Tutelonomi 2:29 - Chahta Holisso Holitopa 1886

²⁹ (Esau im ʋlla ʋhleha, yʋmmʋt Sei aiasha kʋt, micha Moabait ʋhleha Ah aiasha kʋt si yʋmihchi tuk oka;) yʋmohmi na, Chatan a hlopullit pin Chitokaka Chihowah yʋt yakni pima tok a̱ ona lashke, achi li tok.

Tutelonomi 2:29 Iomraidhean Croise

Genesis 19:37

Atuk osh akni hʋt ʋlla nakni yo̱ sholi cha, hohchifo ka̱ Moab achi tok: mihi yosh Moabait okla ha̱ i̱ki yosh himak nitak a̱ ant ai ʋhli hoke.

Eksotʋs 20:12

Chi̱ki, micha chishki ya̱ ish holitoblashke; yʋmohmi hosh chi̱ nitak ʋt falaia hosh yakni ya̱ Chihowah chin Chitokaka yʋt chima tok a̱ ish aiahantashke.

Numbas 20:18

Mihma Etom ʋt, A̱ bili̱ka ont hʋsh ia he keyu, yohmikma bʋshpo falaia isht hʋchi afama la chi̱ hoke, achi tok.

Tutelonomi 1:8

Yakeh, yakni ya̱ hʋchi tikba talali lishke; chukowʋt yakni ya̱ Chihowah yʋt hʋchi̱ki ʋhleha Eblaham, micha Aisaak, micha Chekob, micha im ishtiaka iakaiyʋt mihinti aiena ka̱ anumpa kʋllo anumpulit, ima tok a̱ hʋsh ishashke, achi tok oke, achi tok.

Tutelonomi 2:9

Mihma Chihowah yʋt ʋm achi mʋt, Moabait ʋhleha ha̱ ish ilbʋshali na, micha in tanampi hosh ish itibi na: chi̱ yakni ya chi̱ ho̱, i̱ yakni a̱ chima la he keyu hoka; Lot im ʋlla ʋhleha hʋt i̱ yakni ya chi̱ ho̱ Ah ya̱ ima li tuk oka.

Tutelonomi 23:5

Yohmi kia chin Chitokaka Chihowah yʋt Balaam a̱ i̱ haponakla he keyu tok; amba chin Chitokaka Chihowah yʋt chi holitobli hatuk okʋt anumpa hallakshichi yash filimmit na yukpali chim ikbi tok.

Tutelonomi 25:15

Amba nan isht weki a̱hli, micha aiʋlhpiesa yo̱, micha nan isht ʋlhpisa a̱hli, micha aiʋlhpiesa yosh chim aiashashke, micha yʋmohmi hosh nitak chi̱ falaiʋt chin Chitokaka Chihowah yʋt yakni chima tok a̱ hʋsh aiashashke.

Tutelonomi 4:1

Yʋmohmi hoka Islael ma, himak a̱ nan ʋlhpisa, micha aiʋlhpiesa yʋmihinchi hʋchim abʋchi li ka̱ hʋsh yʋmihcha chi̱ kʋt, hʋsh haklashke; yʋmohmi hosh hʋchi okcha̱ya cha, hʋchi̱ki ʋhleha in Chitokaka Chihowah yʋt yakni chima tok a̱ chukowʋt hʋsh a binilashke.

Tutelonomi 4:21

Micha Chihowah yʋt hʋchishno ak a tuk pulla mak o̱, a̱ nukhobela cha, anumpa kʋllo anumpulit, Chatan a̱ ak hlopullo ka he, micha yakni achukma yʋmma hʋchi̱ yakni ya̱ chi̱ ho̱ chin Chitokaka Chihowah yʋt hʋchima tok a̱ ak chukowo ka chi̱ miha tok,

Tutelonomi 4:40

Yʋmohmi hoka i̱ nanʋlhpisa bilia, micha im anumpa puta himak nitak a̱ chim anumpo̱honli li puta ka̱ ish ieshashke: yʋmohmi ho̱ chishno micha chim ʋlla ʋhleha et chi akaiya aiena kʋt chim achukma̱kʋt ma̱ha̱yashke; micha chin Chitokaka Chihowah yʋt yakni chima tok a̱ ish aiasha kʋt nitak ish falaiachi na, biliashke, achi tok.

Tutelonomi 5:16

Chitokaka chin Chihowah yʋt chim achi tuk mak o̱, chi̱ki, micha chishki ya̱ ish holitoblashke; yʋmohmi ho̱ yakni Chitokaka chin Chihowah yʋt chima tok a̱ ish aiahanta he a̱ nitak ʋt chin lauashke, micha chim ai achukma̱kashke.

Tutelonomi 9:6

Yʋmohmi hoka chin Chitokaka Chihowah yʋt yakni achukma ilʋppa ish a binila chi̱ ho̱ chima kʋt, chi ai ʋlhpiesa kak o̱ keyu ka̱ ish ithaiyanashke; okla ikunla kʋllo chia hoka.