Tutelonomi 15:10 - Chahta Holisso Holitopa 1886

¹⁰ Ish ima pulla hi oke, micha ish emakmʋt, chi chu̱kʋsh ʋt nukha̱kla he keyu: nana ilʋppa pulla kak o̱, nan ish toksʋli puta moma, micha nana moma ho̱ chibbak isht ish ishikma chin Chitokaka Chihowah yʋt na chi yukpala hi oke.

Tutelonomi 15:10 Iomraidhean Croise

Mahlu 25:40

Mikma Mi̱ko ʋt afalaminchikmʋt A̱hli mak o̱ hʋchi̱ miha lishke, Itibapishi li ʋhleha yakohmi ka moma ik lauwo achʋfona ka kaniohmi ho̱ hʋsh ai i̱ yʋmohmi tuk okʋt, ʋno ak o̱ hʋs sa̱ yʋmohmi mak atuk oke, im acha hi oke.

Apostel isht Anumpa 20:35

Yakohmit toksahanli hosh ilbʋsha puta ka hʋsh apelʋcha he tuk, micha Chitokaka Chisʋs im anumpa puta, yʋmmak okʋt, Ima kak osh na yukpa kʋt habena ka, i̱ shahli hoke, achi tok a̱ hʋsh ithaiyana chi̱ ka mominchit hʋchim anohonli li chatuk oke; im ahanchi tok.

Loman 12:8

Micha ʋbanumpa isht atohnochi yokmʋt, yʋmmak o̱ isht ahantashke: na hopela yokmʋt, im anukfila apissali hosh yʋmihchashke: pehlichi yokmʋt, ai a̱hli achukmashke: i̱ nukha̱klot nan isht im ʋtta yokmʋt, aiokpanchi hosh yʋmihchashke.

Tutelonomi 14:19

Mi̱cha na balahanli hʋt heli puta kʋt hʋchin litiha ha chi̱ hoke, ʋpa he keyu hoke.

Tutelonomi 14:29

Mikma Lefait ʋt (yʋmmʋt i̱ kashapa, micha ai isha he ʋlhpesa yʋt chiba fo̱kʋt ik im iksho hokʋt) micha okla inla, micha i̱ki iksho, micha i̱ hatak illi, chi̱ holihta okhissa anu̱kaka aiasha aiena kʋt ʋla cha, ʋpʋt fihopashke; yʋmohmi ho̱ chin Chitokaka Chihowah yʋt chibbak na toksa̱hanli moma isht ish ahanta ka̱ chi yukpalashke, achi tok.

Tutelonomi 15:18

Pilla ho̱ ik ia, ish im ahnikmʋt chi̱ kʋllo, ahoba he keyu; afʋmmi hannali ho̱ chin toksʋli kʋt, ilhtono tishu ha̱ inlohmi tuklo ka̱ holitopa tuk ʋt chim iti laui tuk oke: micha chin Chitokaka Chihowah yʋt nana moma ka̱ ish yʋmihchikma, chi yukpala hi oke.

Tutelonomi 15:4

Ilbʋsha yʋt hʋch itin takla ya̱ iksho hok mak illa hi oke, ish ai isha he ʋlhpesa yosh ish ai isha chi̱ ho̱, chin Chitokaka Chihowah yʋt yakni chima tok a̱ Chihowah yʋt chi yukpali fehna chi̱ hoke.

Tutelonomi 23:20

Okla inla hano impotʋt ish chelicha hinla hoke: amba chitibapishi hano impotʋt ish chelicha he keyu: yʋmohmi ho̱ yakni ish isha chi̱ hosh ishia kʋt yʋmma ish ai ashʋt nana ho chibbak isht ish ishi moma ka̱ chin Chitokaka Chihowah yʋt na chiyukpalashke.

Tutelonomi 24:19

Chim osapa ya̱ na waya bʋshlit ish akʋchi tuk osh, sita achʋfa ka̱ chim ahaksi na, osapa itonla tukma, hoyot chik aiyo kashke; okla inla ʋlla i̱ki illi, micha ohoyo ʋlhtakla aiena kak o̱ immi ha hi oke: yʋmohmi ho̱ nana moma chibbak ʋt toksʋlikma chin Chitokaka Chihowah chi yukpa lashke.

Tutelonomi 28:8

Chihowah yʋt chim ʋlhpoyak ai itola chuka, micha nana ho̱ chibbak a̱ isht ish ishikma, na isht yukpali chi onucha hi oke; micha chin Chitokaka Chihowah yʋt yakni a̱ chima tok ʋt a chi yukpa la hi oke.

Heblu 13:16

Micha nana achukma isht ahanta cha, ʋbanumpa nan isht apelʋcha he aiena tuk ʋt hʋchimi haksi ná: nana isht it i̱ hullo yʋmma chohmi kak o̱ Chihowa yokʋt isht im ʋlhpesa fehna hoke.

1 Pita 4:11

Hatak kanima hosh anumpuli hokmʋt, Chihowa im anumpa hʋt abʋchi kak o̱ anumpulashke; hatak kanima hosh ʋbanumpuli ilbʋsha ya̱ nan isht im ahanta hokmʋt, Chihowa hʋt kanimihchit hlampkochi kak o̱ isht ahantashke: yohmi na Chihowa hʋt Chisʋs Klaist ak atuk pulla kak o̱ nan oklu̱ha ka isht a holitopashke, yʋmmak o̱ isht a holitopa, mi̱kot ahantʋt bilia yʋt immit biliashke. Amen.