Tutelonomi 4:40 - Chahta Holisso Holitopa 1886

⁴⁰ Yʋmohmi hoka i̱ nanʋlhpisa bilia, micha im anumpa puta himak nitak a̱ chim anumpo̱honli li puta ka̱ ish ieshashke: yʋmohmi ho̱ chishno micha chim ʋlla ʋhleha et chi akaiya aiena kʋt chim achukma̱kʋt ma̱ha̱yashke; micha chin Chitokaka Chihowah yʋt yakni chima tok a̱ ish aiasha kʋt nitak ish falaiachi na, biliashke, achi tok.

Tutelonomi 4:40 Iomraidhean Croise

Atʋloa 105:45

Yohmi ka̱ im ʋnnumpah ʋlhpisa putta ka̱ hulittobli cha, i̱ nan ʋlhpisa putta ka̱ hulittoblit iesha chi̱ kak ʋttok oke. Chihowa ha̱ hu holittoblichíh.

Eksotʋs 20:12

Chi̱ki, micha chishki ya̱ ish holitoblashke; yʋmohmi hosh chi̱ nitak ʋt falaia hosh yakni ya̱ Chihowah chin Chitokaka yʋt chima tok a̱ ish aiahantashke.

Eksotʋs 23:26

Nana kia hʋchi̱ yakni a̱sha kʋt ushi kanchi, micha ushi iksho kʋt iksho ka hi oke, chi̱ nitak holhtina ka̱ onanchi la hi oke.

Lefitikʋs 22:31

Yʋmohmi hoka ʋm anumpa ʋlhpisa ha̱ hʋsh holitobli cha, hʋsh yʋmihcha hi oke; Chihowah sia hoke.

Numbas 10:29

Mihma Moses ʋt Lekuel ushi Hobab Mitianait Moses ipochi yash, Yakni yʋmma Chihowah yʋt chima lashke, achi tok a̱ ia hosh il itʋnowa; pi awant ish iakma, nana achukma ka̱ e chi yʋmihchashke; Chihowah yʋt Islael pulla ka̱ achukma ho̱ anumpuli tuk oka, im achi tok.

Chan 14:15

Hʋs sa̱ hullo hokmʋt, ʋm anumpa ʋlhpisa puta ka hʋsh holitoblashke.

Efeshan 6:3

Yohmi hosh chim achukmʋt hopaki ho̱ yakni paknaka ish ai ahantashke.

Tutelonomi 11:9

Yʋmohmi hosh Chihowah yʋt hʋchi̱ki ʋhleha, micha im isht atiaka aiena ka̱ ima chi̱ hosh, anumpa kʋllo im ilonochi tok a̱ nitak hʋchi̱ falaia yakni yash pishukchi, micha foe bila ayana̱hanli yakni ya̱ hʋsh ai aha̱shwashke.

Tutelonomi 12:25

Ish pa he keyu hoke; yʋmohmi hosh Chihowah itikba ya̱ aiʋlhpiesa ho̱ ish yʋmohmikmʋt, chishno, micha chim ʋlla ʋhleha et chi akaiya aiena kʋt chim achukmashke.

Tutelonomi 12:28

Yohmi ahnit ish anukfilli cha, anumpa ilʋppa moma chi̱ miha li ka̱ ish haklashke; yʋmohmi hosh chishno, micha chim ʋlla chi akaiya aiena kʋt chin Chitokaka Chihowah itikba ya̱ achukma ho̱ micha ai ʋlhpiesa ho̱ ish yʋmihchikmʋt achukma hosh ish ma̱ha̱ya na biliashke.

Tutelonomi 22:7

Amba ik kaniohmi kia ishki ya̱ ish hikʋchi cha, ushi ya̱ ish isha hi oke: yʋmohmi hosh chim achukma cha, chi̱ nitak a̱ ish falaiachashke.

Tutelonomi 25:15

Amba nan isht weki a̱hli, micha aiʋlhpiesa yo̱, micha nan isht ʋlhpisa a̱hli, micha aiʋlhpiesa yosh chim aiashashke, micha yʋmohmi hosh nitak chi̱ falaiʋt chin Chitokaka Chihowah yʋt yakni chima tok a̱ hʋsh aiashashke.

Tutelonomi 32:47

Nan ik ahobo hʋchi̱ nana keyu hoka; hʋchim ilhfiopak okʋt; nana ilʋppak o̱ yakni hʋsh isha chi hosh Chatan hʋsh hlopullit, yʋmma hʋsh ia kʋt nitak ishit hʋchi̱ falaia chi̱ hoke, achi tok.

