Jeremaia 26:13 - Chuukese Bible

¹³ Iei mine oupwe siwili ämi kewe lapalap me ämi kewe föför o aleasochis ngeni alon ewe Samol mi Lapalap ämi we Kot, mürin ewe Samol mi Lapalap epwe siwili an ekiekin afeiengauakemi usun a fen apasa.

Jeremaia 26:13 Iomraidhean Croise

Ekistos 32:14

Mürin, ewe Samol mi Lapalap a siwili an ekiekin afeiengaua nöün aramas.

Aisea 1:19

Are oupwe achocho le aleasochisiei, oupwe mongö seni öchün uän ewe fanü.

Aisea 55:7

Chon föföringau repwe likitala ar föför, nge chon pwüngingau kana repwe siwili ar ekiek. Repwe liwiniti ewe Samol mi Lapalap pwe epwe tongeäsiniir. Repwe kuliti ach Kot, pun a müttir le amusala tipis.

Jeremaia 11:4

Iei ewe pwon üa ngeni ämi kewe lewo, lupwen üa emwenirewu seni Isip, ewe fanü mi usun chök eu um mi fokun pwichikar ngeniir. Üa üreniir pwe repwe aleasochisiei o föri meinisin mine üa allük ngeniir. Iwe, repwe nei aramas, nge ngang üpwe ar Kot.

Jeremaia 18:11

Iei mine kopwe üreni ekewe re Juta me chon Jerusalem, ‘Iei alon ewe Samol mi Lapalap: Nengeni, üpwe awarato feiengau ngenikemi o ekiekin ü ngenikemi. Ämi meinisin oupwe kul seni ämi föför mi ngau o siwili alemi me ämi kewe föför.’

Jeremaia 18:8

Nge are chon ewe mwü üa kapas usun ra kul seni ar föför mi ngau, ngang üpwe siwili ai ekiekin afeiengaueer.

Jeremaia 26:19

Ifa usun, ewe king Hiskia me chon Juta meinisin ra niela Mik? Ifa usun, Hiskia esap niuokusiti ewe Samol mi Lapalap o kütta an ümöümöch me ren? Ifa usun, ewe Samol mi Lapalap esap siwili an ekiekin afeiengaueer a fen kapas usun? Nge iei kich sipwele awarato feiengau watte woch.”

Jeremaia 26:3

Eli repwe rongorong o kul seni ar kewe lapalap mi ngau, pwe ngang üpwe siwili ai ekiekin afeiengaueer üa ekiekin föri ngeniir pokiten ar kewe föför mi ngau.

Jeremaia 35:15

Üa soun tinala remi nei chon angang meinisin ekewe soufos pwe repwe ürenikemi, pwe oupwe en me kul seni an lapalap mi ngau o siwili an föför, ousap pwal fel ngeni pwal ekoch kot o angang ngeniir. Mürin, oupwe imweimw lon ewe fanü üa ngenikemi me ämi kewe lewo. Nge ämi ousap aleasochis ika aüselingaei.

Jeremaia 36:3

Eli ika chon Juta repwe rongorong usun ekewe feiengau meinisin üa ekiekin föri ngeniir, repwe kul seni ar föför mi ngau. Mürin, ngang üpwe amusala ar föföringau me tipis.”

Jeremaia 38:20

Nge Jeremaia a üra, “Resap asechikolong lepöür. Kopwe aleasochisi mine üa ürenuk fän alon ewe Samol mi Lapalap, mürin kopwe feiöch, nge kosap mäla.

Jeremaia 42:10

‘Are oupwe nomotiu lon ei fanü, mürin ngang üpwe aükemiitä, nge üsap ataakemiitiu. Üpwe fotukikemi, nge üsap üttikemiitä. Pun üa lolilenäsini ai üpwe afeiengauakemi.

Isikiel 33:11

Iwe, kopwe üreniir: Mwo manauei, aloi ngang Kot ewe Samol mi Lapalap, üsap pwapwaiti mälan eman chon föföringau, nge üa mochen pwe ewe chon föföringau epwe kul seni an tipis o manau. Ämi chon Israel, oupwe ükütiu seni ämi föföringau. Pun pwota oua mochen mäla?

Sowel 2:14

Eli ewe Samol mi Lapalap ämi we Kot epwe siwili an ekiek o afeiöchükemi ren chomong uän ämi irä. Mürin, oua tongeni eäni asoren mongö me asoren ün ngeni.

Sona 3:9

Eli Kot epwe siwili an ekiek o likitala an song mi fokun watte, pwe sisap mäfeiengau?”

Sona 4:2

Mürin a iotek ngeni ewe Samol mi Lapalap o apasa, “Ai Samol mi Lapalap, ifa usun, sap iei usun mine üa apasa pwe kopwe föri, lupwen üa chüen nonom won fanüei? Iei popun ai süla Tarsis, pun üa silei pwe en eman Kot mi ümöümöch o lukpwetete, ka pwal songomang o tongotam. Iwe, üa pwal silei pwe ka tipemecheres le siwili om ekiekin afeiengaua aramas kana.

Tuteronomi 32:36

Pun ewe Samol mi Lapalap epwe apwüngü nöün aramas o tongeäsini nöün kewe chon angang, lupwen a küna pwe esap chüen wor ar pöchökül, esap pwal chüen wor eman lusun, ese lifilifil ika ir amanau ika chon ngas.

Ipru 5:9

Iwe, lupwen a unusöchüla manauan won fanüfan, a wiliti ewe popun küna manau esemüch fän iten chokewe mi aleasochis ngeni.

Soukapwüng 2:18

Iwe, iteiten fansoun, lupwen ewe Samol mi Lapalap a filätä soukapwüng fän iter, a eti ewe soukapwüng o amanaua ekewe aramas seni chon oputeer lon ükükün ränin manauen ewe soukapwüng. Pun ewe Samol mi Lapalap a tongeäsiniir pokiten ar riaföü ren chokewe mi ariaföüür o aweiresiir.