Jeremaia 27:10 - Chuukese Bible

¹⁰ Pun mine ra osuni ngenikemi a chofana, epwe aselipato ämi oupwe toau seni fanüemi. Ngang üpwe asükemiila pwe oupwe rosola.

Jeremaia 27:10 Iomraidhean Croise

Ekistos 22:18

Oupwe niela ekewe sourong fefin meinisin.

Jeremaia 14:14

Iwe, ewe Samol mi Lapalap a üreniei, “Ekewe soufos ra eäni itei lon ar osuni mine a chofana. Üsap akünöör, üsap allük ngeniir, üsap pwal kapas ngeniir. Ra kapas ngenikemi usun künaer mi chofana, ar pwee a lomotongau, pun ra püsin ekiekietä.

Jeremaia 23:16

Iei alon ewe Samol mi Unusen Manaman ngeni ekewe aramasen Jerusalem, “Ousap aüselinga än ekewe soufos kapas, ir ätekewe mi osuni ngenikemi pwe oupwe apilükülük mwäl. Ra fos usun künaer seni püsin ar ekiek, nge sap fän aloi.

Jeremaia 23:25

Üa rongorong mine ekewe soufos mi osuni mine a chofana fän itei ra apasa, ir mi üra pwe üa fos ngeniir lon ar tan.

Jeremaia 27:14

Ousap aüselinga än ekewe soufos kapas, lupwen ra ürenikemi pwe ousap angang ngeni ewe kingen Papilon, pun mine ra osuni ngenikemi a chofana.

Jeremaia 27:15

Pun ewe Samol mi Lapalap a apasa pwe esap tiniir, nge ir ra chök osuni mine a chofana fän itan. Iei popun epwe asükemiila, nge ämi oupwe mäla, ämi me ekewe soufos mi osuni ngenikemi.”

Jeremaia 27:16

Mürin üa kapas ngeni ekewe souasor me ekewe aramas meinisin, pwe iei alon ewe Samol mi Lapalap, “Ousap aüseling ngeni än nöümi kewe soufos kapasen osuni ngenikemi, pwe pisekin imwen ewe Samol mi Lapalap repwe müttir liwinto seni Papilon. Pun ra chofana ngenikemi.

Jeremaia 28:11

Iwe, Hanania a apasa me fän mesen ekewe aramas meinisin, “Iei alon ewe Samol mi Lapalap: Iei usun üpwe angei ewe waas Nepukatnesar ewe kingen Papilon a ämwäralong won üen chon ekewe mwü meinisin o kupi mürin ruu ier.” Mürin üa feila.

Jeremaia 28:16

Iei mine ewe Samol mi Lapalap a apasa pwe epwe angeek seni won fanüfan. Lon ei chök ier kopwe mäla, pun ka üreni ekewe aramas pwe repwe ü ngeni ewe Samol mi Lapalap.”

Jeremaia 32:31

Chon ei telinimw ra äpwächa ai song me lingeringer seni ewe fansoun ei telinimw a kaütä tori ikenai. Iei mine üpwe ataela ei telinimw

Jeremaia 8:19

Oupwe rongorong siön nei aramas mi nonom lon eu fanü toau. Ra apasa, “Ifa usun, ewe Samol mi Lapalap esap nom lon Sion? Ifa usun, ewe kingen Sion esap chüen nom lon?” Iwe, ewe Samol mi Lapalap a pälüeni, “Pwota chök oua asongaei ren ämi fel ngeni ämi kewe uluulun anümwäl me ämi kewe koten ekis?”

Kölün kechü 2:14

Künan noum kewe soufos fän itom ra mwäl o chofana. Resap pwäri ngonuk om kewe tipis, pwe repwe epeti senuk om kopwe oola. Nge osunier fän itom ra mwäl o atuputup.

Taniel 4:7

Iwe, ekewe soutipachem me sourong, ekewe souürür me soupwe ra feito. Iwe, üa apworausa ngeniir ai we tan, nge resap tongeni awewe ngeniei wewen.

Sekaraia 10:2

Ekewe aramas ra kütta ar alilis seni ekewe uluulun anün leimw me ekewe soupwe, nge palüan me rer a chofana o lomotongau. Ekewe soutan ra apworausa tan mi mwäl, nge ar kapasen achipachip ra pön. Iei mine ekewe aramas ra malechfeil usun sip, ra riaföü pokiten esap wor ar chon mas.

Malakai 3:5

Iei alon ewe Samol mi Unusen Manaman, “Mürin, üpwe feito remi pwe üpwe apwüngükemi. Ngang üpwe eman chon pwärätä mi atipisi ekewe sourong, ekewe chon lisowu, ekewe mi akapelmwäl me ekewe mi angaua liwinin nöür chon angang, pwal chokewe mi ariaföüü ekewe fefin mi mä pwülüer, ekewe mi mäsen me ekewe chon siamü. Üpwe atipisi chokewe meinisin resap niuokusitiei.”

Tuteronomi 18:10

Esap wor eman me leimi epwe keni eman nöün ät ika nengin pwe an asor ngeni anümwäl, esap pwal wor leimi eman soupwe, are eman souasisil, are eman souwo, are eman sourong,