Filippian 3:9 - Chahta Holisso Holitopa 1886

⁹ Mikmʋt yʋmma ibafoyuka la he, micha ʋno ak inli kʋt ʋba nan ʋlhpisa yʋmmak o̱ isht ai ʋlhpiesʋt il ai eshi li keyu, amba yʋmmʋt Klaist a̱ i̱ yimmi kʋt nan ai ʋlhpiesa na yimmi pulla kak o̱ Chihowa a minti yak oke:

Filippian 3:9 Iomraidhean Croise

Genesis 7:23

Micha nan okcha̱ya moma yakni paknaka ya̱ aiasha tuk, hatak, micha nan ʋlhpoa, micha nana balʋlli puta, micha hushi ʋba itʋnowa aiena kʋt illit taha tok; yʋmmak osh yakni paknaka ya̱ ai illit taha tok: mihma Noah, micha api̱hʋt peni chito ya̱ aiasha tuk ak illa hosh okcha̱ya tok.

1 Mi̱ko 8:46

Okla chi̱ yoshubakma, (hatak nanta hosh yoshuba keyu kʋt iksho hoka,) mikma ish i̱ nukkilli cha, in tʋnʋp ibbak a̱ ish fohki na, yukachit isht iʋt hopaki hokma, keyukmʋt olanli hokma, nana hosh tʋnʋp i̱ yakni ya̱ isht onakma;

Atʋloa 14:3

Moma kʋt i̱ fillʋmmi tuk oke; ittʋpi̱hʋt oklah okpulot kʋnniah biekʋshke; nan achukma ho̱ yʋmihchi kʋt ikshoh; achʋffah kia iyikshoshke.

Atʋloa 143:2

Yohmi kʋt kʋna hosh okcha̱yʋt a̱ha̱tta kʋt chi tikba ya̱ ai ʋlhpiesa hosh hikkia he keyu hoka̱, chi̱ tishu ha̱ na̱ chik im apeso kashke.

Atʋloa 19:12

Ilap na̱ yusho̱ho̱ba kʋto kʋta hosh ʋkostinincha hinlah choh? na̱ yushoba luma putta ka̱ is sa̱ kʋshuffashke.

Mahlu 9:13

Ʋba isht‐ai okpʋchi ak okano ak aiahno; amba nan i̱ nukha̱klo ak o̱ aiokpanchi li hoke, achi yʋmmak osh nana hokma, ont oh ithʋna; hopoyuksa ʋhleha ak o̱ hoyot a̱ya li ha tok keyu; amba nan ashʋchi ʋhleha hʋt ile kostinincha chi̱ mak a tok oke, im achi tok.

Loman 1:17

Yohmi ka yʋmmak o̱ na yimmi ak atuk pulla kak o̱ Chihowa i̱ nan isht okchalinchi yʋt na yimmi ʋhleha ha̱ im otaiyani hoke; holihi̱so kʋt, Ai‐ʋlhpiesa yokʋto na yimmi pulla kak osh isht okcha̱ya hi oke, achi hoka.

Loman 10:10

Yohmi ka hatak ʋt chu̱kʋsh ak o̱ isht ai yimmi kak osh isht ai ʋlhpiesa hoke; micha itih hak o̱ Klaist a̱ isht otʋninchit anumpohonli kak osh isht ai okcha̱ya hoke.

Loman 16:7

A̱ kanomi, micha sʋbai yuka Antonikʋs, micha Chunia itatuklo, yʋmmak okʋt ʋbanumpeshi ʋhleha ha̱ i̱ holitopa yoka hʋsh aiokpʋchashke; yʋmmak okʋt sa ti̱kba Klaist ai ibai achʋfa hatok mak oke.

Loman 5:21

Yohmi ka ai ashʋchika yʋt imaiyʋt illihinchi tok ash inli chiyuhmit, isht i̱ kana isht ai ʋlhpiesa pulla kak osh isht i̱ shahlit pin Chitokaka Chisʋs Klaist atuk pulla mak o̱, isht okchalinchi bilia hi atok.

Loman 8:1

Yʋmohmi hoka Klaist Chisʋs ibai achʋfa, haknip nan ai ahni kak o̱ yʋmohmi keyu, amba Shilombish nan ai ahni kak o̱ iakaiya ʋhleha hokʋno himonasi ka isht ai i̱ palʋmma he anumpa hʋt im ʋlhpisa keyu hoke.

Loman 8:3

Yohmi ka ʋba nan ʋlhpisa yʋt nana ka ik atahlo kʋt, haknip ak atuk pulla kak o̱ ik ai a̱hlo hatuk o̱, Chihowa hʋt ilap Ushi ak inli ho̱ ai ashʋchika isht ʋlhtoba mak o̱ hatak nan ashʋchi haknip a̱ hobachit auet kanchi hosh, haknip ak o̱ ai ashʋchika ya̱ ai i̱ palʋmminchi tok:

1 Kolinhlian 1:30

Yohmi kia hʋchishno ʋto yʋmmak atuk mak o̱ Klaist Chisʋs a̱ hʋsh ibai achʋfa ka yʋmmak o̱ Chihowa pulla kak o̱ isht pi a hopoyuksa, micha isht pi ai ʋlhpiesa, micha isht pi a kashofa, micha isht pi ai ʋlbi yoke:

2 Kolinhlian 5:17

Yʋmohmi ka hatak nana hosh Klaist a̱ ibai achʋfa hokmʋt, mihi yosh nana toba himona yoke: na sipokni atuk ʋt ont ai ikshot kʋnia na, yakeh! nana puta kʋt himonʋt toba hoke.

2 Kolinhlian 5:21

Yʋmmak atuk mak o̱ Chihowa nan isht im ai ʋlhpiesa e toba chi̱ ka, yʋmmʋt nan ashʋchi ithaiyana tok keyu ka, yʋmmak ash o̱ Chihowa yʋt nan ashʋchi yo̱ pim ikbi tok.

Kaleshan 2:16

Hatak ʋt ʋba nan ʋlhpisa iakaiya kak osh isht ai ʋlhpiesa keyu, amba Chisʋs Klaist i̱ yimmi hok mak osh isht ai ʋlhpiesa ka ithaiyana hosh, ʋba nan ʋlhpisa yak o̱ keyu, amba Klaist i̱ yimmi mak o̱ isht a pi ʋlhpiesa chi̱ kʋt, Chisʋs Klaist il i̱ yimmi tok; ʋba nan ʋlhpisa iakaiya hokʋno hatak nana hosh isht ai ʋlhpiesa he keyu hoka.

Tutelonomi 27:26

Kʋna hosh nan ʋlhpisa ilʋppa anumpa moma ka̱ iakaiyʋt ik yʋmihchokmʋt kallakshashke: mikma okla moma kʋt, Amen, achashke. (achi tok)

Filippian 3:6

Amosholi hosh chʋch a̱ i̱ palʋmmichit, ʋba nan ʋlhpisa isht ai ʋlhpiesa yʋmmak okmʋno anumpa nana kia si onʋtula he keyu ki tok.

2 Timohli 1:9

Yʋmmak osh pi okchalinchi cha, ʋba nan isht ilaiyuk pa holitopa ho̱ il iesha he mak o̱ pi atokoli kʋt, pishno nan il ai isha he ai ʋlhpiesa kak o̱ yohmi keyu, amba ilap nan isht im anukfihinla hosh, yakni ik tobo pilla kash inli ho̱ ilap isht i̱ kana ya̱ Chisʋs Klaist ak atuk pulla mak o̱ pihi̱ma kak a tok oke:

Titus 3:5

Nan ai ʋlhpiesa isht ahantʋt il atahli tok ak o̱ keyu, amba pi nukha̱klo kak osh himona toba isht ʋlhchihi̱fa kʋt, Shilombish Holitopa yak o̱ himona isht a toba ho̱ isht a pi okchalinchi tok oke;

Heblu 6:18

Yohmi ka nana kaniohmit ai inli himma keyu tuklo yʋmmak oka Chihowa hokʋt isht a holaba himma keyu hoka, ʋba isht il aiyukpa pim ihi̱sa tok ash il isha chi̱ hosh a hlakofi yo̱ il o̱ chaha̱fa kʋt, nan isht a nuktaiyala chinto il iesha he ak atok.

Chemis 3:2

E moma kʋt nana ka il ai ibetʋbli kʋt laua hoke. Hatak nana hosh anumpa ha̱ isht ik ibetʋblo hokmʋt, mihi yosh hatak ai a̱hli, micha haknip a̱ mominchit apesahancha hinla hoke.

2 Pita 1:1

Saimon Pita, Chisʋs Klaist im apostel, micha in tishu hokʋt pin Chihowa, micha pi Okchalinchi, Chisʋs Klaist ʋt nan aiʋlhpiesa yʋmohmi tok pulla mak o̱, na yimmi pi̱ holitopa itilaui ka ahayuchi tok ʋhleha yʋmmak o̱ pit aiokpuchi kʋt,

1 Chan 3:4

Kʋna hosh nana ashʋchi kʋt anumpa ʋlhpisa ma kobʋffi hoke: nan ai ashʋchika yak osh anumpa ʋlhpisa ya̱ kobʋffi hoka.