Tutelonomi 12:20 - Chahta Holisso Holitopa 1886

²⁰ Chin Chitokaka Chihowah yʋt achit chim issa tuk mak osh, chim aiʋhli ya̱ chitolikma, nipi ya̱ ʋpa lashke, ish achikmʋt, (chi chu̱kʋsh ʋt nipi ʋpa bʋnna ha tuk osh,) nipi nana ho chi chu̱kʋsh ʋt bʋnnakmʋt ish pa hinla hoke.

Tutelonomi 12:20 Iomraidhean Croise

Tutelonomi 19:8

Atuk o̱ chin Chitokaka Chihowah yʋt chi̱ki ʋhleha ha̱ anumpa kʋllo il onochit im issa tuk mak osh, chim aiʋhli ya̱ chitoli cha, chi̱ki ʋhleha ha̱ im issa tok yakni moma ka̱ chimakma,

Tutelonomi 11:24

Kanima moma hʋch iyi pʋtta yʋt ano̱ho̱wa kʋt hʋchimmi ha chi̱ hoke; yakni haiaka, micha Lebanon ʋttʋt okhina Euflates okhina ʋttʋt ia hosh okhʋta ont ʋhli fehna ont ʋhli kak osh hʋchim ai ʋhli ya chi̱ hoke.

Eksotʋs 34:24

Oklushi puta ka̱ hʋchi tikba kohchit kanchi lish, chim ai ʋhli a̱ chitolichi la chi̱ hoke, mikma afʋmmi achʋfakma hituchina ha chin Chitokaka Chihowah ya̱ itikba ish hikia chi̱ hosh ish iakma, hatak nana kia chi̱ yakni a̱ bʋnna he keyu hoke,

Genesis 28:14

Mikma chim ishtatiaka yʋt yakni lukfi pushi ak o̱ choyuhma hi oke; micha fimimpa cha, hʋshi ai okatula, micha hʋshi akochaka, micha falʋmmi, micha oka mahli aiena ka̱ pit ish pataiya chi̱ hoke: mikma chishno, micha chim ishtatiaka pulla kak o̱ chuka achʋfa puta moma yakni paknaka aiasha kʋt ai yukpa hi oke.

Atʋloa 107:9

Shilombish itukshila ya̱ fihoblikmʋt, shilombish hohchʋfo ya̱ nan achukma ho̱ ishit kaiyʋchi hoka̱.

Tutelonomi 12:15

Yohmi kia nana ho̱ chi chu̱kʋsh ʋt bʋnnakmʋt, chi̱ holihta okhissa anu̱kaka moma ka̱, chin Chitokaka Chihowah yʋt nan isht yukpali chima tuk mak o̱, ai ʋbit nipi ish pashke: ik kashofo micha kashofa aiena kʋt issi holba nakni, micha issi nakni chohmi ka̱ ai ʋpa hinla hoke.

Eksotʋs 23:31

Micha chim aiʋhli ya̱ okhʋta Humma ʋttʋt ia hosh Filistin im okhʋta ont ʋhli, micha chokushmi ʋttʋt ia hosh okhina ont ʋhli kak o̱, ʋhlichit apesa la hi oke; yakni ya̱ okla aiasha ka̱ chibbak fohki la chi̱ hoke; mikma chi tikba tihlelit ish kohcha hi oke.

Filippian 1:8

Chisʋs Klaist hiahnit isht i̱ hullo chohmit hʋchi̱ sa palata fehna ka, Chihowa yʋt atokolit si anoli yoka.

2 Kolinhlian 9:14

Yohmi mʋt ʋba isht hʋchi anumpohonli pulla hosh Chihowa nan isht i̱ kana fehna kʋt hʋchi anukfoyuka chi̱ ka, ai ahnit isht hʋchi̱ hullo hoke.

Atʋloa 119:174

Nan ish okchalinchi ya̱ sʋ ba̱ha̱nna hoke, Chihowa ma; micha chi̱ nan ʋlhpisa yak osh ʋm ayokpa yoke.

