Ester 3:13 - Chuukese Bible

¹³ Iwe, ekewe chon künö ra uweela ekewe toropwe ngeni ekewe sop meinisin mi nom fän nemenien ewe king. Nge masouen lon ekewe toropwe, pwe aramas repwe niela o arosala chon Juta meinisin lon eu chök rän, seni alüal tori chinlap, pwal fefin me semirit. Ei epwe fis lon engol me ülüngatin ränin ewe engol me ruuen maram a iteni Atar. Repwe pwal angei pisekir fän pöchökül.

Ester 3:13 Iomraidhean Croise

2. Kronika 30:6

Fän än ewe king allük ekewe chon künö ra feila lemenen unusen Israel me Juta fän ekewe toropwe seni ewe king me nöün kewe nöüwis. Iei masouen ekewe toropwe, “Ämi aramasen Israel mi chüen manau o sü seni fän nemenien ewe kingen Asiria, oupwe kul ngeni ewe Samol mi Lapalap än Apraham, Isaak me Jakop we Kot, pwe i epwe kulsefäl ngeni ämi.

Ester 7:4

Pun äm me aramasei aia möla pwe aipwe mäla o rosola. Are aipwe chök möla usun amanau mwän me fefin, üpwe fanafanala. Pun are epwe ina usun, äm feiengau esap aweiresuk en ai king, pwe kopwe lus ren.”

Ester 8:5

Iwe, a apasa, “Are en ai king ka mochen, ika üa küna ümöümöch me reöm, are ei mettoch epwe pwüng me reöm en ai king, ika ka tongeei, kopwe makei eu allük mi siwili pwüngün ewe allük Haman nöün Hametata ewe mwirimwirin Akak a apwüngala, pwe epwe arosala ekewe chon Juta mi nom lon ekewe sop meinisin ra nom fän nemeniom.

Ester 9:1

Iwe, lon engol me ülüngatin ränin ewe engol me ruuen maram mi iteni Atar a tori fansoun pwe än ewe king allük epwe pwönüetä. Lon ewe rän ekewe chon oputen chon Juta ra ekiekin akufuur, nge ewe rän a wili ngeni eu rän chon Juta ra tongeni akufu chon oputeer.

Ester 9:10

Ekei engol mwän nöün Haman, nge Haman nöün Hametata ewe chon oputa chon Juta. Nge resap angei och seni pisekir.

Ester 9:5

Iei mine ekewe chon Juta ra niela chon oputeer meinisin ren ketilas, ra aroserela o föri ngeniir mine ra mochen.

Hiop 9:25

Ränin manauei ra müttir sü seniei, lap seni müttirin eman chon sä. Ra süla, nge esap wor feiöch lor.

Aisea 10:6

Üa tinala chon Asiria ren chon eu mwü resap niueitiei, nge üa allük ngeniir pwe repwe maun ngeni ekewe aramas üa songeitiir. Repwe angei seniir wöür o soläni pisekir, repwe pwal puriir usun chök pwakaken won al.

Jeremaia 51:31

Eman chon sä a tapwela mürin pwal eman, nge eman chon künö a tapwela mürin pwal eman, pwe repwe asile ngeni ewe kingen Papilon pwe unusen an we telinimw a oola.

Nöün Paulus Toropwe ngeni ekewe Souläng lon Rom 3:15

Ra müttir ngeni ar afeiengaua o niela aramas.

James 2:13

Pun Kot esap eäni tong ngeni eman aramas esap eäni tong, lupwen a apwüngü. Pun tong a win lon kapwüng.

1. Samuel 15:3

Iei kopwe feila, kopwe maun ngeni chon Amalek o wesewesen ataela meinisin mine ar. Kosap achikeer, nge kopwe niela mwän me fefin, semirit me ekewe mi chüen oupw, pwal nöür ätemwänin kow me sip, nöür kamel me aas.’”

1. Samuel 22:19

Iwe, Saul a pwal niela meinisin mine a nom lon Nop ewe telinimwen souasor. A niela mwän me fefin, semirit me ekewe mönükol pwal kow, aas me sip.