Jeremaia 2:8 - Chuukese Bible

⁸ Ekewe souasor resap ais, ‘Ifa i ewe Samol mi Lapalap?’ Chokewe mi silelap allük resap sileei, ekewe souemwen ra ü ngeniei, nge ekewe soufos ra osuni fän iten ewe anü Paal o fel ngeni ekewe uluulun anümwäl mi lomotongau.

Jeremaia 2:8 Iomraidhean Croise

1. King 18:22

Mürin, Elias a üreni ekewe aramas, “Ngang echök üa chüen manau me lein nöün ewe Samol mi Lapalap kewe soufos. Nge mi wor ükükün föpükü lime soufos nöün ewe anü Paal.

1. King 18:29

Iwe, seni ewe oloasan tori fansoun asoren lekuniol ra akürang o sarawaraufetal, nge esap wor och möngüngü, esap wor eman a päpälü ika aüseling.

1. King 18:40

Mürin, Elias a üreni ekewe aramas, “Oupwe turufi nöün ewe anü Paal kewe soufos. Ousap mwüt ngeni eman pwe epwe sü.” Iwe, ra turufiir, nge Elias a emweniretiu ren ewe öüwö Kison o nirela ikenan.

Hiop 35:10

Nge esap wor eman me leir a ais, ‘Ifa i Kot ewe mi föriei, ewe mi atufichiei pwe üpwe kölün mwareiti lepwin,

Aisea 28:7

Iwe, pwal ekewe souasor me soufos ra kukuul ren wain, ra mwaroro ren sakau. Ra ünümong wain me sakau pwe ra mwaroro o umwesila. Iwe, ekewe soufos ra mwäl lon künaer, ekewe souasor ra pwal mwäl lon ar apwüng.

Aisea 29:10

Pun ewe Samol mi Lapalap a apüngätiu womi eu möürüchou. Iwe, a apüngala mesen ekewe chon mesenikemi, nöümi kewe soufos, a pwal pwölüela möküren ekewe chon mökürenikemi, nöümi kewe souürür.

Aisea 30:5

ir meinisin repwe säw ren Isip, pun i eu mwü mi lomotongau ngeniir, esap tongeni alisiir, pwe a chök äsäweer o aitengaueer.”

Jeremaia 10:21

Ekewe souemwen ra umwes. Resap angei öüröürer me ren ewe Samol mi Lapalap. Iei mine esap fisiöch ar angang, nge nöür aramas ra toropasfeil.

Jeremaia 12:10

Chomong chon mas ra atai ai tanipin wain, ra purätiu fanüei. Ra föri pwe fanüei mi mürina a wiliti eu fanüapö.

Jeremaia 16:19

Ai Samol mi Lapalap, en ai pöchökül me imwei imwen maun, en ai lenien op lon fansoun riaföü. Chon ekewe mwü repwe feito reöm seni lesopun fanüfan o apasa, “Esap wor och äm kewe lewo ra fel ngeni, ngei kot mi mwäl, ekewe uluulun anümwäl mi lomotongau.

Jeremaia 18:18

Mürin, ekewe aramas ra apasa, “Ousipwe rawangauei Jeremaia. Pun a chüen wor ekewe souasor mi aiti ngenikich ekewe allük, ika ekewe soutipachem mi öüröürakich, ika ekewe soufos mi afalafalakich. Ousipwe atipisi, nge sisap afäli mine a apasa.”

Jeremaia 2:11

Esap wor chon eu mwü mi ekesiwili ar kewe kot, nge ir resap wesewesen kot. Nge nei aramas ra ekesiwiliei ngang ar we Kot mi ling ngeni pwal ekoch kot mi lomotongau.

Jeremaia 2:6

Resap ekiekiei, nge ngang üa fen amanaueer seni ewe fanü Isip o emwenirela lon ewe fanüapö. Ei fanüapö eu fanü mi pön o pwokurokur, eu fanü esap püngütiu üt won, a chök wor feiengau lon, eu fanü esap wor eman a nom ie, esap pwal wor eman a mochen pwerela won.

