Tutelonomi 6:18 - Chahta Holisso Holitopa 1886

¹⁸ Micha Chihowah itikba ya̱ nana ai ʋlhpiesa micha achukma kak o̱ ish yʋmihchashke; yohmi hosh hʋchim achukma̱kashke, micha yohmi hosh Chihowah yʋt chi̱ki ʋhleha ha̱ anumpa kʋllo ilonochit im issa tok yakni achukma ya̱ chukowʋt ish abinilashke,

Tutelonomi 6:18 Iomraidhean Croise

Atʋloa 19:11

Chi̱ tishu hak kia isht i̱ tohwikeli hoke; yʋmma̱ hulittobli kʋt isht im ʋlhtobah chito yoke.

Eksotʋs 15:26

Micha Hʋchin Chitokaka Chihowah im anumpa ha̱ achunanchit hʋsh i̱ haponaklo cha, itikba ya̱ ai ʋlhpiesa kak o̱ yʋmihinchit, im anumpa ʋlhpisa ha̱ hʋsh i̱ haponaklot, i̱ nanʋlhpisa puta ka̱ hʋsh holitoblikma ililli ilʋppa puta ka̱ Echip okla ha̱ onochi li tok ʋt hʋchi onochi la he keyu hoke; Chihowah sia hosh hʋchi hlakofichi li hoka, achi tok.

Chan 8:29

Micha auet sa kanchi tok ʋt sa ta̱kla a̱ya hoke; A̱ki ʋt ilap illʋchit sa kanchi tok keyu; nana kʋt yʋmma yukpali pulla kak o̱ yʋmohmi kʋt a sa bilia chatuk oke, im achi tok.

Loman 12:2

Micha yakni ilʋppak inli ka hʋch ik hoyulbo kashke; amba hʋchim anukfila hʋt himonʋt toba pulla hatuk mak osh inlʋt hʋsh tobashke; yohmi hosh nan achukma, nan ai ʋlhpiesa, nan ai a̱hli Chihowa nan ai ahni ka hʋsh akosti ninchashke.

Tutelonomi 12:25

Ish pa he keyu hoke; yʋmohmi hosh Chihowah itikba ya̱ aiʋlhpiesa ho̱ ish yʋmohmikmʋt, chishno, micha chim ʋlla ʋhleha et chi akaiya aiena kʋt chim achukmashke.

Tutelonomi 12:28

Yohmi ahnit ish anukfilli cha, anumpa ilʋppa moma chi̱ miha li ka̱ ish haklashke; yʋmohmi hosh chishno, micha chim ʋlla chi akaiya aiena kʋt chin Chitokaka Chihowah itikba ya̱ achukma ho̱ micha ai ʋlhpiesa ho̱ ish yʋmihchikmʋt achukma hosh ish ma̱ha̱ya na biliashke.

Tutelonomi 13:18

Chin Chitokaka Chihowah im anumpa ha̱ ish haponaklo cha, im anumpa moma ka̱ himak nitak a̱ chi̱ miha li ka̱ ieshit chin Chitokaka Chihowah itikba ya̱, aiʋlhpiesa kak o̱ ish yʋmihchikma, chi apaknʋchashke, achi tok.

Tutelonomi 4:40

Yʋmohmi hoka i̱ nanʋlhpisa bilia, micha im anumpa puta himak nitak a̱ chim anumpo̱honli li puta ka̱ ish ieshashke: yʋmohmi ho̱ chishno micha chim ʋlla ʋhleha et chi akaiya aiena kʋt chim achukma̱kʋt ma̱ha̱yashke; micha chin Chitokaka Chihowah yʋt yakni chima tok a̱ ish aiasha kʋt nitak ish falaiachi na, biliashke, achi tok.

Tutelonomi 5:29

Chu̱kʋsh ʋt yakohmi nukfoyuka tuk okbano, yohmi hosh a̱ nukwia cha, ʋm anumpa ʋlhpisa moma ka̱ ieshi na, bilia cha, yʋmma mihcha im ʋlla ʋhleha aiena kʋt im ai achukma na, biliakbano ahnit ʋm achi tok.

Tutelonomi 5:33

I̱ hina puta Chitokaka hʋchin Chihowah yʋt hʋchim api̱hi̱sa tuk mak o̱ hʋsh ai itanowa cha, hʋchi okcha̱yashke, micha hʋchim ai achukmashke, micha yakni hʋsh aiasha chi̱ ka̱, hʋsh aiasha kʋt nitak ʋt hʋchi̱ falaiashke, achi tok.

Tutelonomi 6:10

Atukma yakohma hi oke, Chitokaka chin Chihowah yʋt yakni ya̱ chi̱ki ʋhleha Eblaham, micha Aisak, micha Chekob aiena ka̱ anumpa il o̱nochit im issa tuk ʋt chisht onakmʋt, tʋmaha holihta ho chito, micha hochukma aiokli ish ikbi tok keyu yo̱,

Tutelonomi 6:19

Chihowah yʋt anumpuli tok mak osh, chin tʋnʋp ʋhleha moma ka̱ chi tikba akohchit kanchashke.

Tutelonomi 8:11

Ahah, ish ahni cha, chin Chitokaka Chihowah ya̱ im anumpa ʋlhpisa puta, micha im ai ʋlhpiesa yʋmi̱hinchi, micha i̱ nanʋlhpisa bilia, himak nitak a̱ chim anumpo̱honli li ka̱ chik ieshot ik chim a hakso kashke.