Tutelonomi 4:9 - Chahta Holisso Holitopa 1886

⁹ Peh ahah, hʋsh il ahni cha, hʋchimi shilombish a̱ achunanchit hʋsh ieshashke, keyukmʋt, nana puta hʋchi nishkin ʋt pi̱sa tuk ʋt hʋchim ahaksi ná, micha chi okcha̱ya nitak moma ka̱ hʋchi chu̱kʋsh a̱ akohchʋt kʋnia na: amba chiso puta, micha chiso ha̱ ushi puta ka̱ ish im abʋchashke.

Tutelonomi 4:9 Iomraidhean Croise

Genesis 18:19

Yʋmmak ash osh im ʋlla ʋhleha ha̱, micha in chuka achʋfa et iakaiya ka̱ im api̱hi̱sakma, Chihowah i̱ hina ya̱ holitoblit aiʋlhpiesa ai atokowa kak o̱ yʋmihcha hi ya̱ ithana lishke; yʋmohmi ho̱ Chihowah yʋt Eblaham a̱ isht anumpuli tuk ʋt im aia̱hlicha hi oke, achi tok.

Atʋloa 119:11

Ak chim ʋsshacho ka chi̱ kak osh, nan ish achi ya̱ sʋ chu̱kʋsh a fohkit ieshi lishke.

Atʋloa 71:18

Mikmʋt sipokni, pa̱shi tohbit taiyaha ka̱ ona lih kia, chik sʋ kancho ho̱, isht ai unchululi himmak minti ka̱ chish shakba yʋt na̱ yʋmi̱hi̱chi tuk a̱ im ʋnoli likmʋt, nan isht chim aia̱hlika ya̱ himak pillah aiyasha he moma ka̱ im ʋnoli lashke.

Eksotʋs 10:2

Micha Echip a̱ nana ayʋmihchi li tok, micha nan isht ʋm atokowa ya̱ im itin takla ayʋmihchi li tuk a̱, chiso ha̱ im anolit, ish haklocha he, mikma chiso hʋt ushi ya̱ haklocha he ak oke; yʋmohmi ka̱ ʋno ak osh Chihowah sia ka̱ isht hʋsh ithana he ak oke.

Eksotʋs 23:13

Nana moma hʋchim ahanchi li tuk a̱, ahah, hʋsh ai ahnashke; micha naholbʋt toba hohchifo ha̱ hʋchik anolo kashke, micha chitʋkha a kohcha na ik haklo kashke.

ʋBanumpa Luk Ʋt Holissochi Tok 8:18

Yohmi hoka nana ka hʋsh haklo kʋt, Ahah! hʋsh ahnashke; kʋna hosh i̱shi hokmak o̱, mihi yo̱ ima hi oke: mikmʋt kʋna hosh i̱shi keyu tuk mʋno, mihi yo̱ i̱shi ahomba tuk ash kia aieninchit im ai isha hi oke, achi tok.

Efeshan 6:4

Mikma i̱ki hʋchia hʋt hʋchim ʋlla ya̱ hʋch ik nokowʋcho kashke: amba Chitokaka yak o̱ anukfohkí, micha nan ai ahni yak o̱ a fohkit hʋsh hofantihinchashke.

Tutelonomi 11:19

Micha yʋmma hʋchim aboha hʋsh a binilikmʋt isht hʋsh anumpohonlashke; micha hina takla hʋsh a̱yakmʋt, hʋsh itoyulakmʋt, micha hʋsh wakayakmʋt, hʋchim ʋlla ʋhleha ha̱ hʋsh im aba̱hanchashke.

Tutelonomi 12:1

Nanʋlhpisa bilia, micha aiʋlhpiesa yʋmi̱hinchi ilʋppa puta ka̱ chi̱ki ʋhleha in Chitokaka Chihowah yʋt yakni ya̱ ish isha chi̱ ho̱ chima tok a̱ okcha̱yʋt yakni paknaka hʋsh a̱ha̱shwa nitak moma kʋt ithaiyanʋt hʋsh yʋmihchashke.

