James 1:27 - Chuukese Bible

²⁷ Än eman souläng limöch me pwüng mwen mesen Samach Kot a fis are epwe iei usun: epwe tümwünü ekewe mi mäsen me ekewe fefin mi mä pwülüer lon ar riaföü, epwe pwal püsin tümwünü i, pwe esap limengau ren ngauen ei fanüfan.

James 1:27 Iomraidhean Croise

Kölfel 119:1

Ra feiöch chokewe resap tipis lon manauer, chokewe mi aleasochisi än ewe Samol mi Lapalap kewe allük.

Kölfel 146:9

Ewe Samol mi Lapalap a tümwünü ekewe chon ekis, a alisi ekewe fefin mi mä pwülüer me ekewe mi mäsen, nge a atai mine ekewe aramasangau ra akota.

Kölfel 68:5

Kot ewe mi nom lon imwan mi pin, i semen ekewe mi mäsen me chon tümwünün ekewe fefin mi mä pwülüer.

Aisea 1:23

Om kewe souemwen ra wiliti chon pälüeni mwü, ra pwal chiechi ngeni chon solä. Ir meinisin ra sani lifangen amichimich, ra pwal tipemong won lifang. Resap peni chokewe mi mäsen lon kapwüng, resap pwal alisi ekewe fefin mi mä pwülüer.

Mateus 12:32

Iö a apasa och kapasen ü ngeni Nöün Aramas a tongeni musala. Nge iö a apasa och kapasen ü ngeni Ngünmifel esap fokun musala lon ei fansoun ikenai tori feilfeilachök.

Mateus 5:8

Ra feiöch chon limöch leluker, pun ir repwe küna Kot.

Lukas 1:6

Ir me ruoman ra föri mine a pwüng mwen mesen Kot o aleasochisi än ewe Samol kewe allük me pwüüng meinisin.

Nöün Paulus Toropwe ngeni ekewe Souläng lon Rom 12:2

Ousap apirü pomwen fanüfan, nge oupwe mwüt ngeni Kot pwe epwe awilikemi o asöföla unusen letipemi. Mürin oupwe tongeni silei letipen Kot, ren met mi mürina me unusöch, pwal met mi apwapwai i.

Nöün Paulus Toropwe ngeni ekewe Souläng lon Rom 2:13

Pun ekewe aramas resap küna pwüng mwen mesen Kot ren ar rongorong ngeni ekewe Allük, nge ren ar apwönüetä pwüngün ekewe Allük.

Kalatia 1:4

Kraist a fangala manauan fänäsengesin ach tipis kana ren an aleasochisi letipen ach Kot i Samach pwe epwe angasakich seni ei fansoun mi ngau.

Kalatia 3:11

Iwe, iei a fat pwe esap wor eman aramas epwe küna pwüng me ren Kot ren an apwönüetä ekewe Allük, pun a mak lon ekewe Toropwe mi Pin, “Ewe chök aramas mi küna pwüng me ren Kot epwe manau ren an lükülük.”

Kalatia 5:6

Pun lupwen sia fen nonom lon Kraist Jesus, esap chüen wor lomoten ach sipwe sirkomsais ika sisap sirkomsais, nge met chök a aüchea, iei ach lükü Jesus mi pwä lon ach echeni aramas.

Kalatia 6:14

Nge ngang won inisi üpwe chök aingaing won ewe iräpengesin ach Samol Jesus Kraist. Pun ren an we iräpenges fanüfan a iräpenges ngeniei, nge ngang üa iräpenges ngeni fanüfan.

Efisos 2:2

Lon ena fansoun oua manaueni ewe manauen fanüfan mi ngau. Oua aleasochis ngeni ewe mi nemeni ekewe ngününgau mi nom fän läng, ewe ngün mi nemeni ekewe aramas mi aleasolap ngeni Kot iei.

Tuteronomi 14:29

Ei mongö epwe fän iten chon ewe ainangen Lefi, pun esap wor fanüer me wiser leimi. Epwe pwal fän iten ekewe chon ekis, ekewe mi mäsen me ekewe fefin mi mä pwülüer mi nom lon ämi kewe telinimiw. Repwe feito o mongö tori repwe möt. Are oua föri iei usun, ewe Samol mi Lapalap ämi we Kot epwe afeiöchü angangen pöümi meinisin.”

1. Timoty 1:5

Popun ai ei allük pwe epwe afisätä ewe chen mi pop seni eu leluk mi limöch me eu mwelien letip mi mürina, pwal eu lükülük mi let.

1. Timoty 5:4

Nge ika eman fefin mi mä pwülüan a wor nöün ika nöün nöün, ir repwe akomwen apwönüetä pwüngün wiser lon ar souläng ngeni püsin ar famili. Ren ei repwe liwini ngeni semer me iner, pwal ngeni semen me inen semer me iner mine ra piin föri ngeniir, pun iei met Kot a pwapwa ren.

Titus 2:12

Än Kot ümöümöch a aiti ngenikich ach sipwe likitala ach turunufas me mochenian fanüfan, nge sipwe eäni mirit, pwüng me soulängöch lon ach manau lon ei fanüfan.

James 3:17

Nge ewe tipachem seni läng a fokun limelimöch, a pwal akinamwe, tipepwetete me kirikiröch, a uren tong o awora chomong föför mi mürina, esap lifilifil aramas, esap pwal atuputup.

James 3:9

Pun ren chönawach sia mwareiti ach Samol, i Samach, nge ren chönawach sia pwal otteki aramas, ir chokewe mi för lon lapalapen Kot.

James 4:4

Ämi aramas mi kirikiringau! Ousap silei pwe chiechi ngeni fanüfan wewen fiu ngeni Kot? Iö a mochen chiechi ngeni fanüfan, i ewe aramas mi fiu ngeni Kot.

2. Petrus 1:4

Ren ei lapalap a fen fang ngenikich ekewe feiöchün pwon mi fokun watte o aüchea, pwe ren ekei feiöch oupwe tongeni sü seni mochenian ei fanüfan mi afeiengau o oupwe tongeni angei sokun Kot.

2. Petrus 2:20

Are aramas ra sü seni limengauen tipisin ei fanüfan ren ar silei ach Samol me Chon Amanau Jesus Kraist, nge mürin ra tupusefälilong lon o kuf rer, ekei sokun aramas repwe feiengau lesopolan lap seni lepoputän.

2. Petrus 3:14

Iei mine, ämi chiechiei mi achengicheng, pokiten oua witiwiti ei Rän, oupwe fokun achocho ngeni pwe oupwe limöch, pwe esap wor ämi mwäl mwen mesen Kot, nge oupwe pwal nom lon kinamwe.

1. Johannes 5:18

Sia silei pwe eman mi up seni Kot esap sopwela le föri tipis, pun ewe Nöün Kot a tümwünüöchü, pwe Ewe mi Ngau esap tongeni afeiengaua.