pwe repwe oola. A asürela ren an asepwäl mi pöchökül a enito seni ötiu.

Aisea 41:16

Iwe, kopwe söfölüretä pwe asepwäl epwe ässirela, nge mölümöl epwe atoropaseer. Nge en kopwe pwapwa rei, pun ngang om Samol mi Lapalap, kopwe pwal mwareitiei ngang Ewe mi Pin lon Israel.

Aisea 64:6

Äm meinisin aia usun chök eman aramas mi limengau, äm föförün pwüng meinisin ra usun chök mekipwülün sof mi fokun limengau. Äm meinisin aia aiolol usun chön irä, nge äm tipis a ässikeemila usun asepwäl a ässala mettoch.

Jeremaia 13:24

Iei mine ewe Samol mi Lapalap epwe atoropasok usun asepwäl seni fanüapö a atoropasa pöön wiich.

Jeremaia 14:17

Nge en, Jeremaia, kopwe üreni ekei aramas usun om lolilen o apasa, ‘Amwo chönün mesei epwe suputiu lepwin me lerän, nge esap ükütiu, pun nei aramas ra feiengau ren eu kinas mi alolol, ren eu kawet mi fokun watte.

Jeremaia 23:19

Nengeni, än ewe Samol mi Lapalap lingeringer a usun chök eu mölümöl, usun eu ewiniär mi märäkukulfetal won möküren ekewe aramasangau.

Jeremaia 4:12

nge epwe eu asepwäl mi fokun pöchökül, epwe enito fän än ewe Samol mi Lapalap allük. Püsin i epwe atowu pwüngün an kapwüng ngeniir.”

Jeremaia 8:19

Oupwe rongorong siön nei aramas mi nonom lon eu fanü toau. Ra apasa, “Ifa usun, ewe Samol mi Lapalap esap nom lon Sion? Ifa usun, ewe kingen Sion esap chüen nom lon?” Iwe, ewe Samol mi Lapalap a pälüeni, “Pwota chök oua asongaei ren ämi fel ngeni ämi kewe uluulun anümwäl me ämi kewe koten ekis?”

Jeremaia 9:1

Amwo mökürei epwe eu lenien koluk, nge mesei epwe eu puächen chönün mas, pwe lerän me lepwin üpwe tongeni kechüeiti chokewe mi ninnila me lein nei aramas.

Jeremaia 9:7

Iei mine ewe Samol mi Unusen Manaman a apasa, “Nengeni, üpwe limeti nei aramas usun eman chon ketel a limeti mächä, üpwe sotuniir. Pun met echök üpwe tongeni föri ren nei aramas mi föri mine a ngau.

Kölün kechü 2:11

Mesei a tton ren kechü, leuti a fokun weires. Letipeta a sasewu me lon lelukei pokiten feiengauen nei aramas, pwal pokiten än ekewe semirit me mönükol aiengau won alen ewe telinimw.

Kölün kechü 3:48

Chönün mesei a pupu usun pupun eu chanpupu pokiten feiengauen nei aramas.

Kölün kechü 4:10

Ekewe fefin mi fokun tongei nöür ra püsin kukuw nöür semirit. A fis pwe ina ener mongö lupwen fansoun feiengauen nei aramas.

Kölün kechü 4:3

Eman liafefinin wolif a fen oupwu apanan, nge nei aramas ra chök nöünöün pwäpwä ngeni nöür.

Kölün kechü 4:6

Än Kot apwüngü nei aramas a kon watte seni an apwüngü Sotom, ewe telinimw mi tala lon eu chök otun ren pöün Kot.

Isikiel 17:10

Ewer, a fen fotetiu. Nge ifa usun, epwe märöch? Esap fokun pwasala, lupwen asepwälin ötiu epwe eniti me lon ewe leni ia a pwükütä ie?’”

Isikiel 19:12

Nge eman a üttätä ewe irän wain fän an song o aturala won pwül. Iwe, asepwälin ötiu a eniti pwe a pwasala, uan ra mworomworotiu, nge palan kewe mi pöchökül ra pwasala o kekila ren ekkei.

Osea 13:15

Inamwo ika Israel epwe mämäritä usun ekewe wowo, üpwe tinato eu asepwälin ötiu, epwe enito seni ewe fanüapö. Epwe amorätä an kewe puächen koluk me an kewe chönüttu. Aramas repwe angei fän pöchökül an kewe pisek aüchea meinisin seni an we lenien iseis.

Osea 13:3

Iei mine repwe müttir morola usun toputopun lesosor ika amurenipwin. Repwe pwal wewe ngeni pön wiich asepwäl a ässala seni ewe lenien wichiwich umwun wiich, ika usun ötüöt mi ötüwu seni eu asammwacho.

Osea 4:19

Eu ewiniär epwe ässirela, nge repwe säw pokiten ar asor ngeni ekewe uluulun anümwäl.

Apakuk 1:11

Mürin ra sä seniir usun asepwäl o feila. Ir aramas mi tipis, pun ra eäni kot ar pöchökül.”

Apakuk 1:6

Ngang üpwe äpwächa ekewe chon Papilon, ewe mwü mi rochongau o mwökütükai. Ra feila lemenen unusen fanüfan o liapeni lenien aramas sap lenier.

Mateus 3:12

A kamwöch an söföl usun fook pwe epwe aimwüfeseni ekewe föün wiich seni pöön me won ewe lenien wichiwich umwun wiich. Iwe, epwe ionifengeni ekewe föün wiich o uwalong lon an lenien iseis, nge ekewe pöön epwe keniirela lon ekkei esap kunula.”

Lukas 3:17

A kamwöch an söföl mi keang pwe epwe aea le aimwüfeseni ekewe föün wiich seni pöön me won an lenien wichiwich umwun wiich. Iwe, epwe ionifengeni ekewe föün wiich o uwalong lon an lenien iseis, nge ekewe pöön epwe keniirela lon ekkei esap kunula.”