Tutelonomi 14:2 - Chahta Holisso Holitopa 1886

² Chin Chitokaka Chihowah ya̱ i̱ holitopa okla chia hokʋt; micha oklushi puta yakni paknaka aiasha moma ka̱ i̱ shahlechit im okla hosh inla fehna chia ha chi̱ ho̱ Chihowah yʋt chi atokoli tok oke.

Tutelonomi 14:2 Iomraidhean Croise

Lefitikʋs 11:45

Hʋchin Chitokaka sia ha chi̱ hosh Echip yakni ya̱ apehlichit hʋchi kohchi tuk Chihowah sia hoka; yʋmohmi hoka hʋchi holitopashke; sa holitopa hoka.

Lefitikʋs 19:2

Islael im ʋlla ʋhleha okla moma ka̱ im anumpulit, Nan ashʋchi ik hʋchim iksho kashke: Chitokaka hʋchin Chihowah sia hʋt nanashʋchi ik sʋm iksho hoka.

Lefitikʋs 20:24

Yʋmohmi tuk kia I̱ yakni ya̱ hʋsh aiasha hi oke, hʋchim achi li hatuk, atuk osh yakni pishukchi micha foibila aiyanahanli ya̱ hʋsh aiasha chi̱ ho̱ hʋchima la chi̱ hoke; hʋchin Chitokaka Chihowah sia hosh okla inla ya̱ hʋch iti filʋmminchi li tuk oke.

Lefitikʋs 20:26

Micha hʋs sʋm i̱ holitopa hi oke; Chihowah sia hʋt sa holitopa hosh ʋmmi hʋchia ha chi̱ ho̱ okla inla ya̱ ile hʋchi̱ filʋmmichi li tuk oke.

Loman 12:1

Yʋmohmi ka itibapishi li ʋhleha ma! Chihowa hʋt isht i̱ nukha̱klo puta hak atuk pulla mak o̱ hʋchi haknip puta hokʋno ʋba isht aiokpʋchi okcha̱ya, holitopa, Chihowa yʋt aiokpancha he ʋlhpesa ho̱, yʋmma isht hʋsh ai ahanta he ʋlhpiesa hokʋt, hʋsh im issa he, hʋchim ai ahni lishke.

Tutelonomi 14:21

Nana hosh ilap ak inli hosh illi tuk ano hʋsh pa he keyu: okla inla yosh chi̱ holihta okhissa hikia kak o̱ ish ema na, ʋpa hi oke; keyukmʋt okla inla yo̱ ish i̱ kancha hi oke; chin Chitokaka Chihowah ya̱ alitiha ik im iksho yosh im okla hʋchia hokʋt. Issi kosoma ushi ya̱ ishki i̱ pishukchi ya̱ isht ish hona he keyu hoke.

Tutelonomi 28:9

Chihowah yʋt anumpa kʋllo chim ilono̱honchi tok mak osh, chin Chitokaka ya̱ im anumpa ish ieshi cha, i̱ hina ya̱ ish itanowakma, im okla i̱ holitopa kʋllo hosh chikba hi oke.

Tutelonomi 33:3

A̱hli, okla ha̱ i̱ holitopa tok, imi saint ʋhleha moma kʋt chibbak foyuka hoke, micha chiyi ituma chieya tok: moma kʋt chim anumpa ha̱ ai isha hi oke.

Tutelonomi 4:20

Amba Chihowah yʋt hʋchishno ya̱ hʋch ishi cha, tʋli abila Echip fehna ka̱ hʋchi kohchi kʋt, okla immi ha chi̱ ha tok o̱, hima̱k nitak a̱ hʋsh yʋmohmishke.

Tutelonomi 7:6

Chin Chitokaka Chihowah ya̱ im okla holitopa chia hoka; chin Chitokaka Chihowah yʋt okla moma yakni paknaka aiasha ka̱ i̱ shahlit immi atokowa chia ha chi̱ ho̱ atokolit chishi tok.

Tutelonomi 7:7

Laua kʋt okla inla ya̱ hʋsh i̱ shahli kak o̱, Chihowah yʋt hʋchi̱hullot hʋchi atokoli tok keyu; okla laua kʋt okla moma ka̱ hʋchik lauwo ke tuk oka.

Titus 2:14

Yohmi kʋt yʋmmak ash osh ai ashʋchika puta ka a pi hlakofihinchi cha, pi kashofi na ilap immi okla holitopa fehna e toba cha, nan toksʋli achukma puta ka a yiminta hosh isht il ahanta he mak o̱, pi ʋlhtoba hosh illi tok.

1 Pita 2:9

Amba isht atiaka ʋlhtoka, mi̱ko i̱ na holitompa isht ʋtta; oklushi holitopa, Chihowa immi ai a̱hli fehna hʋchia hoke: yohmi ka yʋmmak osh hʋchi̱ ho̱wʋt ai okhlilika ya̱ a kohchit im atohwikeli chinto ka hʋchi foyuki tuk o̱, ilap isht aiokpahancha he a̱ puta ka otʋninchit hʋsh ano̱honla he a tok: