Tutelonomi 26:14 - Chahta Holisso Holitopa 1886

¹⁴ Ya̱ya li moma kʋt ak po tuk oke; micha nana achʋfa kia na liteha isht ikbi li tuk keyu, micha nana achʋfa kia illi ya̱ ima li tuk keyu hoke; amba an Chitokaka Chihowah im anumpa ha̱ haiyaklo li mʋt, nana is sʋm apesa tuk moma ka̱ yʋmihchi li tuk oke.

Tutelonomi 26:14 Iomraidhean Croise

Atʋloa 106:28

Atuk o̱ Baal Peo ya̱ oklah ibʋlhtoh mʋt, nan okcha̱ya keyu putta ka̱ im issʋt isht ayokpʋchi tuk a̱ oklah a̱ha̱pa tok.

Atʋloa 18:22

Nanah ai ʋpehi̱sa moma kʋt sʋ tikba aiyashah ma̱, i̱ nan ʋlhpisa putta hokʋno a̱ filʋmmichit naksika bohli la he keyu kak oke.

Lefitikʋs 21:1

Micha Chihowah yʋt Moses a̱ im anumpulit, Na holitompa isht a̱sha Alon ushi ʋhleha ha̱ im anumpulit, Kanima kia im okla ai illi ya̱ ishit liteha he keyu.

Lefitikʋs 21:11

Micha haknip illi ya̱ iba chukowa he keyu, micha i̱ki, keyukmʋt ishki yatuk ok mak o̱ ile litehla he keyu hoke.

Lefitikʋs 7:20

Amba shilombish nana hosh im a liteha yʋt onʋtonla hosh, ʋbit im issa itin nanaiyʋchi im issa Chihowah immi ho̱ ʋpakmʋt, shilombish yʋmmak kia im okla ha̱ ai i̱ filʋmmit fiopa tʋpa hi oke.

Tutelonomi 13:5

Mikma hopaii yʋmmʋt, micha holhpokuna holhpokuna yʋmmʋt illashke; hʋchin Chitokaka Chihowah yʋmmak osh Echip yakni ya̱ apehlichit hʋchi kohchi tok; micha yʋmmak osh aboha ayuka ha̱ a hʋchi hlakofichi tok a̱, i̱ filʋmmichit hʋchisht ia chi̱ hosh, hina hʋsh ai itʋnowa chi̱ ho̱ hʋchin Chitokaka Chihowah yʋt hʋchi̱ miha tok a̱ naksika pit hʋchi tobli bʋnna hosh anumpuli ha tuk oka. Yʋmohmi hosh hʋchim ai iti takla ya̱ nan ik achukmo ka̱ isht hʋsh kanchashke.

Tutelonomi 15:5

Peh chin Chitokaka Chihowah im anumpa achukmalit haponaklot, anumpa ilʋppa puta moma himak nitak a̱ chim anumpo̱honli li ka̱ ithaiyanʋt ish yʋmihchikma.

Tutelonomi 16:11

Micha chin Chitokaka Chihowah itikba ya̱, chishno micha chiso, micha chiso tek, micha chin tishu hatak, micha chin tishu ohoyo, micha Lefait ʋt chi̱ holihta okhissa anu̱ka aiasha, micha okla inla, micha i̱ki iksho, micha ohoyo ʋlhtakla hʋch iti̱n takla aiasha aiena kʋt, kanima ho̱ chin Chitokaka Chihowah yʋt hohchifo a bohla chi̱ hosh ai atokoli tukma, yʋmma a yukpʋt ish aiashashke.

Tutelonomi 26:13

Yohmikmʋt chin Chitokaka Chihowah itikba ya̱, Na hullochi yash an chuka ya̱ ishit kohcha lishke, micha chim anumpa moma is sʋm api̱hi̱sa tuk mak o̱, Lefait, micha okla inla, ʋlla i̱ki illi, micha ohoyo ʋlhtakla aiena ka̱ ima lishke; chim anumpa ha̱ ak ʋbanʋbloshke, micha ik sʋmahakoshke,

Tutelonomi 26:15

Ish aiahanta holitopa, ʋba aholitopa ya̱ binilit aka et ish hopo̱koyashke, micha chim okla Islael, micha yakni ilʋppa pi̱ki ʋhleha ha̱ anumpa kʋllo ish im ilonochi tok mak osh, yakni pishukchi micha foe‐bila aiena kʋt ayanahanli ya̱ ish pima tok ʋt na yukpali ish onochashke, ish achashke.