1. Korint 3:10 - Chuukese Bible

¹⁰ Ren ewe ümöümöch Kot a fang ngeniei, ngang üa föri ewe longolong usun eman mi silelap le aüetä imw, nge eman aramas a köütä won. Iwe, eman me eman epwe tümwünüöchü met epwe aüetä won.

1. Korint 3:10 Iomraidhean Croise

2. Kronika 2:12

Iwe, Hairam a pwal apasa lon an toropwe, “Üpwe mwareiti ewe Samol mi Lapalap ewe Koten Israel mi föri läng me fanüfan, pwe a ngeni king Tafit eman nöün mwän mi tipachem, a uren mirit me silelap, pwe epwe aüetä eu imwenfel fän iten ewe Samol mi Lapalap, pwal eu imwen king fän püsin itan.

Ekistos 36:4

pwe ekewe mwän mi föri ekewe sokopaten angang won ewe imw mi pin ra likitala ar angang, ra feito ren Moses

Än Salomon Fos 12:8

Aramas repwe mwareiti eman mi mirit aükük ngeni an mirit, nge repwe oput eman mi tiparoch.

Än Salomon Fos 9:1

Tipachem a aüetä imwan o aütäi füfoch üran.

Än Salomon Afalafal 12:9

Iwe, ewe Chon Afalafal esap chök mirit, nge a pwal aiti ngeni aramas silelap. A ekiekifichi ekewe mwiitun o kütta wewer, a pwal achocho le akotöchüür.

Taniel 12:3

Iwe, ekewe chon mirit repwe meriweriw usun meriweriwen läng, nge chokewe mi aiti ngeni chomong aramas usun ar repwe föri mine a pwüng repwe titin usun fü kana tori feilfeilachök.

Sekaraia 4:9

“Serupapel a föri longolongun ei Imwenfel, i epwe pwal awesala. Are epwe fis ei, nei aramas repwe silei pwe ngang ewe Samol mi Unusen Manaman üa tinuketo rer.

Mateus 24:45

“Iwe, iö chök ewe chon angang mi allükülük o tipachem? Ätewe an masta epwe seikätä pwe epwe nemeni nöün kewe chon angang o ngeniir wiser mongö lon fansoun fich.

Mateus 7:24

“Iei mine are eman a rongorong ai kei kapas o aleasochis ngeniir a wewe ngeni eman mwän mi tipachem, a aüetä imwan won achau.

Lukas 11:35

Iei mine kopwe tümwünüöchuk, pwe ewe saram mi nom lomw esap rochopwak.

Lukas 21:8

Jesus a üreniir, “Oupwe mamasa, pwe esap wor eman epwe atupukemi. Chomong aramas repwe feito fän itei o apasa, ‘Ngang ewe Kraist,’ pwal ‘Ewe fansoun an epwe war a arap.’ Ousap tapwela mürir.

Föför 18:27

Iwe, Apollos a ekiekin sai ngeni Akaia, iei mine ekewe chon lükü Jesus lon Efisos ra alisi ren ar mak toropwe ngeni ekewe chon lükü Jesus mi nom ikenan o tüngor ngeniir pwe repwe etiwa Apollos. Iwe, lupwen Apollos a tori Akaia, a fokun alisi chokewe mi lükü Jesus ren ümöümöchün Kot.

Nöün Paulus Toropwe ngeni ekewe Souläng lon Rom 1:5

Ren Jesus Kraist, Kot a ngeniei ewe ümöümöch, pwe üpwe wiseni ewe wisen soukünö fän itan, pwe üpwe emweni aramasen ekewe mwü meinisin pwe repwe lükü i o aleasochis ngeni.

Nöün Paulus Toropwe ngeni ekewe Souläng lon Rom 12:3

Iwe, pokiten än Kot lifangen ümöümöch ngeniei, üpwe ürenikemi meinisin: Ousap ekiekin tipetekia seni mine a fichitikemi, nge oupwe tipetekison lon ämi ekiek o püsin apwüngükemi ngeni ewe aükükün lükülük Kot a ngenikemi.

