Tutelonomi 13:10 - Chahta Holisso Holitopa 1886

¹⁰ Tʋli o̱ isht ish boli na, illashke; chin Chitokaka Chihowah yʋmmak osh Echip yakni, micha aboha a yuka ha̱ apehlichit chi kohchi tok a̱ i̱ filʋmmichit chi tobli bʋnna tuk okʋt.

Tutelonomi 13:10 Iomraidhean Croise

2 Mi̱ko 11:18

Mihma yakni ya̱ okla moma kʋt Baal im aboha ona cha, kinʋffi tok; micha im alta puta, micha i̱ naholbʋt toba puta aiena ka boshulliehit tahli mʋt, Baal naholitompa isht im ʋtta Mattan a̱ alta puta itikba ya̱ ai ʋbi tok: mihma naholitompa isht ʋtta yash osh Chihowa in chuka ya̱ apesʋchi puta ka atokoli tok.

Eksotʋs 20:2

Ʋno ak osh Chin Chitokaka Chihowah sia hosh Echip yakni, micha yuka aboha ya̱ apehlichit chi kohchi li tuk oke.

Eksotʋs 32:27

Mihma Chihowah Islael in Chitokaka ʋt yak achishke, Hatak moma kʋt hʋchi̱ bʋshpo falaia ya̱ hʋsh ilapakshʋnni cha, binah okhissa puta chukowʋt kohchʋt hlopullit hatak moma kʋt hʋchitibapishi ha̱, micha hatak moma kʋt ai itapiha ya̱, micha hatak moma kʋt in chuka a bili̱ka ya̱ hʋsh bashke, achishke, achi tok.

Lefitikʋs 20:2

Anonti Islael im ʋlla ʋhleha ha̱ im anumpulit, Kʋna hosh Islael im ʋlla ʋhleha hosh, keyukmʋt okla inla Islael takla ʋtta yosh im isht atiaka yo̱ Molek a̱ imakmʋt illi pulla hi oke, yakni yash okla hʋt tʋli ishit bola hi oke.

Lefitikʋs 20:27

Micha hatak osh, keyukmʋt ohoyo hosh shilombish okpulo ai itibai achʋfa, keyukmʋt isht a hullo ʋt illi pulla hi oke; tʋli yo̱ ishit bola hi oke; im issish ʋt ilap ak o̱ onʋtonla hi oke, ish im achashke, achi tok.

Lefitikʋs 24:23

Mihma kalakshichit anumpuli tuk ash binah ha̱ kocha isht ona cha tʋli ishit bola chi̱ ho̱ Moses ʋt Islael im ʋlla ʋhleha ha̱ im anumpuli tok, mikma Chihowah yʋt Moses a̱ i̱ miha tuk mak o̱ Islael im ʋlla ʋhleha hʋt yʋmihchi tok.

Tutelonomi 13:5

Mikma hopaii yʋmmʋt, micha holhpokuna holhpokuna yʋmmʋt illashke; hʋchin Chitokaka Chihowah yʋmmak osh Echip yakni ya̱ apehlichit hʋchi kohchi tok; micha yʋmmak osh aboha ayuka ha̱ a hʋchi hlakofichi tok a̱, i̱ filʋmmichit hʋchisht ia chi̱ hosh, hina hʋsh ai itʋnowa chi̱ ho̱ hʋchin Chitokaka Chihowah yʋt hʋchi̱ miha tok a̱ naksika pit hʋchi tobli bʋnna hosh anumpuli ha tuk oka. Yʋmohmi hosh hʋchim ai iti takla ya̱ nan ik achukmo ka̱ isht hʋsh kanchashke.

Tutelonomi 17:5

Yohmikma hatak, keyukmʋt ohoyo yʋmmʋt na yoshuba yʋmma yʋmihchi kash, hatak yʋmma, keyukmʋt ohoyo yʋmma pulla ka̱ chi̱ holihta okhissa ya̱ isht ish ona cha, tʋli ishit ish boli na, illa hi oke.

Tutelonomi 17:7

Ʋba chi̱ kʋt witnes puta ibbak ak osh ti̱kba onʋtola hi oke, i̱ himmak a yak o̱ okla moma ibbak ʋt onʋtola hi oke; Yʋmohmi hosh nana ik achukmo hʋch itin takla itoyula hash ishit hʋsh kancha hi oke.

Tutelonomi 21:21

Mikma in tʋmaha holihta hatak moma kʋt tʋli ishit boli na illa hi oke: yʋmohmi hosh ahʋchi iti takla nan ik achukmo ka̱ ishit ish kanchashke, mikma Islael moma kʋt haklokmʋt nukshopashke.

Tutelonomi 4:19

Micha keyukmʋt, hʋchi nishkin a̱ shutik pilla aka chakalichi cha, hʋshi micha hʋshi ninak a̱ya, micha fochik puta, ʋba nana moma fehna ka̱ hʋsh pisakmʋt, yʋmmak oka chin Chitokaka Chihowah yʋt oklushi puta ʋba moma nuta ka̱ im ita kashʋbli tok a̱, yoshoba cha aiokpʋchit hʋsh im antia na.

Choshua 7:25

Yohmi ma Choshua ʋt, Nanta katiohmi ho̱ ish pilbʋshali tuk oh cho? himak nitak a̱ Chihowa yak osh chishno ma chilbʋshala chi̱ hoke, achi tok. Mihma Islael okla hʋt momʋt tʋli isht boli tok: yohmi cha tʋli isht bolit okla issa hayʋt, luak isht hukmi tok.