Jeremaia 10:10 - Chuukese Bible

¹⁰ Nge en Samol mi Lapalap ewe Kot mi let. En ewe Kot mi manau me ewe king mi nom tori feilfeilachök. Lupwen ka song, fanüfan a chechech, nge chon ekewe mwü resap tongeni manau fän om song.

Jeremaia 10:10 Iomraidhean Croise

Keneses 21:33

Iwe, Apraham a fotuki efoch irä itan tamarisk lon Peersepa. Ikenan a fel ngeni ewe Samol mi Lapalap, ewe Kot mi nom tori feilfeilachök.

1. King 18:39

Iwe, lupwen ekewe aramas meinisin ra küna mine a fis, ra chapetiu lepwül o kökkö, “Ewe Samol mi Lapalap i Kot, ewe Samol mi Lapalap i chök Kot.”

1. King 8:60

Ren ei aramasen fanüfan meinisin repwe silei pwe ewe Samol mi Lapalap i chök Kot, esap pwal wor eman lükün.

1. Kronika 29:11

Ai Samol mi Lapalap, en ewe mi tekia me manaman me ling me pwora me iteföüla. Pun meinisin mine a nom lon läng pwal won fanüfan om. Ai Samol mi Lapalap, om chök ewe mwü, en ka tekia o nemeni meinisin.

2. Kronika 15:3

Fansoun langatam esap wor än chon Israel Kot mi wesewesen Kot, esap wor nöür souasor mi afalafaleer, esap pwal wor ar allük.

Hiop 9:6

A achecha fanüfan o amwökütü seni lenian, a pwal achecha üran kana.

Kölfel 10:16

Ewe Samol mi Lapalap i king tori feilfeilachök. Chon ekewe mwü repwe rosola seni fanüan.

Kölfel 100:3

Oupwe silei pwe ewe Samol mi Lapalap i Kot. I ewe a förikich, nge kich sa nöün. Sa nöün aramas me nöün sip lon an we mälämäl.

Kölfel 100:5

Pun ewe Samol mi Lapalap a kirikiröch, an tong ellet a nonom tori feilfeilachök, nge an allükülük a tori ekewe täppin aramas meinisin.

Kölfel 104:32

Lupwen a netiu won fanüfan, fanüfan a chechech. Lupwen a atapa ekewe chuk, ra ötüöt.

Kölfel 114:7

En fanüfan, kopwe chechech me fän mesen ewe Samol, me fän mesen än Jakop we Kot,

Kölfel 145:13

Mwum eu mwü mi nom tori feilfeilachök, nge om nemenem a nonom won ekewe täppin aramas meinisin. Ewe Samol mi Lapalap a allükülük lon an pwon meinisin, a eäni ümöümöch ngeni förian meinisin.

Kölfel 146:6

ewe mi föri läng me fanüfan, pwal ewe matau me meinisin mine a nom lor. Ewe Samol mi Lapalap a allükülük tori feilfeilachök,

Kölfel 18:7

Iwe, fanüfan a chechech o mwöükük, nge longolongun ekewe chuk ra pwal chechech o chüngüchüng pokiten än Kot song.

Kölfel 29:10

Ewe Samol mi Lapalap a nemenem won ekewe lölö. A nemenem, pun i a king tori feilfeilachök.

Kölfel 31:5

Üa atolonga manauei lepoum, kopwe amanauaei, ai Samol mi Lapalap, ewe Kot mi allükülük.

Kölfel 42:2

Üa fokun posituk, en ai Kot mi manau. Inet üpwe tongeni feila o nenengeni mesom?

Kölfel 68:11

Ewe Samol a atowu ewe kapas. A fokun lapalap ewe mwichen fefin mi arongafeili ewe pworausen win,

Kölfel 68:8

fanüfan a chechech, ekewe läng ra apüngätiu üt me fän mesen Kot. Ewe chuk Sinai a chechech me fän mesen Kot, ewe Koten Israel.

Kölfel 74:12

Nge ai Kot, en ai king seni me lomlom, ka amanaua aramas won unusen fanüfan.

