Jeremaia 26:15 - Chuukese Bible

¹⁵ Nge oupwe chök silei pwe ika oua nieila, oupwe atoto womi pwal won ei telinimw me aramasen lon liwinin chan eman esap wor an tipis. Pun a let pwe ewe Samol mi Lapalap a tinieito remi pwe üpwe asile ngenikemi ekei kapas meinisin.”

Jeremaia 26:15 Iomraidhean Croise

Keneses 4:10

Nge ewe Samol mi Lapalap a üreni, “Met ka föri? Chan pwiüm we a köriei seni won pwül.

Keneses 42:22

Nge Rupen a pälüeniir, “Ifa usun, üsap fen ürenikemi pwe ousap föri och tipis ngeni ewe ät? Nge ämi ousap mochen aüselinga aloi. Iei liwinin mine sia föri ngeni a torikich.”

2. King 24:4

pwal pokiten än Manasa niela chomong aramas esap wor ar tipis, pwe Jerusalem a kula ren char. Iwe, ewe Samol mi Lapalap esap amusala an tipis.

2. Kronika 24:22

Iei usun ewe king Joas esap chechemeni än Jehoiata semen Sekaraia kirikiröch ngeni, nge a niela nöün mwän. Iwe, lupwen än Sekaraia mäla a apasa, “Ewe Samol mi Lapalap a küna ei föför, i epwe ngonuk chappan.”

Än Salomon Fos 6:16

Mir wor fisu föför ewe Samol mi Lapalap a oput, esap fokun tipeeu ngeni:

Än Salomon Fos 6:17

Wolamalamtekia, kapas chofana, pau mi niela aramas esap wor ar tipis,

Jeremaia 2:30

Esor lomoten ai apwüngükemi, pun ousap mirit ren. Usun eman laion mi kütta ochan, iei usun ämi oua niela nöümi kewe soufos.

Jeremaia 2:34

A pwä me won ufom chan ekewe chon wöüngau esap wor ar tipis, nge ka küna pwe sap ir chon solä. Iei mwo an fis ekei föför meinisin,

Jeremaia 22:17

Nge en ka chök ekieki usun om kütta win fän rikirik. Ka niela chokewe esap wor ar tipis o föri angangen ariaföü me mwänewüs ngeni noum aramas. Ewe Samol mi Lapalap a kapas.

Jeremaia 22:3

Iei alon ewe Samol mi Lapalap: Oupwe föri mine a wenechar me pwüng o angasa ewe mi riaföü seni ewe chon ariaföüü. Ousap föri mine a ngau ika ariaföüü ewe chon ekis, ewe mi mäsen me ewe fefin mi mä pwülüan, ousap pwal niela eman esap wor an tipis lon ei leni.

Jeremaia 26:12

Mürin, Jeremaia a kapas ngeni ekewe nöüwis me ekewe aramas meinisin, “Ewe Samol mi Lapalap a tinieito pwe üpwe osuni talan ei imwenfel me ei telinimw, usun oua fen rongorong.

Jeremaia 30:1

Iwe, ewe Samol mi Lapalap, ewe Koten Israel a üreni Jeremaia,

Jeremaia 7:6

Oupwe ükütiu le ariaföüü ekewe chon ekis, ekewe mi mäsen ika ekewe fefin mi mä pwülüer. Oupwe ükütiu le niela chokewe esap wor ar tipis me lon ei leni. Oupwe ükütiu le fel ngeni pwal ekoch kot, pun ren ei oupwe chök atoto feiengau womi.

Numperis 35:33

Iwe, ousap alimengaua ewe fanü oua nonom won. Pun nimanauei eman a alimengaua ewe fanü. Nge esap tongeni fis asoren limelim fän iten ewe fanü pokiten ewe angangen nimanau a fis won, chilon chök ika ätewe mi nimanauei eman epwe ninnila.

Mateus 26:25

Iwe, Jutas ätewe mi afangamä Jesus a üra, “Sense, ifa usun, sap fen ngang ätewe?” Jesus a pölüeni, “Ewer, usun om apasa.”

Mateus 26:4

Ra pwüngüpwüngfengen usun ar repwe turufi Jesus le monomon o niela.

Föför 7:60

Mürin a fotopwäsuketiu o kökkö fän leüömong, “Ai Samol, kopwe amusala ei tipis ra föri ngeniei.” Mürin an apasa ei a mäla.

Tuteronomi 19:10

Ren ei oupwe pinei än chokewe resap tipis repwe ninnila me lon ewe fanü ewe Samol mi Lapalap ämi we Kot epwe ngenikemi pwe oupwe fanüeni, pwe tipisin niela aramas esap nonom womi.

Pwärätä 16:6

Pun ra ninätiu chaan ekewe chon pin me ekewe soufos, iei mine ka ngeniir cha pwe repwe ünümi usun a fich ngeniir!”