Tutelonomi 16:3

Pʋska shatʋmmi ya̱ aieninchit ish pa he keyu; nitak untuklo ho̱ pʋska ik shatʋmmo, ilbʋsha pʋska pulla ka̱ aieninchit ish pa hi oke; (anukwa̱ya hosh Echip yakni ya̱ kohchʋt ish minti tok okʋt:) yʋmohmi hosh chi okcha̱ya nitak moma kʋt Echip yakni ya̱ kohchʋt ish minti tok nitak a̱ ish ithaiyanashke.

Tutelonomi 17:19

Mikma iba itoyulashke, mihma okcha̱yʋt ahanta he nitak moma ka̱ yʋmma ai itim anumpo̱honlashke; yʋmohmi hosh Chitokaka in Chihowah ya̱ i̱ nukwia he, micha nan ʋlhpisa ilʋppa anumpa puta, micha anumpa ʋlhpisa bilia ilʋppa puta aiena ka̱ yʋmihincha chi̱ hosh ithaiya na hi oke.

Tutelonomi 29:29

Na luma puta hokʋt pin Chitokaka Chihowah immi hoke; amba nana ka̱ otʋnichi tok okʋto pishno, micha pim ʋlla ʋhleha aiena immi bilia he a tok; yʋmohmi hosh nan ʋlhpisa ilʋppa anumpa moma ka̱ e yʋmihcha chi̱ ha tok oke. (achi tok.)

Tutelonomi 31:19

Yʋmohmi hoka himak a̱ taloa ilʋppa ish holissochi cha, Islael im ʋlla ʋhleha ha̱ ish im abʋchashke; itih ho̱ ish fohkashke; yʋmohmi na, taloa ilʋppʋt Islael im ʋlla ʋhleha ha̱ i̱ sanalit a̱ witnes ak ashke.

Tutelonomi 32:46

Micha anumpa moma himak nitak a̱ hʋch iti takla ya̱ ai atokoli li ka̱ hʋchi chu̱kʋsh a̱ hʋsh onochashke, micha hʋchim ʋlla ʋhleha hʋt nan ʋlhpisa ilʋppa anumpa moma ka̱ ithanʋt yʋmihcha chi̱ ka̱ hʋsh i̱ mihashke.

Tutelonomi 4:10

Micha Holeb a̱ hʋchin Chitokaka Chihowah itikba ya̱ hʋsh hieli tok nitak fehna ka̱ hʋsh ithanashke; Chihowah yʋt ʋm achi mʋt, Okla ha̱ is sʋm ai itʋnahlashke, mikma ʋm anumpa ha̱ haklochi lashke, yohmi ho̱ nitak moma okcha̱yʋt yakni paknaka aiasha takla kʋt, a̱ nukwia he osh ithana cha, im ʋlla ʋhleha ha̱ im abʋchashke, achi tok.

Tutelonomi 4:15

Yʋmohmi hoka, ahah, hʋsh ibai ahni fehnashke; nitak yʋmma Chihowah yʋt Holeb a̱ luak iklʋnna ho̱ et hʋchim ai anumpuli ma, na holba nana kia hʋsh pi̱sa tok keyu hokʋt;

Tutelonomi 4:23

Ahah, hʋsh il ahnashke; keyukmʋt nan itim apesa yʋmma hʋchin Chitokaka Chihowah yʋt hʋch itim apesa tok a̱ hʋchim a haksi cha, tʋhlʋt na holbʋt toba, keyukmʋt nana kia holba yʋmma chin Chitokaka Chihowah yʋt hʋchim olʋbi tok a̱ hʋsh ikbi ná,

Tutelonomi 6:12

Yʋmohmikmʋt ahah, ish ahnashke, keyukmʋt Chihowah ak osh Echip yakni, micha aboha a yuka pehlichit chi kuchi tuk a̱ chim ahaksa hinla hoke.

Tutelonomi 6:2

Chitokaka hʋchin Chihowah ya̱ ish i̱ nukwia cha, i nan ʋlhpisa bilia moma ka̱, micha im anumpa chim anumpohonli li ka̱, chishno micha chiso, micha chiso ha̱ iso aiena kʋt chi okcha̱yʋt ish ahanta nitak moma kʋt ish ieshi cha, chi̱ nitak ʋt falaiashke.