Kölfel 76:7

Nge en echök, ai Samol mi Lapalap, aramas repwe niuokusituk. Iö a tongeni ü me mwom, lupwen ka song?

Kölfel 76:8

Ka eäni kapwüng seni won läng. Iwe, fanüfan a niuokus o fanafanala,

Kölfel 77:18

Püngün om chopulap a nom lon ewe ewiniär. Om kewe inefi ra asarama fanüfan. Fanüfan a chechech o mwöükük.

Kölfel 84:2

Üa fokun positi ai üpwe nom lon imwen ewe Samol mi Lapalap, ewer, üa aiengau ren. Lelukei me inisi ra kölün pwapwa ngeni ewe Kot mi manau.

Kölfel 9:8

Iwe, a apwüngü chon fanüfan fän pwüng, a apwüngü chon ekewe mwü fän wenechar.

Kölfel 90:11

Nge iö a mefi manamanen om song, nge iö a silei an epwe niuokusiti om lingeringer?

Kölfel 90:2

Mwen ekewe chuk resamwo fis, pwal mwen kosamwo föri unusen fanüfan en chök Kot seni fansoun esepop tori fansoun esemüch.

Kölfel 93:2

Om lenien motun king a nüküchar seni me lomlom, en ka nom seni fansoun esepop.

Kölfel 97:4

An kewe fifi ra asarama fanüfan, chon fanüfan ra küna o chechech.

Aisea 37:17

Ai Samol mi Lapalap, kopwe aü selingom o rongorong, kopwe neto o nengeni mine a fis ngenikem. Iwe, kopwe rongorong ekewe kapas meinisin Sanherip a tinato pwe epwe turunufaseek ren, en ewe Kot mi manau.

Aisea 37:4

Eli ewe Samol mi Lapalap om we Kot a rong alon ewe meilapen sounfiu, ätewe an samol ewe kingen Asiria a tinato pwe epwe turunufasei ewe Kot mi manau. Iwe, ewe Samol mi Lapalap om we Kot epwe apwüngü ätewe ren an kewe kapas a apasa. Iei mine kopwe iotek fän iten chokewe ra chüen manau.”

Aisea 40:15

Ellet, ekewe mwü ra usun chök eu chiin koluk lon eu pwekit, ra pwal wewe ngeni pwül moromor won eu kilo. Ekewe fanüen lematau ra pwas usun chök pipisüsü me ren ewe Samol mi Lapalap.

Aisea 40:28

Ousap silei usun? Are ousap rong usun? Ewe Samol mi Lapalap eman Kot mi nonom tori feilfeilachök, a föri unusen fanüfan. Iwe, esap malülü, esap pwal achanü, nge an tipachem esap wor aükükün.

Aisea 57:15

Pun iei alon Ewe mi Unusen Tekia, ewe mi manau tori feilfeilachök, itan Ewe mi Pin, “Ngang üa imweimw lon eu leni mi pin o tekia, pwal ren eman mi luketatakis o tipetekison, pwe üpwe amanaua ngüngün chon tipetekison o apöchöküla leluken chon liamam.

Aisea 65:16

Iö a mochen tüngor an feiöch me lon ewe fanü, epwe tüngor an feiöch me ren ewe Kot mi let, nge iö a pwon fän akapel me lon ewe fanü, epwe apelü ewe Kot mi let. Pun ekewe riaföün fansoun lom ra manlüküla, ra monola seniei.”

Jeremaia 23:36

Nge ousap chüen apasa, ‘Ewe weires ewe Samol mi Lapalap a kapas usun’, pun püsin än eman me eman kapas epwe wiliti an weires. Nge ämi oua sorei ewe kapas än ewe Kot mi manau, ewe Samol mi Unusen Manaman ämi we Kot.

Jeremaia 4:2

are oupwe pwon fän akapel itei fän let, pwüng me wenechar, mürin chon ekewe mwü repwe kütta ar feiöch me rei, repwe pwal mwareitiei.”

