Tutelonomi 28:12 - Chahta Holisso Holitopa 1886

¹² Chihowah yʋt im ʋlhpoyak achukma ʋba ya̱ chin tiwi cha, ont ai ʋlhpiesakma, yakni ya̱ chim umbʋcha he, micha chibbak nan toksa̱hanli tuk moma ka̱ na chi yukpala hi oke; mikma oklushi laua ka̱ ish impota cha, chishno chik poto ka hi oke.

Tutelonomi 28:12 Iomraidhean Croise

1 Mi̱ko 18:1

Atuk o̱ nitak laua haya̱ yakohmi tok, afʋmmi ont isht atuchina ma, Chihowa im anumpa hʋt Elichah ya̱ im ʋla mʋt, Iá, Ahab a̱ ont ish im ile haiakʋchashke; mikma yakni ya̱ umba et onochi lashke, achi tok.

Atʋloa 135:7

Yakni ont atahaka ya̱ oktohbi ʋba iachi hosh, umba ha̱ hʋsshukmʋlli im ikbi hoke; mahli ha̱ nan im aiasha puttah a kucchi hoke.

Lefitikʋs 26:4

Yohmikma ont aiʋlhpiesakma, umba ka̱ hʋch i̱hi̱ma la hi oke, mikma yakni ʋt na waya ha̱ hʋchi̱ waya hi oke; mikma kowi iti hikia kʋt ʋnit hʋchi̱ waya hi oke.

Tutelonomi 11:14

Yʋmohmikma hʋchi̱ yakni im umba ont ai ʋlhpiesakma, ʋmmona umba, micha ont ishtaiopi umba ya̱ hʋchima la hi oke; mikma hʋchim onush, micha hʋchim okapa̱ki, micha hʋchi̱ bila aiena ka̱ hoyot hʋsh ashacha hi oke.

Tutelonomi 14:29

Mikma Lefait ʋt (yʋmmʋt i̱ kashapa, micha ai isha he ʋlhpesa yʋt chiba fo̱kʋt ik im iksho hokʋt) micha okla inla, micha i̱ki iksho, micha i̱ hatak illi, chi̱ holihta okhissa anu̱kaka aiasha aiena kʋt ʋla cha, ʋpʋt fihopashke; yʋmohmi ho̱ chin Chitokaka Chihowah yʋt chibbak na toksa̱hanli moma isht ish ahanta ka̱ chi yukpalashke, achi tok.

Tutelonomi 15:10

Ish ima pulla hi oke, micha ish emakmʋt, chi chu̱kʋsh ʋt nukha̱kla he keyu: nana ilʋppa pulla kak o̱, nan ish toksʋli puta moma, micha nana moma ho̱ chibbak isht ish ishikma chin Chitokaka Chihowah yʋt na chi yukpala hi oke.

Tutelonomi 15:6

Chin Chitokaka Chihowah yʋt chim achi tuk mak osh, chi yukpali hoka: mikma oklushi laua ho̱ ish impota hi oke; yohmi kia chishno ʋto ish pota he keyu, micha oklushi laua ho̱ ish i̱ mi̱ka hi oke; amba chishno ano chi̱ mi̱ka he keyu.

Tutelonomi 23:20

Okla inla hano impotʋt ish chelicha hinla hoke: amba chitibapishi hano impotʋt ish chelicha he keyu: yʋmohmi ho̱ yakni ish isha chi̱ hosh ishia kʋt yʋmma ish ai ashʋt nana ho chibbak isht ish ishi moma ka̱ chin Chitokaka Chihowah yʋt na chiyukpalashke.

Tutelonomi 28:24

Chihowah yʋt chi̱ yakni ai umba ka̱ hituk micha lukfi pushi chohmicha hi oke; ʋba ya̱ mintit chi onʋtohonlakma chi taha hi oke,

Tutelonomi 28:44

Chimpota hi oke, mikma ish impota he keyu hoke: noshkobo ya hi oke, mihma chishno ʋto hasimbish chia ya hi oke