Tutelonomi 6:5 - Chahta Holisso Holitopa 1886

⁵ Yohmi ka̱ Chitokaka chin Chihowah ya̱ chi chu̱kʋsh a̱ mominchit, micha chi shilombish ma mominchit, micha chi kʋllo ya̱ mominchit ishit ish holitoblashke,

Tutelonomi 6:5 Iomraidhean Croise

1 Mi̱ko 3:3

Mihma Solomon ʋt Chihowa ya̱ holitobli cha, i̱ki Lewi ʋt nanʋlhpisa puta ka a noho̱wa beka tok a̱ anoho̱wa tok: yohmi kia achahaka puta ka nan ʋbit ai isht aiokpʋchit nabalama a hukmi beka tok.

2 Mi̱ko 23:25

Mihma tikba aiasha kʋt mi̱ko nana kia yʋmma chohmit Moses i̱ nan ʋlhpisa moma kak o̱ yʋmohmit chu̱kʋsh ai oklu̱hʋt, micha shilombish ai oklu̱hʋt, micha imi̱ hlampko ai oklu̱hʋt Chihowa iakaiya chohmi kʋt iksho tok: micha i̱ himmakma yʋmma chohmit hikia kʋt iksho tok.

Atʋloa 119:2

Nan isht im ai ʋlhtukkoa putta ka̱ hulittobli, chu̱kʋsh ai oklu̱hʋt Chihowa ha̱ ho̱ho̱yo, nan ik ai ʋlhpeso ma̱ yohmi keyu, im ata̱ya puttah ʋpesa tok a̱ ai ittʋno̱ho̱wa yʋt na̱ yokpa yoke.

Atʋloa 31:24

Hʋsh kʋllashke, mikma̱ hʋchi chu̱kʋsh a̱ hlampkocha hinla hoke, Chihowa ho̱ho̱yo hʋsh moiyumah ma.

Mahlu 10:37

Kʋna hosh i̱ki yokmá, keyukmʋt ishki yokmá, nana ho̱ i̱ hullo kʋt ʋno a̱ im i̱ shahli hokʋt, ʋmmi ha he ʋlhpesa keyu hoke: mikmʋt ushi yokmá, keyukmʋt ushetik okmá, nana ho̱ holitobli kʋt ʋno a̱ im i̱ shahli hokʋt, ʋmmi ha he ʋlhpesa keyu mak inli hoke.

Mahlu 22:37

Mihma Chisʋs ʋt, Chitokaka chin Chihowa hoka chi chu̱kʋsh a̱ mominchit, mikmʋt chi shilombish a̱ mominchit, anonti chim anukfila ha̱ mominchit isht ish holitoblashke;

Mark i̱ Holisso 12:30

Micha Chitokaka chin Chihowa ya̱ chi chu̱kʋsh a̱ a mominchit, chi shilombish a̱ u̱hʋlinchit, mikmʋt chim anukfila ha̱ mominchit, anonti chim ishthlampko ma a mominchit isht ish holitoblashke, achi ilʋppak osh nan‐ʋlhpisa moma i̱ shahli ʋmmona hoke.

Mark i̱ Holisso 12:33

Mikma yʋmmak ash o̱ chu̱kʋsh a mominchit, im anukfila ha̱ mominchit, anonti shilombish a̱ mominchit, im isht‐hlampko ma mominchit isht holitoblikmʋt, in chuka‐panta hatak a̱ holitobli kʋt ilapa ai itilauechi kak osh ʋba isht aiokpʋchi nana achʋfa nipi ʋt momʋt lua puta ka, micha ʋba isht aiokpʋchi aiena ka moma i̱ shahlishke, im achi tok.

ʋBanumpa Luk Ʋt Holissochi Tok 10:27

Mihma yʋmmak ash ot afalaminchi mʋt, Chi chu̱kʋsh mominchi hosh, chi shilombish ma mominchit, chim ishthlampko a mominchit, mikmʋt chim anukfila ma mominchi hosh Chitokaka chin Chihowa ya̱ isht ish holitoblashke; mikmʋt chin chuka panta hatak ma ish holitobli kʋt, chishno akinli chim itilauashke, im achi tok.

Tutelonomi 10:12

Yohmi ka̱ himak a̱ Islael ma, nanta ho̱ chin Chitokaka Chihowah yʋt chim ahoyo cho? amba chin Chitokaka Chihowah ya̱ i̱ nukwiʋt, i̱ hina moma ka̱ ano̱ho̱wa, micha holitoblit, micha chin Chitokaka Chihowah ya̱ chu̱kʋsh ai oklu̱hʋt, micha chi shilombish ai oklu̱hʋt isht ish im antia ho̱.

Tutelonomi 11:1

Yʋmohmi hoka chin Chitokaka Chihowah ya̱ ish holitobli cha̱, chi̱ miha tok a̱, micha i̱ nan ʋlhpisa bilia, micha im ai ʋlhpiesa yʋmihinchi, micha im anumpa aiena ka̱ ish ieshi na, biliashke.

