Tutelonomi 6:17 - Chahta Holisso Holitopa 1886

¹⁷ Hʋchin Chitokaka Chihowah im anumpa ʋlhpisa puta, micha i̱ nan isht atokoli puta micha i̱ nan ʋlhpisa bilia aiena chim anumpuli tuk a̱ achunanchi hosh hʋsh ieshashke.

Tutelonomi 6:17 Iomraidhean Croise

Atʋloa 119:2

Nan isht im ai ʋlhtukkoa putta ka̱ hulittobli, chu̱kʋsh ai oklu̱hʋt Chihowa ha̱ ho̱ho̱yo, nan ik ai ʋlhpeso ma̱ yohmi keyu, im ata̱ya puttah ʋpesa tok a̱ ai ittʋno̱ho̱wa yʋt na̱ yokpa yoke.

Atʋloa 119:4

Chishno ʋt chi̱ nan ʋlhpisa putta ka̱ hʋttak ʋt ʋcchukmalit hulittobla he ish ʋpesa tok oke.

Eksotʋs 15:26

Micha Hʋchin Chitokaka Chihowah im anumpa ha̱ achunanchit hʋsh i̱ haponaklo cha, itikba ya̱ ai ʋlhpiesa kak o̱ yʋmihinchit, im anumpa ʋlhpisa ha̱ hʋsh i̱ haponaklot, i̱ nanʋlhpisa puta ka̱ hʋsh holitoblikma ililli ilʋppa puta ka̱ Echip okla ha̱ onochi li tok ʋt hʋchi onochi la he keyu hoke; Chihowah sia hosh hʋchi hlakofichi li hoka, achi tok.

1 Kolinhlian 15:58

Yʋmohmi hoka itibapishi li a̱ holitopa ʋhleha ma! hʋsh kʋllo cha ik hʋchi fitekacho kish, ʋlhtoba iksho ka hi osh Chitokaka hʋsh in toksʋli keyu kʋt hʋsh ithaiyana hokʋt, Chitokaka im atoksʋli ya̱ lauachit hʋsh toksahanlashke.

Tutelonomi 11:13

Atukma yakohma hi oke, achunanchit ʋm anumpa himak nitak a̱ hʋchim anumpo̱honli li ka̱ hʋsh haiyaklo, hʋchin Chitokaka Chihowah ya̱ hʋsh holitobli, micha hʋchi chu̱kʋsh a̱ mominchit, micha hʋchimi shilombish ma mominchit hʋsh im antiakma,

Tutelonomi 11:22

Anumpa ilʋppa puta moma hʋchim anumpo̱honli li ka̱ achunanchit hʋsh ieshi cha, yʋmihchit hʋchin Chitokaka Chihowah ya̱ holitoblit, i̱ hina puta moma ka̱ ai itʋnowa cha, hʋsh im antiakma;

Tutelonomi 27:1

Micha Moses ʋt Islael im asʋnonchi ʋhleha aienʋt okla ha̱ im anumpulit, Anumpa moma himak nitak a̱ hʋchim anumpohonli li ka̱ hʋsh ieshashke.

Tutelonomi 5:1

Mihma Moses ʋt Islael moma ka̱ hoyo cha, Islael ma, nan ʋlhpisa bilia puta, micha aiʋlhpiesa yʋmi̱hinchi puta hʋsh ha̱klo ho̱, himak nitak a̱ anumpo̱honli li ka̱ hʋsh haklashke; yʋmohmi hosh hʋsh ithana cha, ieshit hʋsh yʋmi̱hinchashke.

Tutelonomi 5:29

Chu̱kʋsh ʋt yakohmi nukfoyuka tuk okbano, yohmi hosh a̱ nukwia cha, ʋm anumpa ʋlhpisa moma ka̱ ieshi na, bilia cha, yʋmma mihcha im ʋlla ʋhleha aiena kʋt im ai achukma na, biliakbano ahnit ʋm achi tok.

Tutelonomi 5:32

Yʋmohmi hoka, Chitokaka hʋchin Chihowah yʋt hʋchim apesa tuk mak o̱ hʋsh ithaiyana cha, hʋsh yʋmi̱hinchashke; fullotʋt naksika isht impakimma, micha ʋlhfʋbekimma pit hʋsh fullota he keyu hoke.

Titus 3:8

Anumpa ilʋppʋt ai a̱hli yoke, yohmi kʋt nana yʋmmak ash puta ka kʋllochi fehna hosh isht ish anumpohonla he chim ai ahni li; yohmi na Chihowa i̱ yimmi tok ʋhleha hʋt ahah! ahnit, nan toksʋli achukma puta ka achunanchit isht ahantashke. Nana ilʋppa puta kʋt achukma, micha hatak a̱ isht im achukma hoke.

Heblu 6:11

Mikmʋt ai okcha̱ya ishi la he ai ahnit, ai a̱hlit hʋchi yimmi hosh ont ai ʋhli ka hʋsh ona chi̱ kʋt, nana hʋsh a kaniohmi kash ot moyuma kʋt hʋsh achunancha he e hʋchim ai ahnishke.

2 Pita 3:14

Yʋmohmi ka a̱ holitopa ʋhleha ma! nana ilʋppa chiyuhmi puta ho̱ hʋsh hoho̱yo hokʋt, anumpa isht ai onʋtula he, micha na liteha aiena ik hʋchim iksho hosh hʋsh i̱ nanaiya ho̱, hʋsh im otaiyana hi ʋt hʋsh achunanchashke.