Tutelonomi 4:5 - Chahta Holisso Holitopa 1886

⁵ Yakeh, yakni yʋmma hʋsh ia kʋt, hʋsh binilikmʋt, hʋsh yʋmihcha chi̱ ho̱, an Chitokaka Chihowah yʋt ʋm apesa tuk mak o̱, chohmit, nan ʋlhpisa, micha aiʋlhpiesa yʋmihchi puta ka̱ hʋchim abʋchi li tuk oke.

Tutelonomi 4:5 Iomraidhean Croise

Atʋloa 71:17

Chitokaka ma, sʋ hemi̱tta tok ai ʋlhit mi̱hi̱ti ka̱ nan is sʋm aba̱ha̱chi na ant himmʋkka ho̱ nanah a fehna ish yʋmi̱hi̱chi ka̱ ʋno̱ho̱li lih chatuk oke.

Eksotʋs 18:20

Micha nana akaniohma he nanʋlhpisa, micha hina ataya he micha natoksʋli ya̱ yʋmihcha he aiena kak o̱ ish im abʋchashke.

Lefitikʋs 19:19

A̱ nanʋlhpisa ha̱ hʋsh holitoblashke. Chi̱ nan ʋlhpoa ya̱ ilaiyukalichit ish itim ai ikbicha he keyu hoke: Chim osapa ya̱ na nihi itaiyoma yo̱ ish ahokcha he keyu hoke: micha linen micha chukfi hishi itaiyoma nafohka ya̱ ish foyuka he keyu hoke.

Lefitikʋs 26:46

Nana ʋlhpisa ilʋppa puta, micha ai ʋlhpesa yʋmihchi, micha nanʋlhpisa ilʋppa puta kak o̱ Chihowah yʋt Moses a̱ tohnot Sinai nʋnih ha̱ Islael im ʋlla ʋhleha ha̱ ai itim apesa tok oke.

Lefitikʋs 27:34

Nan ʋlhpisa ilʋppa puta kak o̱ Islael im ʋlla ʋhleha i̱ nan ʋlhpisa ha chi̱ ka̱ Sinai nʋnih ha̱ Chihowah yʋt Moses a̱ ai im apesa tok oke.

Lefitikʋs 7:38

Chihowah yʋt Moses a̱ Sainai nʋnih ha̱, Islael im ʋlla ʋhleha hʋt Chihowah ya̱ nan im issa chi̱ ho̱ i̱ miha nitak mʋt Sainai yakni haiaka ya̱ ai im apesa tok mak oke.

Mahlu 28:20

Nan oklu̱ha ka nana ho̱ hʋchim apesa li tuk a̱ holitobla he mak o̱ hʋsh im abahanchashke: yohmikma yakeh! ʋno ʋt hʋchi awant a̱ya li̱ bilia ho̱, yakni ʋt ont ai ʋhla hi oke, achi tok oke. Amen.

Apostel isht Anumpa 20:27

Ʋno ʋt Chihowa im anukfila puyuta ka hʋchim anoli ka, sa nukwa̱ya iksho chatuk okʋt.

1 Kolinhlian 11:28

Yohmi ka hatak okʋt anukfillit ik ile pisá: yʋmohmi cha mihi yosh pʋska yash ik pá, mikmʋt isht ishko yash ik ai ishkó.

1 Kolinhlian 15:3

Holisso Holitopa nana achi tok mak o̱ nana pim ai ashʋchika puta kak o̱ Klaist ʋt kaniohmit isht ai illi; yohmi cha yʋmmak ash ot hollopi tuk osh, anonti nitak ont atuchina ma Holisso Holitopa nana achi tok mak o̱ yʋmmak ash ot anonti tani tok, yʋmmak o̱ ʋno ak kia si anukfoyuka hatuk osh, mihi yo̱ tikbanli hʋchim anohonli li tuk oke.

Tutelonomi 11:32

Mikmʋt nan ʋlhpisa bilia moma, micha ai ʋlhpiesa yʋmihinchi himak nitak a̱ hʋchi tikba ya̱ takalichi ka̱ ithaiyanʋt hʋsh yʋmihchashke.

Tutelonomi 4:1

Yʋmohmi hoka Islael ma, himak a̱ nan ʋlhpisa, micha aiʋlhpiesa yʋmihinchi hʋchim abʋchi li ka̱ hʋsh yʋmihcha chi̱ kʋt, hʋsh haklashke; yʋmohmi hosh hʋchi okcha̱ya cha, hʋchi̱ki ʋhleha in Chitokaka Chihowah yʋt yakni chima tok a̱ chukowʋt hʋsh a binilashke.

Tutelonomi 4:2

Anumpa hʋchim apesa li tuk a̱ hʋsh ibafohka he keyu, micha hʋsh ola taklʋcha he keyu; yʋmohmi hosh hʋchin Chitokaka Chihowah i̱ nan ʋlhpisa puta hʋchim apesa li tuk a̱ hʋsh holitoblashke.

Tutelonomi 4:4

Amba hʋchin Chitokaka Chihowah ya̱ hʋsh asitia tok ʋto hʋsh moyuma kʋt himak nitak a̱ hʋchi okcha̱yʋshke.

Tutelonomi 4:40

Yʋmohmi hoka i̱ nanʋlhpisa bilia, micha im anumpa puta himak nitak a̱ chim anumpo̱honli li puta ka̱ ish ieshashke: yʋmohmi ho̱ chishno micha chim ʋlla ʋhleha et chi akaiya aiena kʋt chim achukma̱kʋt ma̱ha̱yashke; micha chin Chitokaka Chihowah yʋt yakni chima tok a̱ ish aiasha kʋt nitak ish falaiachi na, biliashke, achi tok.

Tutelonomi 5:1

Mihma Moses ʋt Islael moma ka̱ hoyo cha, Islael ma, nan ʋlhpisa bilia puta, micha aiʋlhpiesa yʋmi̱hinchi puta hʋsh ha̱klo ho̱, himak nitak a̱ anumpo̱honli li ka̱ hʋsh haklashke; yʋmohmi hosh hʋsh ithana cha, ieshit hʋsh yʋmi̱hinchashke.

Tutelonomi 6:1

Yohmi ka̱ anumpa puta, micha nan ʋlhpisa bilia puta, micha ai ʋlhpiesa yʋmi̱hinchi ilʋppa puta hʋchim ʋlbʋcha he, Chitokaka hʋchin Chihowah yʋt anumpo̱honli na, yakni hʋsh aiasha chi̱ hosh hʋsh ia kʋt hʋsh a yʋmi̱hincha chi̱ kak a tok oke.

Tutelonomi 7:11

Yʋmohmi hoka anumpa ʋlhpisa puta, nan ʋlhpisa bilia, ai ʋlhpiesa yʋmihinchi, himak nitak a̱ chi̱ miha li ka̱ ish ieshi cha, ish yʋmi̱hinchashke.

Tutelonomi 8:11

Ahah, ish ahni cha, chin Chitokaka Chihowah ya̱ im anumpa ʋlhpisa puta, micha im ai ʋlhpiesa yʋmi̱hinchi, micha i̱ nanʋlhpisa bilia, himak nitak a̱ chim anumpo̱honli li ka̱ chik ieshot ik chim a hakso kashke.

Heblu 3:5

Yohmi ka tishu ho̱ chiyuhmit Moses ʋt ilap in chuka ai achʋfa moyuma ka im ai a̱hli bano kʋt, nana isht anuhumpa he mak o̱ atokolit anohonli tok: