Filippian 4:3 - Chahta Holisso Holitopa 1886

³ Mikmʋt chishno itiba toksʋli li a̱hli ak kia chim asilhha lishke, ohoyo yʋmmʋt ʋbanumpa ha̱ isht sʋba toksʋli tuk, micha Klement, micha sʋba toksʋli ʋhleha inla aiena, yʋmma hohchifo hʋt holisso okcha̱ya a takali ka, ish apelahanchashke.

Filippian 4:3 Iomraidhean Croise

Atʋloa 69:28

Ai okcha̱ya hulisso ha̱ a kʋshofashke; micha ai ʋlhpiesa ʋhleha ha̱ ai ibafo̱kkʋt ik hulisso kashke.

Eksotʋs 32:32

Yohmi kia himak a̱ ish ahnikmʋt, nanashʋchi ya̱ ish i̱ kashofashke, atuk o̱ ish yʋmihcha he keyukmʋt, chi̱ holisso ho̱ ish holissochi tuk ʋt is sa kashofashke, achi tok.

ʋBanumpa Luk Ʋt Holissochi Tok 10:20

Yohmi kia shilombish okpulo puta kʋt hʋchim antia ilʋppak okʋno nan ik hʋchi yukpo kashke; amba hʋchi hohchifo puta kʋt ʋba ya̱ a holisso, yʋmmak o̱ na hʋchi yukpa ʋlhpesa hoke, im achi tok.

Loman 12:1

Yʋmohmi ka itibapishi li ʋhleha ma! Chihowa hʋt isht i̱ nukha̱klo puta hak atuk pulla mak o̱ hʋchi haknip puta hokʋno ʋba isht aiokpʋchi okcha̱ya, holitopa, Chihowa yʋt aiokpancha he ʋlhpesa ho̱, yʋmma isht hʋsh ai ahanta he ʋlhpiesa hokʋt, hʋsh im issa he, hʋchim ai ahni lishke.

Loman 16:12

Tlaifina, micha Tlaifosa itatuklo, Chitokaka in toksahanli ya̱ hʋsh aiokpʋchashke. Pasis holitopa, yʋmmʋt Chitokaka ya̱ in toksahanli fehna chatuk a̱, hʋsh aiokpʋchashke,

Loman 16:9

Ʋlbani Klaist ai achʋfʋt piba toksahanli, Stakʋs a̱ holitopa aiena ka hʋsh aiokpʋchashke.

Filippian 1:12

Yohmi ka itibapishi li ʋhleha ma! nana ʋm a kaniohmi tuk a̱ ʋbanumpa hʋt isht i̱ shahlit isht atoba tuk a̱ hʋsh ithana he, hʋchim ai ahni lishke.

Filippian 1:16

Achʋfa kʋt nan isht an chowa kak o̱ ahni hosh Klaist a̱ isht anumpulit, chu̱kʋsh a̱hli keyu hosh, sai yuka ka ai ʋbechit sʋlbʋshali bʋnna hosh:

Filippian 1:27

Nana hʋsh a kaniohmi kʋt Klaist im anumpa ak o̱ isht ai ʋlhpesa kak banashke: yohmi na onʋt hʋchi pesa li hokmá, keyukmʋt kanima a̱ya li ik saksho hokmá nana kia na hʋchim a kaniohmi puta yʋmmʋt shilombish achʋfa, im anukfila achʋfa hosh ʋbanumpa ai yimmi ka hʋsh it iba foho̱ʋt kʋllot hʋsh hieli ho̱ haha̱klo lashke.

Filippian 1:7

Yʋmohmit hʋsh moma ka ilʋppa hʋchi anukfilli la he ʋlhpesa, sa chu̱kʋsh isht hʋch ithaiyana li hokʋt; ʋbanumpa isht anumpuli li, micha ai a̱hlichi li hosh sa talakchi aiena ka nan isht i̱ kana hʋs sʋb ai ishi hoka.

Filippian 4:2

Yuotias a̱ ilbʋshʋt im asilhha li, micha Sintichi ma ilbʋshʋt im asilhha li ka, yʋmmʋt im anukfila it ibai achʋfa hosh Chitokaka ya̱ ibafoyukashke.

Koloshan 1:7

Yʋmmak ash inli ho̱ Epaflas, tishu pi bi̱ka pi̱ holitopa ya̱ hʋsh im ai ithʋna tuk; yʋmmak okʋt Klaist im ʋbanumpa isht ʋtta hʋchim a̱hli mak oke:

Nan Otʋni 13:8

Mikma kʋna hosh hohchifo hʋt yakni tobʋt a minti tok ai ʋhli ka ʋlhtobʋt illi tok Chukfʋlhpobushi i̱ holisso ai‐okcha̱ya a holisso tok keyu kʋt, yakni pakna ai asha moma kʋt yʋmmak ash o̱ aiokpahancha chi̱ hoke.

Nan Otʋni 17:8

Nampoa nukshopa yash, yʋmma ish pi̱sa tuk a̱ anta tuk osh, anonti ikshoshke; yohmi kia yʋmmʋt chiluk hofobi ai ʋhli iksho a̱ auet a kohcha chi̱ hoke; mikmʋt aiokpuloka ont chukowa chi̱ hoke: mikma yakni pakna ai asha puta kʋt, kʋna hosh i̱ hohchifo hʋt yakni toba tok taiyakla ka holisso ai okcha̱ya ya̱ a holisso tok keyukmʋt, nampoa nukshopa, yʋmmʋt anta tok osh, anonti iksho kia, anonti anta ak inli ka okla pisakmʋt, nukhlakancha chi̱ hoke.

Nan Otʋni 20:12

Yohmi ma illi, ik alauwo, micha i̱ shahli pit aiena kʋt ai o̱ binili holitopa itikba hiohma̱ya ka pisa li tok; yohmi ma holisso puta kʋt wakama tok; anonti holisso inla, yʋmmak osh holisso ai okcha̱ya mak osh wakama tok: mihma illi yash ot ilap nana a kaniohmi tuk puta, yʋmmʋt holisso ha̱ a holihi̱so tok ilʋppa puta ho̱ isht ai im ʋlhpihi̱sa tok.

Nan Otʋni 20:15

Yohmi ka holisso ai okcha̱ya ya̱ a holisso tuk osh otʋni keyu hokʋto okhʋta luak mak o̱ pit a kʋnia tok.

Nan Otʋni 21:27

Mikma yʋmmak oka nana kʋt liteha, micha ai yuwala he kia ai yohmi, micha na holabichi a moyuma hokʋto kaniohmi kia a chukowa himma keyu hoke; amba Chukfʋlhpobushi i̱ holisso ai okcha̱ya kʋna hosh a holisso tok ak bana hi oke.

Nan Otʋni 3:5

Kʋna hosh nana ka imaiyachit a hlopulli hokʋto, mihi yosh nafohka tohbi a fohka he; yohmikma yʋmma hohchifo hʋt ai okcha̱ya holisso a takali tuk a̱ kashofi la he keyu, amba hohchifo ha̱ A̱ki, micha im enchil ʋhleha aiena itikba ya̱ ai anohonli la he mak oke.