Genesis 22:2 - Chahta Holisso Holitopa 1886

² Mihma, Himak a̱ chiso hash, chiso yʋmmak bieka Aisak ash ish holitobli chatuk ʋt ishi cha, Moliah yakni ya̱ ish onashke; micha nʋnih achʋfalit chim anoli la chi̱ ka̱ paknaka ya̱ hukmit im issa mak o̱ ikbit ont ai is sʋm issashke, achi tok.

Genesis 22:2 Iomraidhean Croise

Genesis 17:19

Mihma Chitokaka yʋt, Chi tekchi Salah ʋt ʋlla nakni yo̱ chim eshi pulla chi̱ hoke; mikma Aisak ish hochifa chi̱ hoke: mikma nan itim apesa bilia mak o̱ yʋmma, micha im ishtatiaka et iakaiya aiena ka̱ kʋllochit nan itim apesa la hi oke.

Genesis 21:12

Mihma Chitokaka yʋt Eblaham a̱, Ʋlla ak atuk pulla mak o̱, micha chi̱ yuka ohoyo ak atuk pulla mak o̱ isht ik chim ʋlhpeso kashke: Salah ʋt nana chim achi tuk mak o̱ moma ka̱ im anumpa ha̱ ish i̱ haponaklashke: Aisak ak o̱ chim ai unchololi hʋt iba holhtinʋt hohchifa hi oka.

Genesis 21:3

Mihma Eblaham ʋt ʋlla nakni im ʋtta kash Salah ʋt im eshi kash hohchifo ha̱ Aisak achi tok.

Genesis 22:12

Mihma, Chibbak a̱ ʋlla nakni yash ish onochi ná, micha nana kia chik i̱ kaniohmecho kashke: himak a̱ chiso hash, chiso yʋmmak illa kash chik sʋm i̱ halʋllo hokʋt, Chitokaka ya̱ ish i̱ nuksho̱hompa ka̱ ithana li hoka, achi tok.

Genesis 22:16

Micha Chihowah ʋt, Ʋno ak o̱ ʋno akinli ho̱ hochifot anumpa kʋllo il onochit, Nana ilʋppa ish yʋmihchi hatuk oka, micha chiso hash, chiso yʋmmak illa kash chik sʋm i̱ halʋllo hatuk oka;

Genesis 22:3

Mihma Eblaham ʋt onnahinli fehna ho̱ wakaya cha, im issuba haksobish falaia ya̱ umpatali mʋt, hatak himithoa im a̱sha tuk ash tuklo ho̱, micha ushi Aisak aiena ka̱ pehlichi cha, ishit hukmit im issa iti ya̱ pʋhli mʋt, wakaya cha Chitokaka ʋt im anoli tuk mak o̱ ai ona tok.

Genesis 22:9

Atuk osh Chitokaka yʋt im anoli tuk nʋnih ha̱ onʋt okla tok: mihma Eblaham ʋt yʋmmak o̱ alta ikbi cha, iti ya̱ achukmalit bohlit tahli tok; mihmʋt ushi Aisak a̱ takchi cha, alta paknaka iti on a̱sha tuk a̱ onochi tok.

Genesis 8:20

Mihma Noah hʋt Chihowah ya̱ alta im ikbi cha, nan ʋlhpoa kashofa puta, micha hushi kashofa puta ai ishi cha, alta yash onochit hukmit isht aiokpʋchi ya̱ im issa tok.

2 Mi̱ko 3:27

Yohmi ma ushi ʋttahpi ʋlhtobʋt mi̱ka he tuk a̱ ishi cha, holihta onochit hukmit isht aiokpʋchi im issa tok. Mihma Islael a̱ i̱ nukkilli fehna tok: mihma okla itibi tuk ʋt i̱ filʋmmi cha, falamʋt i̱ yakni akinli ho̱ ona tok.

Chan 3:16

Chihowa yʋt yakni a̱ i̱ hullo fehna kʋt, kʋna hosh yʋmma i̱ yimmikmʋt ik illo hosh, amba ai okcha̱yʋt bilia yo̱ pisa hi o̱, Ushi achʋfa illa holitopa ya̱ auet ima tok.

Loman 5:8

Amba Chihowa hokʋto isht pi̱ hullo otʋninchi kʋt, nan ashʋchi pia moma kash o̱, Chisʋs Klaist ʋt pi ʋlhtobʋt illi kak a tok.

Loman 8:32

Ilap Ushi fehna ka ik ilatombo hosh, amba pishno e moyuma hak atok pulla mak o̱ pim issa tok ʋt, katiohmi ho̱ yʋmma pima hatuk ʋt nan oklu̱ha ka anonti pilla pima ak inla he keyu ho̱?

Heblu 11:17

Na yimmi pulla kak osh Eblaham okʋt nana ka imomaka pisa ho̱, Aisaak a̱ im issa tok; micha nana im ihi̱sa puta kash ishi hatuk okʋt ushi yʋmmak i̱ bieka tuk ʋt im issa tok.

Nan Apesa 11:31

Yʋmohmikma yakohma he, Ammon in chipota i̱ yakni ya̱ si achukma̱kʋt falamʋt ʋla likmʋt, nana hosh an chuka okhissa ya̱ kohchʋt si afama chi̱ hosh mintikmʋt, Chihowa immi pulla chi̱ hoke, mikma Chihowa ya̱ im issʋt hukmit isht aiokpʋchi la hi oke, achi tok.

Nan Apesa 11:39

Atuk o̱ yakohmi tok, hʋshi tuklo kʋt ont taha ma, falamʋt i̱ki ya̱ im ona na yʋmmʋt ilap im anukfila hosh Chihowa nan im issa he ahnit anumpa il onochi tuk mak osh yʋmihchi tok: mihma hatak a̱ ik ithano tok.