Tutelonomi 10:17 - Chahta Holisso Holitopa 1886

¹⁷ Hʋchin Chitokaka Chihowah yʋt na holbʋt toba puta in Chitokaka, micha Chihowah in Chihowah, Chitokaka holitopa, kʋllo, micha palʋmmi yosh yʋmmʋt hatak yohmi hoka, ahni keyu, na hʋlbina ishi keyu hoke.

Tutelonomi 10:17 Iomraidhean Croise

Atʋloa 99:3

Chi hohchifoh chinto micha pʋllʋmmi ka̱ ayokpʋchashke; yʋmmʋt hulittopa hoka̱.

Eksotʋs 23:8

Micha nahʋlbina ya̱ ish isha he keyu hoke; nahʋlbina yʋt hopoyuksa nishkin lʋblichi, micha aiʋlhpiesa im anumpa ha̱ shanaiyʋchi yoke.

Mark i̱ Holisso 12:14

Atuk o̱ yʋmmak ash ot ai ʋla mʋt, Nan‐ithʋnanchi ma! chishno yokʋt aia̱hli chia, mikmʋt hatak nana kia nan isht ik chim ahobo; hatak nashuka yak o̱ ish pisa ho̱ keyu hatuk okʋt; amba Chihowa nana aiahni ak o̱ aia̱hlit ish ithʋnanchi chatuk a̱ il ithaiyanʋshke. Noshkobo isht chumpa tʋli holisso ya̱ Sesa yak o̱ ima he ai ʋlhpesa hokmá, keyukmá, nanta cho?

Apostel isht Anumpa 10:34

Mihma Pita yʋt itakha ya̱ wakʋmmi mʋt Chihowa yʋt hatak a̱ kanimanchi keyu ka, ai a̱hlit akostininchi lishke —

Loman 2:11

Yohmi ka Chihowa hokʋto hatak puta ka it i̱ shahshohlichi kʋt ik im iksho hoke.

Kaleshan 2:6

Amba, kʋna hosh holitompa ʋhleha ahoba kʋt, nana ho̱ kaniohmi yoh kia, yʋmmak okʋto nan isht ʋm a kaniohmi keyu; Chihowa yʋt hatak a̱ nashuka yak o̱ pisa keyu; holitompa ahoba yʋmmak ash o̱ it im anumpuli li tok a̱ nana isht a̱bafohki tok keyu.

Efeshan 6:9

Mikma i̱ nahullo hʋchia hʋt i̱ nokowʋt anumpuli iksho hosh, yʋmmak inli ho̱ hʋsh i̱ yʋmmihinchashke: hatak iti̱ shahshohlechit anukfilli keyu hosh, ʋba yakni hʋchim i̱ Shahli yʋt binili ka hʋsh ithaiyanashke.

Tutelonomi 1:17

Nan apesa kʋt, hatak yohmi hoka, ish ahna he keyu hoke: amba chipunta kak kia hochito ka̱ iti lauechit hʋsh i̱ haponaklashke; hatak nashuka ya̱ hʋchik i̱ nukshopo kashke; nan im apesa yʋt Chitokaka immi hoka; atuk osh nana kʋt hʋchi̱ kʋllo fehnakmʋt, isht hʋs sʋm ala na, ʋno ak osh haponaklo lashke, im achi li tok.

Tutelonomi 16:19

Aiʋlhpiesa ʋlhpisa ka̱ ish shanaiyacha he keyu: hahatak yohmi hoka, ish ahna he keyu, micha nahʋlbina ish isha he keyu; na hʋlbina hʋt hopoyuksa nishkin a̱ lʋplichi hoke; micha aiʋlhpiesa im anumpa ha̱ shanaiyʋchi hoke.

Tutelonomi 24:17

Okla inla micha ʋlla ʋlhtakla i̱ki iksho aiena ka̱ ai ʋlhpiesa i̱ yʋmihchi ka̱ ish shanaiyʋcha he keyu; micha ohoyo ʋlhtakla i̱ nafohka ya̱ isht atonichi ish im isha he keyu hoke.

Tutelonomi 27:25

Kʋna hosh hatak nan okpʋni keyu ho̱ ʋba chi̱ hosh nahabenakmʋt kallakshashke; mikma okla moma kʋt, Amen, achashke.

Tutelonomi 7:21

Ish i̱ nukshopa he keyu: chin Chitokaka Chihowah yʋt Chitokaka kʋllo, micha palʋmmi hosh hʋchi takla ahanta hoka.

Koloshan 3:25

Amba kʋna hosh nan ik ʋlhpeso yohmikmʋt, nan ik ʋlhpeso yohmi tuk ak osh isht im ʋlhpisa hi oke: iti̱ shahsholichit kʋna kia im anukfilli kʋt iksho hoka.

1 Timohli 6:15

Ai yʋmohma he apesa tok nitak yʋmma ilap ak bano hosh ithana hosh yʋmmak oka haiakʋcha he; yohmi kʋt ilap ak osh nayukpa Mi̱ko ak bano, mi̱ko moma ka i̱ Mi̱ko, micha chitokaka moma ka in Chitokaka yoke.

Choshua 22:22

Chitokaka Chihowa na holbʋt toba moma i̱ shahli, Chitokaka Chihowa na holbʋt toba moma i̱ shahli, yʋmmʋt ithanʋshke, mikma Islael ak kia ithana chi̱ hoke; Chihowa im asanali hokmá, keyukmʋt i̱ yoshuba hokmá, nana hatuk ma, (himak nitak a̱ ik pi okchalincho kashke.)

1 Pita 1:17

Yohmi ka I̱ki ak o̱ hʋsh im asithha hokmʋt, yʋmmak okʋt hatak it i̱ shahshohlechi iksho hosh hatak puta kʋt ilap a kaniohmi tuk ak o̱ isht im apesa yoka, ilʋppa hʋsh ai ahanta ta̱kla kʋt hʋsh holitoblashke:

Nan Otʋni 17:14

Mikmʋt ilʋppak ash ot Chukfʋlhpobushi ya̱ itintanampa chi̱, mikma yʋmmak okʋt chitokaka ʋhleha in Chitokaka, micha mi̱ko ʋhleha i̱ Mi̱ko yokʋt Chukfʋlhpobushi yash ot yʋmmak ash o̱ imaiyacha chi̱ hoke; yohmi ka kʋna hosh yʋmma ai ibachʋfa hokʋto ʋlhtoka, mikmʋt ai a̱hli, micha holitopa mak oke, ʋm achi tok.

Nan Otʋni 19:16

Yohmi kʋt mi̱ko puta i̱ Mi̱ko, mikmʋt chitokaka puta in Chitokaka hohchifo hosh yʋmma im anchi, mikmʋt iyubi ita tuklo ka ai o̱ holisso hoke.