Nöün Paulus Toropwe ngeni ekewe Souläng lon Rom 15:15

Nge lon ei toropwe üa fokun pwora le makkei ngenikemi usun ekoch itelap üa mochen achema ngenikemi. Üa föri ei pokiten ewe wis mi aüchea Kot a ngeniei,

Nöün Paulus Toropwe ngeni ekewe Souläng lon Rom 15:20

Iei ai mochen fansoun meinisin, pwe üpwe arongafeili ewe Pworausen Manau lon ekewe leni ia aramas resamwo rongorong usun Kraist, pwe üsap aüetä won eu longolong eman a fen föri.

1. Korint 3:11

Pun Kot a fen anomu Jesus Kraist pwe i chök ewe longolong, nge esap pwal wor eu longolong me lükün.

1. Korint 9:2

Inamwo ika ekoch aramas resap etiwaei usun eman soukünö, nge fen iei mine oua föri! Pokiten ämi oua souläng, iei met a alletätä pwe ngang eman soukünö.

2. Korint 10:15

Iei mine aisap aingaing won ewe angang ekewe ekoch aramas ra föri mi lu seni ewe aükük Kot a awisa ngenikem. Nge aia apilükülüköch pwe ämi lükü epwe mämäritä, pwe aipwe tongeni föri lefilemi eu angang mi fokun watte, nge aipwe chök föri lon ewe aükük Kot a awisa ngenikem.

Efisos 2:20

Pwal ämi oua köütä won ewe longolong mi för ren ekewe soukünö me ekewe soufos, nge püsin Kraist Jesus i ewe föün lepwokuku.

Kolose 1:29

Üa fokun angang weires pwe epwe fis ei o üa aea ewe watten pöchökül Kraist a ngeniei, ewe a pwal akangang loi.

Kolose 4:17

Oupwe üreni Arkipus, “Kopwe föri ewe angang ra awisa ngonuk lon än ewe Samol we angang pwe kopwe apwönüetä.”

1. Tesalonika 3:2

nge aipwe tinala Timoty, pwiim we mi etikem le angang ngeni Kot lon äm afalafala ewe Pworausen Manau usun Kraist. Äm aia tinala pwe epwe apöchöküla letipemi o alisikemi lon ämi lükülük,

1. Timoty 4:16

Kopwe püsin tümwünuk, kopwe pwal tümwünü mine ka afalafal won. Kopwe likitü le föri ekei mettoch, pun are kopwe föri iei usun, kopwe püsin amanauok me chokewe mi aüselingok.

2. Timoty 2:15

Kopwe fokun achocho ngeni pwe Kot epwe tipeeu ngenuk, pwe kopwe eman chon angang esap säw ren an angang, pun ka afalafala än Kot kapas mi let fän pwüng.

James 3:1

Ämi pwii kana, esap chomong me leimi repwe wiseni ewe wisen sense, pun oua silei pwe kich mi wiseni wisen sense sipwe küna kapwüng mi fokun chou lap seni ekewe ekoch.

1. Petrus 4:11

Are eman a afalafal, epwe fokun afalafala än Kot Kapas. Are eman a alisi aramas, epwe alilis lon ükükün an pöchökül Kot a ngeni lon ewe angang, pwe lon mettoch meinisin Kot epwe küna ling ren Jesus Kraist, ewe mi eäni ling me manaman tori feilfeilachök. Amen.

2. Petrus 3:15

Oupwe ekieki usun ei, pwe ren mosonotamen ach Samol oua küna manau, usun chök pwiich we mi achengicheng Paulus a mak ngenikemi ren ewe tipachem Kot a fang ngeni.

Pwärätä 21:14

Tittin ewe telinimw a kaütä won engol me ruoföü föün longolong, nge won ekei fau a mak iten nöün ewe Lam kewe engol me ruoman soukünö.

Pwärätä 21:19

Ekewe föün longolongun tittin ewe telinimw ra aling ngeni sokopaten fau aüchea. Ewe eföün longolong ewe fau aüchea itan jasper, ewe aruoföün safaia, ewe aülüföün akit, ewe aföföün emeralt,