Atʋloa 119:40

Yakeh, chi̱ nan ʋlhpisa putta kak o̱ sʋ ba̱ha̱nna hoke; chi ai ʋlhpiesah pulla kak osh is si okchalinchashke.

Atʋloa 119:20

Nittak moma ka̱ nan ish ʋpehi̱sa ka̱ ho̱ho̱yo li kak osh, ʋmish shilombish ʋt lishoʋshke.

Atʋloa 84:2

Chihowa i̱ wanuta putta ka̱ ʋmish shilombish ʋt i̱ pʋllatakmʋt, im ielli hak inli hoke; sʋ chu̱kʋsh micha sʋ haknip aienah mʋt Chitokaka okcha̱ya ya̱ pit i̱ tahpa̱ha̱lʋshke.

Atʋloa 63:1

Chitokaka ma, chishno ak osh a̱ Chitokaka chia hoke; achunnanchi hosh chi hoyo li hoke; chishno ak o̱ chi hoyo hosh, ʋmish shilombish ʋt itukshila hoke; yakni shila ya̱ oka yʋt iksho ho̱ sʋn nipi ʋt tikahbit chi̱ pʋlata hoke.

2 Samuel 23:15

Mihma Lewi ʋt bʋnna fehna cha, Kʋna kia Behlehem kʋli hofobi holihta okhissa bili̱ka hiki̱a ka, oka ont ai ishit ant sapetak bano, achi tok.

2 Samuel 13:39

Mihma mi̱ko Lewi ʋt ushi Absalom a̱ i̱ palata fehna tok: Amnon ʋt illi tuk ano hopohlʋt taha hokʋt.

Numbas 11:34

Mihma yakni yʋmma Kiblolh hattaafah hochifo tok; yʋmmak o̱ pushkʋno tuk okla hʋt ahollohpi tok oka.

Numbas 11:20

Amba hʋshi achʋfa ont hlopulli hok kia hʋsh ahampakma, pola̱ka hʋch ibishakni a kohchakmʋt nan isht hʋchi̱ yuwala ya chi̱ hoke; Chihowah hʋchi takla ahanta ka̱ hʋsh shitilema cha, itikba ya̱ ayaiyʋt, Nanta katiohmi ho̱ Echip a̱ e kohcha tuk oh cho? hʋsh achi hokʋt, ish im achashke, achi tok.

Numbas 11:4

Mihma okla laua itaiyokoma takla asha tuk ʋt pushkʋnot wakaya tok; micha Islael im ʋlla ʋhleha hʋt anonti yaiya mʋt, kʋta hosh nipi ya̱ pipeta chi̱ cho?

Genesis 31:30

Atuk o̱ himak a̱ ia hosh ish a̱yʋshke, chi̱ki in chuka ya̱ ish i̱ palata fehna hokʋt: yohmi kia nanta katiohmi ho̱ a̱ naholbʋt toba ya̱ is sa̱ hu̱kopa tuk oh cho? im achi tok.

Filippian 2:26

Hʋchi̱ palata fehnʋt, ilap ʋt abeka tuk a̱ hʋsh haklo tuk ak o̱ nan a nukha̱klo kʋt chukʋsh a̱ alota fehna tok.

Tutelonomi 12:21

Chin Chitokaka Chihowah yʋt kanima ho̱ yʋmmak o̱ hohchifo ha̱ a bohla chi̱ hosh atokoli tuk ʋt chi̱ hopaki fehnakmʋt, yohmikmʋt, chi̱ nan ʋlhpoa hochito, micha chi̱ nan ʋlhpo chipunta aiena Chihowah yʋt chima tuk a̱ chi̱ miha li tuk mak o̱, nana ho̱ chi chu̱kʋsh ʋt bʋnnakmʋt chi̱ holihta okhissa anu̱kaka yak o̱ ish ai ʋpashke.