Jeremaia 4:24

Üa nengeni ekewe chuk o küna pwe ra chechech, ekewe chukutekison meinisin ra mwarorofeil.

Jeremaia 50:46

Fanüfan epwe chechech ren akürangen än Papilon turutiu. Chon ekewe mwü repwe rongorong ar puchör.”

Jeremaia 51:29

Iwe, fanüfan a chechech o mwaroro, pokiten a fisitä mine ewe Samol mi Lapalap a akota fän iten Papilon. Epwe ataala ewe fanü Papilon pwe esap chüen so.

Taniel 4:3

Ekewe asisil Kot a föri ra fokun amwarar, an kewe manaman ra fokun ling. Mwün epwe nom tori feilfeilachök, nge an nemenem epwe fis seni eu täppin aramas tori pwal eu täppin.

Taniel 4:34

Iwe, ewe king a üra, “Wesin ekewe fisu ier, ngang Nepukatnesar üa netä läng o miritsefäl. Iwe, üa mwareiti Ewe mi Fokun Tekia o manau tori feilfeilachök, üa pwal alinga o asamolu i. Pun an nemenem esap müchüla, nge mwün a nonom seni eu täppin aramas tori pwal eu täppin.

Taniel 6:26

Üa apwüngala eu allük, pwe aramas meinisin mi nom fän nemeniei repwe niueiti o meniniti än Taniel we Kot. Pun i ewe Kot mi Manau a nom tori feilfeilachök, mwün esap tala, an nemenem esap pwal müchüla.

Taniel 6:27

I chök a tufichin angasa o amanaua aramas, a pwal föri asisil me manaman won läng pwal won fanüfan. I a amanaua Taniel seni ekewe laion.”

Taniel 7:14

Iwe, a angei an nemenem me lingan me mwün, pwe aramasen fanü me mwü, pwal aramas mi eäni sokopaten fos repwe angang ngeni. An nemenem epwe nom tori feilfeilachök, esap tongeni wesila, nge mwün esap tongeni tala.

Sowel 2:11

Iwe, ewe Samol mi Lapalap a kökkö fän leüömong me mwen an mwichen sounfiu. Ewer, an mwich a fokun watte, nge iteiter mi aleasochisi an kapas ra pwora. Iwe, ränin ewe Samol mi Lapalap a fokun eniwokus. Iö a tongeni pwäk le nonom lon?

Mika 1:4

Iwe, ekewe chuk repwe telila me fän pechen usun kiris a telila ren ekkei. Ekewe lemol repwe sangfesen usun ekewe pal ra sangfesen ren puun koluk.

Nahum 1:5

Ekewe chuk ra chechech me mwen ewe Samol mi Lapalap, nge ekewe chukutekison ra sönüla, fanüfan me meinisin mine a nom won ra chechech me fän mesan.

Nahum 1:6

Iö a tongeni ütä me mwen an song? Iö a tongeni nom fän watten an song? An lingeringer a kü usun ekkei, nge ekewe achau ra mökküfesen me mwan.

Apakuk 3:10

Ekewe chuk ra künok o chechech, üt a püngümongetiu seni läng. Ewe matau mi alolol a pwotä, nge nonoon kewe ra püngümong.

Apakuk 3:6

Lupwen Kot a ütä, fanüfan a chechech, lupwen a nenefetal, chon ekewe mwü ra chechech. Ekewe chuk mi nom seni chök lom ra tatakis, ekewe chukutekison minen lomlom ra kokotiu. An kewe al ra nom seni fansoun esepop.

Malakai 3:2

Nge iö epwe tongeni pwäk lon ewe ränin an feito? Iö epwe tongeni ütä, lupwen epwe pwä? Pun i a wewe ngeni soop mi müttir limetawu limengau, a pwal wewe ngeni än eman ekkein ketel mächä.

Mateus 16:16

Simon Petrus a pölüeni, “En Kraist ewe Nöün Kot mi manau.”

