Jeremaia 17:12 - Chuukese Bible

¹² Ach imwenfel a wewe ngeni än king lenien mot mi fokun ling, a tekia seni lepoputan.

Jeremaia 17:12 Iomraidhean Croise

Kölfel 103:19

Iwe, ewe Samol mi Lapalap a anüküchara an lenien motun king me lon ekewe läng, mwün a nemeni unusen fanüfan.

Kölfel 96:6

Iteüöch me manaman ra nonom mwan, pöchökül me ling ra nonom lon imwan mi pin.

Aisea 6:1

Lon ewe ier, lupwen ewe king Ussia a mäla, üa küna ewe Samol, a mot won eu lenien motun king mi fokun tekia, nge lepwülün üfan a aurala lon ewe imwenfel.

Aisea 66:1

Pwal iei alon ewe Samol mi Lapalap, “Läng ai lenien mot, nge fanüfan lenien puun pechei. Met sokun imw oupwe aüetä fän itei are ifa lenien ai asösö?

Jeremaia 14:21

Kosap oput äm pokiten itom. Kosap awarato itengau won Jerusalem, ewe leni ia om lenien mot mi fokun ling a nom ie. Kopwe chechemeni om pwon ngenikem, nge kosap atai.

Jeremaia 3:17

Are epwe tori ena fansoun, Jerusalem epwe iteni än ewe Samol mi Lapalap lenien mot, nge chon ekewe mwü meinisin repwe mwichefengen lon Jerusalem pwe repwe fel ngeniei. Resap chüen ülöförea le apwönüetä ekiekingauen leluker.

Isikiel 1:26

Iwe, asen ewe läng me won mökürer a wor och mi wewe ngeni eu lenien motun king mi för seni ewe fau aüchea itan safaia. Nge ewe mi mot won a lapalapeni lapalapen eman aramas.

Isikiel 43:7

Iwe, a üreniei, “Nöün aramas, ei leni ai lenien motun king me lenien puun pechei. Ikei ie üpwe imweimw lein aramasen Israel tori feilfeilachök, nge chon Israel me ar king resap chüen aitengaua itei mi pin ren ar angang ngeni anümwäl, pwal ren somän ar king, lupwen ra peiaseniir.

Mateus 25:31

“Iwe, lupwen Nöün Aramas epwe war lon lingan o chon läng meinisin repwe eti, epwe mot won an lenien motun king mi ling.

Ipru 12:2

Ousipwe chök nenengeni Jesus ewe chon popuetä me chon awesala ach lükülük. Esap fangatä pokiten ewe iräpenges, nge fänäsengesin ewe pwapwa mi nom mwan esap ekieki itengauen an mäla won ewe iräpenges. Iwe, iei a mottiu lepelifichin Kot.

Ipru 4:16

Iei mine sipwe arap ngeni än Kot we lenien mot fän apilüköch, ia sia küna ümöümöch me ie. Ikenan sipwe angei tong o küna ümöümöch, pwe epwe alisikich lon fansoun ach osupwang.

Pwärätä 3:21

Iö mi pwora ngeni mine a ngau üpwe mwüt ngeni pwe epwe etiei le mot won ewe lenien motun king, usun pwal ngang üa pwora o mot ren Semei won an lenien motun king.