Tutelonomi 11:13

Atukma yakohma hi oke, achunanchit ʋm anumpa himak nitak a̱ hʋchim anumpo̱honli li ka̱ hʋsh haiyaklo, hʋchin Chitokaka Chihowah ya̱ hʋsh holitobli, micha hʋchi chu̱kʋsh a̱ mominchit, micha hʋchimi shilombish ma mominchit hʋsh im antiakma,

Tutelonomi 13:3

Hopaii yʋmma, micha na holhpokuna holhpokuna yʋmma im anumpa ha̱ ish haponakla he keyu; hʋchi chu̱kʋsh a̱ mominchit, micha hʋchimi shilombish ma mominchi hosh hʋchin Chitokaka Chihowah ya̱ ishit hʋsh holitoblikma, nanakma, isht akostinincha chi̱ hosh i̱moma ka̱ hʋchi pisa hoke.

Tutelonomi 13:4

Hʋchin Chitokaka Chihowah ya̱ iakaiyʋt hʋsh itʋnowashke, micha i̱ nukwiʋt im anumpa ha̱ holitoblit, im anumpa ha̱ hʋsh im antiʋt, in toksa̱hanlit hʋsh asitiashke.

Tutelonomi 19:9

Ʋm anumpa puta ilʋppa himak nitak a̱ chim ahanchi li ka̱ holitoblit ish yʋmi̱hinchit, chin Chitokaka Chihowah ya̱ ish holitobli cha, i̱ hina puta ka̱ ish ano̱ho̱wa na biliakmʋt: tuchina ilʋppak ash, himakma tʋmaha holihta tuchina ho̱ ish il ibafohkashke,

Tutelonomi 30:10

Chin Chitokaka Chihowah ya̱ im anumpa ha̱ i̱sh i̱ haponaklo cha, im anumpa ʋlhpisa, micha i̱ nan ʋlhpisa bilia, nan ʋlhpisa holisso ilʋppa aholisso tuk a̱ ish ieshikma, micha falamʋt chi chu̱kʋsh a̱ mominchit, micha chimi shilombish a̱ mominchi hosh ish im onakma,

Tutelonomi 30:16

Yohmi hosh himak nitak a̱ chin Chitokaka Chihowah ya̱ ish holitobli cha, i̱ hina ya̱ ish ai itʋnowʋt, im anumpa, micha i̱ nan ʋlhpisa bilia, micha im aiʋlhpesa yʋmi̱hinchi ya̱ ish ieshi cha, chi okchayʋt ish apaknʋcha he o̱ chi̱ miha lishke: mikma chin Chitokaka Chihowah yʋt yakni ya̱ ish isha chi̱ hosh yʋmma pilla ish ia ka̱ a chi yukpala hi oke,

Tutelonomi 30:20

Yʋmohmi hosh chin Chitokaka Chihowah ya̱ ish holitoblashke, micha yʋmohmi hosh im anumpa ha̱ ish im antiashke, micha yʋmohmi hosh hʋsh asitiashke, (yʋmmak osh chi ai okcha̱ya, micha nitak isht chi̱ falaia yoke;) yʋmohmi hosh Chihowah yʋt chi̱ki ʋhleha Eblaham, Aisak, micha Chekob aiena ka̱ ima chi̱ hosh anumpa kʋllo im il onochi tok a̱, yakni ya̱ ish aiashashke, (achi tok.)

Tutelonomi 30:6

Mikma chin Chitokaka Chihowah yʋt chi chu̱kʋsh, micha chim ʋlla ʋhleha chu̱kʋsh aiena ka̱ hakshup tʋbli na, chin Chitokaka Chihowah ya̱ chi chu̱kʋsh mominchit micha chimi shilombish a̱ mominchit isht ish holitobli cha chi okchaya hi oke,

Tutelonomi 4:29

Yohmi tuk kia yʋmma a̱shʋt chin Chihowah Chitokaka ya̱ ish hoyokmʋt, chi chu̱kʋsh a̱ mominchit, micha chi shilombish a̱ mominchit hʋsh hoyokmʋt, hʋsh ahayucha hi oke.

Choshua 22:5

Yohmi kia ahah! ahni fehnʋt, nan ʋlhpisa puta Chihowa in tishu Moses ʋt atokolit hʋchi̱ miha kʋt, Chitokaka hʋchin Chihowa ya̱ holitoblit, ai ahni bieka ho̱ anoho̱wʋt, nan apihi̱sa puta ka ieshit, micha asitiʋt, micha chu̱kʋsh aioklu̱hʋt, micha shilombish aioklu̱hʋt hʋsh im antiashke, ahanchi tok a̱ hʋsh im antihi̱yashke, im achi tok.

1 Chan 5:3

Im anumpa ʋlhpisa ya̱ e holitobli ilʋppak osh Chihowa i̱ hullo mak oke; micha im anumpa ʋlhpisa yʋt a palʋmmi ka keyu hoke.