Mateus 26:63

Nge Jesus a chök fanafanala. Iwe, ewe Souasor mi Lap a pwal apasa ngeni Jesus, “Kopwe pwon fän akapel iten ewe Kot mi manau o ürenikem ika en ewe Kraist, Nöün Kot.”

Johannes 17:3

Iwe, iei manau esemüch: Ar repwe silei en, ewe eman chök Kot mi let, repwe pwal silei Jesus Kraist, ewe ka tinato.

Föför 14:15

“Pwota oua föri ei sokun lapalap? Äm aramas chök usun chök ämi! Äm aia nom ikei, pwe aipwe aronga ngenikemi ewe Pworausen Manau, pwe oupwe kul seni ämi fel ngeni ekei kot mi lomotongau o fel ngeni ewe Kot mi manau, ewe mi föri läng me fanüfan me matau me meinisin mine a nom lor.

Tuteronomi 32:4

I ewe achau, an föför ra unusen mürina, pun an kewe al meinisin ra pwüng. I eman Kot mi allükülük, esap wor an mwäl, a pwüng o wenechar.

Tuteronomi 5:26

Pun ifa usun, mi wor eman aramas me lein aramas meinisin a rongorong mwelien ewe Kot mi manau, a fosewu seni lukalapen ekkei usun kich sa rongorong, nge a chüen manau?

1. Tesalonika 1:9

Ekei aramas meinisin ra kapas usun ämi etiwakem lupwen aia churikemi, pwal usun ämi kul ngeni Kot o kul seni ekewe uluulun anümwäl, pwe oupwe angang ngeni ewe Kot mi manau o wesewesen Kot,

1. Timoty 1:17

Ewe King mi nonom tori feilfeilachök, ewe eman chök Kot, ewe esap tongeni mäla, esap wor eman a tongeni küna, sipwe meniniti o alinga tori feilfeilachök! Amen.

1. Timoty 6:17

Kopwe allük ngeni ekewe mi pisekisek lon mettochun ei fanüfan pwe resap lamalamtekia. Resap pwal anomu ar apilükülük won wöür epwe morola, nge repwe apilükülükü Kot mi fangesom ngenikich mettoch meinisin pwe sipwe feiöch ren.

Ipru 10:31

A men fokun eniweniw ach turulong lepöün ewe Kot mi manau!

Josua 3:10

Josua a pwal üra, “Ren ei oupwe silei pwe ewe Kot mi Manau a nom lefilemi, epwe wesewesen asüela me mwemi ekewe chon Kanaan, chon Hit, chon Hiw, chon Peris, chon Kirkas, chon Amor me chon Jepus.

1. Johannes 5:20

Sia pwal silei pwe Nöün Kot a feito o fang ngenikich ach weweöch, pwe sipwe silei ewe Kot mi let. Sia nonom lon ewe Kot mi let pwal lon Nöün we Jesus Kraist. I ewe Kot mi let me ewe manau esemüch.

Pwärätä 20:11

Mürin üa küna eu lenien motun king mi watte o pwechepwech me ewe eman mi mot won. Fanüfan me läng ra süla seni mwen mesan, nge esap chüen wor leni fän iter.

Soukapwüng 5:4

Lupwen ka feila seni ewe chuk Seir, en Samol mi Lapalap, lupwen ka karis seni ewe fanü Etom, fanüfan a chechech o läng a apüngätiu üt, ewer, ekewe kuchu ra apüngätiu koluk.

1. Samuel 17:26

Tafit a aisini ekewe mwän mi nom ünükün, “Met epwe fis ngeni ewe mwän mi niela ei re Filistia o uwei seni Israel ewe itengau? Pun iö ei re Filistia esap sirkomsais, pwe epwe apälüa ewe mwichen sounfiu nöün ewe Kot mi manau?”

1. Samuel 17:36

Ngang noum ei chon angang üa fen kakawet laion me pear. Iwe, ei re Filistia esap sirkomsais epwe usun chök ekewe manmwacho, pun a apälüa ewe mwichen sounfiu nöün ewe Kot mi manau.