Jeremaia 4:22

Ewe Samol mi Lapalap a apasa, “Nei aramas ra umwes, resap sileei. Ra usun chök semirit mi tiparoch, resap mirit. Ra sipeöch le föri mine a ngau, nge resap silei ar repwe föri föför mi öch.”

Jeremaia 5:31

Än ekewe soufos osuni a chofana, nge ekewe souasor ra nemenem fän püsin ar mochen. Nei aramas ra sani an epwe iei usun. Nge met repwe föri lon ewe fansoun sopolan?”

Jeremaia 7:8

Nengeni, oua lükü kapasen atuputup esap wor lomotan.

Jeremaia 9:14

Nge ra ülöförea o chei mochenin leluker, ra fel ngeni ekewe anü Paal usun ar kewe lewo ra aiti ngeniir.

Isikiel 22:26

Iwe, ekewe souasor ra purätiu ai kewe allük o turunufasei piseki mi pin. Resap alefila lefilen mine a pin me mine esap pin, resap pwal afata lefilen mettoch mi limengau me mettoch mi limöch. Iwe, ra apiningaua pinin ai kewe ränin sapat pwe üa itengau leir.

Isikiel 34:2

“Nöün aramas, kopwe osuni usun feiengauen ekewe sounemenem, ir ekewe chon masen Israel, kopwe osuni usur o üreniir, pwe iei aloi ngang Kot ewe Samol mi Lapalap: Feiengauemi, ämi chon masen Israel, pun oua püsin tümwünükemi. Ifa usun, sap wisen chon mas pwe repwe tümwünü sip?

Osea 4:6

Nei aramas ra feiengau, pun resap wesewesen sileei. Pokiten oua oput ämi oupwe sileei, ngang üpwe pwal oput ämi oupwe nei souasor. Pokiten oua manlükala ewe allük än ämi we Kot, ngang üpwe pwal manlükala nöümi kewe.

Apakuk 2:18

Met lomoten eu uluulun anümwäl? A chök och mettoch eman aramas a püsin auluulu. Esap tongeni pwäri ngonuk och ngei chofana echök. Met feiöchün ngeni ewe chon föri pwe a lükü eu uluulun anümwäl esap tongeni kapas?

Mateus 16:26

Epwe met lomoten än eman aramas epwe feiöchüni feiöchün unusen fanüfan, nge manauan epwe pöüt seni? Esap wor och eman aramas a tongeni fangala pwe epwe angesefäli manauan.

Lukas 11:52

Feiengauemi, ämi Sensen Allük! Pun oua amwöchü kien asamen silei (mettochun mwün läng). Püsin ämi ousap tolong lon, nge oua epeti chokewe mi mochen tolong lon.”

Johannes 16:3

Aramas repwe föri ekei sokun föför ngenikemi, pun resap mwo silei Semei, resap pwal sileei.

Johannes 8:55

Ämi ousap fokun silei Kot, nge ngang üa silei i. Are üpwe apasa pwe üsap silei i, üpwe eman chon chofona usun chök ämi. Nge ngang üa silei i o aleasochisi an kapas.

2. Korint 4:2

Nge aia pöütala ekewe föför meinisin mi monomon me ekewe föför mi asäw. Aisap föri föförün atuputup, aisap pwal amwäli än Kot kapas. Nge aia pwärätä mine a let mwen mesen Kot o sotuni äm aipwe aitöchükem ngeni ekiekin aramas meinisin.

Tuteronomi 33:10

Iwe, repwe aiti ngeni ekewe mwirimwirin Jakop om pwüng, pwal ngeni ekewe chon Israel om allük. Repwe iseis apach mi pwokus fän mesom o eäni asoren kek won om rongen asor.

1. Samuel 12:21

Ousap angang ngeni ekewe anümwäl mi lomotongau, resap tongeni afeiöchükemi ika amanauakemi, pun ra lomotongau.

1. Samuel 2:12

Nge nöün Eli kewe mwän ra aramasangau. Resap meniniti ewe Samol mi Lapalap,