Tutelonomi 33:25

Chi̱ shulush ʋt tʋli, micha asonak lakna yashke; chim i̱ hlampko ʋt chi̱ nitak puta ka̱ chohmashke.

Tutelonomi 4:1

Yʋmohmi hoka Islael ma, himak a̱ nan ʋlhpisa, micha aiʋlhpiesa yʋmihinchi hʋchim abʋchi li ka̱ hʋsh yʋmihcha chi̱ kʋt, hʋsh haklashke; yʋmohmi hosh hʋchi okcha̱ya cha, hʋchi̱ki ʋhleha in Chitokaka Chihowah yʋt yakni chima tok a̱ chukowʋt hʋsh a binilashke.

Tutelonomi 4:2

Anumpa hʋchim apesa li tuk a̱ hʋsh ibafohka he keyu, micha hʋsh ola taklʋcha he keyu; yʋmohmi hosh hʋchin Chitokaka Chihowah i̱ nan ʋlhpisa puta hʋchim apesa li tuk a̱ hʋsh holitoblashke.

Tutelonomi 4:5

Yakeh, yakni yʋmma hʋsh ia kʋt, hʋsh binilikmʋt, hʋsh yʋmihcha chi̱ ho̱, an Chitokaka Chihowah yʋt ʋm apesa tuk mak o̱, chohmit, nan ʋlhpisa, micha aiʋlhpiesa yʋmihchi puta ka̱ hʋchim abʋchi li tuk oke.

Tutelonomi 4:6

Yʋmohmi hoka hʋsh holitobli cha, hʋsh yʋmihchashke; ilʋppak osh oklushi puta nan ʋlhpisa ilʋppa haha̱klokmʋt, Oklushi chito ilʋppʋt okla hopoyuksa, micha nan ithana a̱hli yoke, chi acha he, itikba ya̱ hʋsh apoyuksa, micha na hʋsh ithaiyana hokʋt.

Tutelonomi 5:10

Micha tahlepa sipokni hoh kia sa holitobli cha, ʋm anumpa ha̱ ʋm anti̱hi̱ya ya̱ i̱ nukha̱klo li hoke.

Tutelonomi 5:16

Chitokaka chin Chihowah yʋt chim achi tuk mak o̱, chi̱ki, micha chishki ya̱ ish holitoblashke; yʋmohmi ho̱ yakni Chitokaka chin Chihowah yʋt chima tok a̱ ish aiahanta he a̱ nitak ʋt chin lauashke, micha chim ai achukma̱kashke.

Tutelonomi 5:29

Chu̱kʋsh ʋt yakohmi nukfoyuka tuk okbano, yohmi hosh a̱ nukwia cha, ʋm anumpa ʋlhpisa moma ka̱ ieshi na, bilia cha, yʋmma mihcha im ʋlla ʋhleha aiena kʋt im ai achukma na, biliakbano ahnit ʋm achi tok.

Tutelonomi 5:33

I̱ hina puta Chitokaka hʋchin Chihowah yʋt hʋchim api̱hi̱sa tuk mak o̱ hʋsh ai itanowa cha, hʋchi okcha̱yashke, micha hʋchim ai achukmashke, micha yakni hʋsh aiasha chi̱ ka̱, hʋsh aiasha kʋt nitak ʋt hʋchi̱ falaiashke, achi tok.

Tutelonomi 6:18

Micha Chihowah itikba ya̱ nana ai ʋlhpiesa micha achukma kak o̱ ish yʋmihchashke; yohmi hosh hʋchim achukma̱kashke, micha yohmi hosh Chihowah yʋt chi̱ki ʋhleha ha̱ anumpa kʋllo ilonochit im issa tok yakni achukma ya̱ chukowʋt ish abinilashke,

Tutelonomi 6:3

Yʋmohmi hoka Islael ma, ish haiyaklashke, micha ithaiyanʋt, ish yʋmihchashke; yʋmohmi hosh chi̱ki ʋhleha ha̱ in Chitokaka Chihowah yʋt achit, im issa tok mak o̱, yakni pishukchi micha foebila ayanahanli ya̱ aiasha apaknʋt isht i̱ shahli fehnʋt hʋsh ma̱ha̱yashke.

1 Timohli 4:8

Haknip nan isht ʋtta isht ai achukma hokʋto mishema he keyu hoke: amba Chihowa holitobli nana moma ka isht im ai achukma kʋt, yakni paknaka nan ai isht ai yukpa, micha yakni inla ʋla he mihinti ita tuklo ka isht ai yukpa he im issa hoke.