Tutelonomi 4:2 - Chahta Holisso Holitopa 1886

² Anumpa hʋchim apesa li tuk a̱ hʋsh ibafohka he keyu, micha hʋsh ola taklʋcha he keyu; yʋmohmi hosh hʋchin Chitokaka Chihowah i̱ nan ʋlhpisa puta hʋchim apesa li tuk a̱ hʋsh holitoblashke.

Tutelonomi 4:2 Iomraidhean Croise

Atʋloa 78:7

Micha Chitokaka yak o̱ anukchieto cha, Chitokaka na̱ yʋmi̱hi̱chi tok a̱ ik im ʋhakso hosh, im ʋnnumpah ʋlhpisa putta ka̱ hulittoblit iesha he,

Mahlu 5:18

A̱hli mak o̱ hʋchi̱ miha lishke, Yakni, mikmʋt ʋba shutik aiena hokʋto ont ik ai iksho kia, ʋba nan ʋlhpisa yʋt moma ont ik a lauwo achʋfona nana kia a kaniohmit aiokpuloka iksho mak osh, mo̱mʋt ont aia̱hla he mak oke.

Mahlu 5:43

Chin chukapanta hatak a̱ ish i̱ hullo cha, chin tʋnʋp okʋno ish i̱ nukkillashke; achi tok a̱ hʋsh ha̱klo chatuk.

Kaleshan 3:15

Itibapishi li ʋhleha ma! hatak nana a kaniohmi yo̱ anumpuli lishke: peh hatak nana it im ʋlhpisa yoh kia kʋllochi hama, hatak kʋna hosh akshochi, micha ibafohka he keyu.

Tutelonomi 1:3

Atuk o̱ yakohmi tok; afʋmmi ont ishit pokoli ushta, hʋshi ont ishit auahachʋfa, nitak ʋmmona ma, Moses ʋt Islael im ʋlla ʋhleha ha̱, Chihowah yʋt nanʋlhpisa imma ima tuk mak o̱, moma ka̱ im anumpuli tok.

Tutelonomi 12:32

Nana ho̱ hʋchim ahanchi li tukma, ithaiyanʋt ish yʋmihchashke: ish iba fohka he keyu, micha ish ola taklʋcha he keyu hoke, achi tok.

Tutelonomi 13:1

Hʋchim ai iti takla hopaii yosh, keyukmʋt, na holhpokuna ya̱ holhpokuna yosh wakayʋt hikia cha, nan isht atokowa, keyukmʋt, na fehna yo̱ chi̱ haiakʋchikma,

Tutelonomi 33:4

Moses ʋt nan ʋlhpisa pim apesa tok, Chekob okla moma immi ha chi̱ im aiʋlhpiesa.

Tutelonomi 4:14

Mihma nitak yʋmma nan ʋlhpisa, micha aiʋlhpesa yʋmihinchi ya̱ yakni yʋmma onʋt hʋsh a binilikmʋt hʋsh yʋmihcha he yo̱ hʋchim abʋchi la chi̱ ka̱, Chihowah yʋt ʋm apesa tok.

Tutelonomi 4:40

Yʋmohmi hoka i̱ nanʋlhpisa bilia, micha im anumpa puta himak nitak a̱ chim anumpo̱honli li puta ka̱ ish ieshashke: yʋmohmi ho̱ chishno micha chim ʋlla ʋhleha et chi akaiya aiena kʋt chim achukma̱kʋt ma̱ha̱yashke; micha chin Chitokaka Chihowah yʋt yakni chima tok a̱ ish aiasha kʋt nitak ish falaiachi na, biliashke, achi tok.

Tutelonomi 4:5

Yakeh, yakni yʋmma hʋsh ia kʋt, hʋsh binilikmʋt, hʋsh yʋmihcha chi̱ ho̱, an Chitokaka Chihowah yʋt ʋm apesa tuk mak o̱, chohmit, nan ʋlhpisa, micha aiʋlhpiesa yʋmihchi puta ka̱ hʋchim abʋchi li tuk oke.

Tutelonomi 5:29

Chu̱kʋsh ʋt yakohmi nukfoyuka tuk okbano, yohmi hosh a̱ nukwia cha, ʋm anumpa ʋlhpisa moma ka̱ ieshi na, bilia cha, yʋmma mihcha im ʋlla ʋhleha aiena kʋt im ai achukma na, biliakbano ahnit ʋm achi tok.

Tutelonomi 5:32

Yʋmohmi hoka, Chitokaka hʋchin Chihowah yʋt hʋchim apesa tuk mak o̱ hʋsh ithaiyana cha, hʋsh yʋmi̱hinchashke; fullotʋt naksika isht impakimma, micha ʋlhfʋbekimma pit hʋsh fullota he keyu hoke.

Choshua 1:7

Peh kʋllot chim anukfila cha, nukwia ikshot ish amosholi fehnashke; yohmi hosh nan ʋlhpisa moma an tishu Moses ʋt chim apihi̱sa tok a̱ ahah! ahnit ish holitoblashke; ilʋppa isht impak imma hokmá, ʋlhfʋbekimma hokmá nana kia chik i̱ filʋmmo kashke; chi yʋmohmi pulla hosh kanima ish a̱ya puta kʋt chim ai achukma hi oke.

Choshua 8:35

Islael okla moyuma, ohoyo, ʋlla chipunta, micha hatak inla yʋt yʋmma iba takla ma̱ya hatuk aiena itikba ya̱ Choshua ʋt, Moses ʋt nana im apihi̱sa tok moyuma ka anumpa achʋfa kia ik ai it im anumpulo ka iksho ki tok.