Tutelonomi 6:20

Atuk o̱ nitak inla ʋla ha ya̱, chiso hʋt chim ponaklot, iban isht atokowa micha nan ʋlhpisa bilia, micha ai ʋlhpiesa yʋmi̱hinchi ilʋppa puta aiena pin Chitokaka Chihowah yʋt pim apesa tok, nanta ho̱ miha hoh cho? achikma,

Tutelonomi 6:7

Yohmi ka̱ chim ʋlla ʋhleha ha̱ achunanchit ish im abʋchashke; micha chin chuka ish binilikmʋt, micha hina takla ish ayakmʋt, micha ish itoyulakmʋt, micha ish wakayakmʋt isht ish anumpo̱honlashke.

Tutelonomi 8:11

Ahah, ish ahni cha, chin Chitokaka Chihowah ya̱ im anumpa ʋlhpisa puta, micha im ai ʋlhpiesa yʋmi̱hinchi, micha i̱ nanʋlhpisa bilia, himak nitak a̱ chim anumpo̱honli li ka̱ chik ieshot ik chim a hakso kashke.

Tutelonomi 8:14

Yʋmohmikmʋt chi chu̱kʋsh ilefehnʋchi cha, chin Chitokaka Chihowah yʋmmak osh Echip yakni akohchʋt aboha yuka ai ishit chi kohchi tuk, a̱ chim a haksa hi oke.

Heblu 2:1

Yohmi hoka nana e haiyaklo tuk puta kʋt ahah ahni fehna hosh il anukfihinla hetuk, e yʋmohmi keyukmʋt, nitak kanima ka pi̱ kʋnia hinla hoke.

Heblu 2:3

Ai‐okcha̱ya chinto yakohmi ka kil anukfihinlokmʋt, katiohmit pi hlakofa hinla cho? yʋmma ʋmmona ka Chitokaka yak osh isht anumpohonli tok o̱, anonti yʋmma i̱ haponaklo tok puta kʋt ai a̱hlichi mak osh pim anohonli tok:

Chemis 2:22

Yʋmmak okʋt nan ishi ahanta ka ai yimmika yokʋt kaniohmit ibai isht ahanta tok, micha nan isht ahanta pulla ho̱ ai yimmika yʋt isht ai a̱hlit kʋnia tok a̱ ish akostininchi cho?

Choshua 1:18

Kʋna hoh kia chi̱ nan ʋlhpisa ha̱ i̱ sanalit nana ish i̱ miha ka anumpa moma ik chi̱ haponaklokmʋt, illashke: peh kʋllot chim anukfila cha, nukwia ikshot ish amosholashke, im achi tok.

Choshua 23:11

Yʋmohmi hoka achukmalit ahah! hʋsh il ahni cha, Chihowa hʋchin Chitokaka ya̱ hʋsh holitoblashke.

Choshua 4:21

Yohmi cha Islael im ʋlla ʋhleha ha̱ im anumpulit, Himak a pilla ma hʋchim ʋlla ʋhleha hʋt i̱ki ʋhleha ha̱ i̱ ponaklot, Tʋli ilʋppʋt nanta ho̱ isht ʋlhpisa hoh cho? achi hokma,

Nan Otʋni 3:3

Yohmi kʋt nana ka ish ishi, micha ish haklo aiena tuk ʋt, ithaiyanʋt kʋllochit ish ieshi cha, ish ile kostininchashke. Amba ahah! chik il ai ahno hok mʋno, hu̱kopa nowʋt a̱ya ho̱ chohmi hosh ant chi̱ kohcha la chi̱; yohmi ka hʋshi kanʋlli nana ho̱ ant chi̱ kohcha la chi̱ ka ish ithana hi o̱ keyu hoke.

Nan Apesa 3:7

Micha Islael im ʋlla ʋhleha hʋt nana ik achukmo ka Chihowa itikba a yʋmohmi cha, Chihowa in Chitokaka ya̱ im a haksit Baalim, micha Ashtelah itatuklo ka aiokpʋchi tok.

Nan Apesa 8:34

Micha Islael im ʋlla ʋhleha hʋt Chihowa in Chitokaka yʋmmak osh in tʋnʋp ʋt apakfoyupa tuk ibbak a̱ ahlakofichit kohonchi tuk a̱ ik ithaiyano tok.