Ester 9:13 - Chuukese Bible

¹³ Iwe, Ester a pälüeni, “Are a öch me reöm en ai king, kopwe mwüt ngeni ekewe chon Juta mi nom lon Susa, pwe repwe föri lesor usun mine ra piin föri ikenai. Kopwe pwal mwütätä pwe ekewe engol mwän nöün Haman repwe for won irä.”

Ester 9:13 Iomraidhean Croise

2. Samuel 21:6

Iei mine kopwe mwüt ngenikem füman mwän seni mwirimwirin Saul, pwe aipwe forusirela me fän mesen ewe Samol mi Lapalap lon Kipea ewe telinimwen Saul, ewe king ewe Samol mi Lapalap a filätä.” Iwe, ewe king a üra, “Üpwe ngenikemi ekewe mwän.”

2. Samuel 21:9

Iwe, a ngeni ekewe chon Kipeon ekewe füman mwän, nge ekewe chon Kipeon ra forusirela me won ewe chuk me fän mesen ewe Samol mi Lapalap. Ekei füman mwän ra mäpök, ra ninnila lepoputän fansoun kinikin föün parli.

Ester 8:11

Iwe, ren masouen lon ekewe toropwe ewe king a mwüt ngeni ekewe chon Juta mi nom lon ekewe telinimw meinisin, pwe repwe tongeni chufengen o fiu ngeni chon oputeer pwe resap mäla. A mwüt ngeniir pwe repwe niela o arosala iteiten mwicheichen aramas lon ekewe sop mi fiu ngeniir, repwe pwal niela nöür me pwülüer o angei pisekir fän pöchökül.

Ester 9:14

Iei mine ewe king a allük pwe repwe föri ina usun. Iwe, ewe allük a rongofeil lon Susa, nge ekewe engol mwän nöün Haman ra for won irä.

Ester 9:15

Iwe, lon engol me rüanün ränin ewe maram Atar, ekewe chon Juta mi nom lon Susa ra chufengensefäl pwe repwe pwal niela ülüpükü mwän lon Susa. Nge resap angei och seni pisekir.

Kalatia 3:13

Nge ren än Kraist küna anümamau fän itach a angasakich seni ewe anümamau ekewe Allük ra atoto woch, pun a mak lon ekewe Toropwe mi Pin, “Iö a mwöch won efoch irä a anümamau me ren Kot.”

Tuteronomi 21:23

inisin esap tongeni nom won ewe irä lon unusen ewe pwin. Nge kopwe peiaseni ewe mwän lon ewe chök ränin, pun eman aramas mi itiuätä won irä a anümamau me ren Kot. Kosap alimengaua ewe fanü ewe Samol mi Lapalap epwe ngonuk pwe kopwe fanüeni.