Tutelonomi 9:4 - Chahta Holisso Holitopa 1886

⁴ Chin Chitokaka Chihowah yʋt chi tikba ya̱ ishit kanchi ha ya̱, chi chu̱kʋsh anu̱kaka ya̱ anumpulit, Ai ʋlhpiesa li pulla kak o̱ yakni ilʋppa a binili la chi̱ ho̱, Chihowah yʋt sʋsht ʋla tuk oke; chik acho kashke; amba oklushi ilʋppa puta haksi kak o̱, Chihowah yʋt chi tikba a tihlelit kocha weli hoke.

Tutelonomi 9:4 Iomraidhean Croise

Genesis 15:16

Yohmi kia aiitishali ont aiushta kʋto anonti ilʋppa ai ʋla hi oke: Amolait okla nan ai asha̱hanchi kʋt ik aloto ki̱sha hoka, im achi tok.

Lefitikʋs 18:3

Echip yakni aiasha, yʋmma hʋsh aiasha tuk, yʋmmʋt nana a kaniohmi ya̱ hobachit hʋsh yʋmihcha he keyushke; micha Kenan yakni hʋch isht ona la chi̱ yʋmma a̱sha kʋt nana yʋmohmi ya̱ hobachit hʋsh yʋmohma he keyu hoke, micha i̱ nan ʋlhpisa ka̱ im antiʋt hʋsh noho̱wa he keyu.

Loman 11:20

A̱hli; ik yimmo kak osh kobahlit kʋnihi̱ya hatok; amba chishno ʋto na yimmi kak osh isht ish a hikia hoke. Chik ilefehnacho kashke, amba ish il akanlosechashke:

Loman 11:6

Yohmi ka isht i̱ kana yak okma, toksahanli tuk pulla yak o̱ ai yʋmohmi keyu hoke; yakohmi hokma isht i̱ kana yʋt isht i̱ kana keyu yoke. Amba toksahanli tuk pulla yak o̱ ai yʋmohmi hokma, isht i̱ kana yak o̱ ai yʋmohmi keyu hoke: yakohmi hokma toksahanli yʋt toksahanli keyu hoke.

1 Kolinhlian 4:4

Ʋno ak inli kʋt nana ho̱ isht il akostininchi li keyu kʋt; yohmi kak osh ilʋppak o̱ isht si ai ʋlhpiesa hi o̱ keyu; amba kʋna hosh nan isht si anukfillit apesa hokʋto Chitokaka yak oke.

1 Kolinhlian 4:7

Kʋta hosh hʋch iti shashohlichit hʋchim apesa tok o̱? Nanta ho̱ ish i̱shi hosh yʋmma chik habeno tok o̱? yohmi ka ish habena hatuk mʋt, nanta katiohmi ho̱ chik habeno ke tuk ak inli ho̱ chohmit isht ish ilauata cho?

Tutelonomi 12:31

Chin Chitokaka Chihowah ya̱ ish yʋmihcha he keyu; Chihowah yʋt i̱ yuwala puta moma, micha shitilema ya̱, i̱ naholbʋt toba i̱ yʋmihchi tuk oke; ushi ʋhleha micha ushetik ʋhleha aiena ka̱ i̱ naholbʋt toba luak isht i̱ hukmi fehna tuk oke.

Tutelonomi 31:27

Ish ile filʋmmichi, micha chikunla kʋllo ka̱ ithana li hoke; yakeh, himak nitak a̱ si okcha̱yʋt hʋchi takla anta li moma ka̱ Chihowah ya̱ i̱ filʋmmi hʋchi shahli fehnʋshke; a sʋlli ha yok mak heno i̱ shahli fehna chi̱ keyu cho?

Tutelonomi 8:17

Mihma chi chu̱kʋsh anu̱kaka, Ʋno sa kʋllo, micha sʋbbak kʋllo hosh ishit holitopa ilʋppa isht ʋma tok oke, ish achi yoba na,

Tutelonomi 9:24

Hʋch ithana li tok aiʋhlit mi̱hinti ka̱ Chihowah ya̱ i̱ sanalit, hʋsh i̱ filahʋmmi chatuk oke.

Tutelonomi 9:5

Ish ai ʋlhpiesa, micha chi chu̱kʋsh ʋt ai ʋlhpiesa kak osh i̱ yakni ya ishit a binilit ish ia keyu; amba oklushi ilʋppa puta haksi kak o̱, micha anumpa kʋllo ya̱ chi̱ki ʋhleha Eblaham, Aisak, micha Chekob aiena im il onoch i tok anumpa ha̱ aia̱hlicha chi̱ hosh chin Chitokaka Chihowah yʋt chi tikba a tihlelit kocha weli hoke.

Tutelonomi 9:7

Yakni haiaka ya̱ chin Chitokaka Chihowah im ai i̱ nukkilli ya̱ ish nokowʋchi tok ʋt, ish ithaiyana cha, ik chim a hakso kashke; Echip yakni ya̱ kohchʋt ish minti tok, nitak yʋmma ʋttʋt mihintit ilʋppa hʋshla tuk ant ʋhli ka̱ Chihowah ya̱ i̱sanalit hʋsh i̱ fila̱hʋmmi tuk oke.

2 Timohli 1:9

Yʋmmak osh pi okchalinchi cha, ʋba nan isht ilaiyuk pa holitopa ho̱ il iesha he mak o̱ pi atokoli kʋt, pishno nan il ai isha he ai ʋlhpiesa kak o̱ yohmi keyu, amba ilap nan isht im anukfihinla hosh, yakni ik tobo pilla kash inli ho̱ ilap isht i̱ kana ya̱ Chisʋs Klaist ak atuk pulla mak o̱ pihi̱ma kak a tok oke: