Filippian 2:9 - Chahta Holisso Holitopa 1886

⁹ Yʋmohmi hatuk o̱ Chihowa hʋt holitoblichi fehna mʋt, hochifo kʋt na hohchifo inla moma ka i̱ shahli ho̱ ima tok oke:

Filippian 2:9 Iomraidhean Croise

Genesis 3:15

Mikma chishno, micha ohoyo hash micha chishtaiunchololi micha ohoyo ishtaiunchololi aiena ka̱ hʋch itin tanampichi la chi̱ hoke: yʋmmak okʋt chi noshkobo ha̱ litolikma, chishno mʋt iyi̱kotoba ya̱ ish litola hi oke, im achi tok.

Atʋloa 110:1

Chihowa hʋt a̱ Shahli ya̱, “Ʋm ishtimpakimma ya̱ ish binnili na, chi̱ tʋnʋp ʋhleha ha̱ chiyi ai o̱ hikia ikbi li hayashke,” achishke.

Atʋloa 110:5

Nan i̱ Shahli ʋt chim ishtimpakimma hikkia hosh nukhubelah nittakmʋt, mi̱ko putta ka̱ litolit kanchih pulla hi oke.

Atʋloa 89:27

“Ʋno yak kia ushi ʋttahpi chomihchit, chaha kʋt yakni i̱ mi̱ko putta ka̱ i̱ shahli ho̱ ikbi la chi̱ hoke.

Atʋloa 91:14

“Si ʋsittia hoka̱, hlʋkuffiche la chi̱ hoke; sʋ hohchifo ha̱ ithana hoka̱, achahaka binnilechi la chi̱ hoke.

Mahlu 11:27

A̱ki ʋt nan oklu̱ha ka sʋbbak fohkishke: yohmi ka Ushi ya̱ hatak nana kia ik ithano ho̱, amba I̱ki ak banoshke; mikma I̱ki a̱ hatak nana kia ik ithano ho̱, Ushi ak illa, micha Ushi ak osh kʋna ho̱ im otʋnichi hok mak bano hoke.

Mahlu 28:18

Yohmi ma Chisʋs ʋt ʋla cha, ant im anumpuli mʋt, Ʋba yakni, micha yakni ilʋppa aiena nan‐isht im ai a̱hlika puta moma kʋt ʋmmi toba hoke.

ʋBanumpa Luk Ʋt Holissochi Tok 10:22

Nan oklu̱ha ka A̱ki ʋt sʋbbak a̱ a fohkishke; yohmi ka kʋna hosh Ushi yoka hatak nana kia ik ithano ho̱, amba I̱ki ʋt ak illa hoke: mikmʋt kʋna hosh I̱ki yoka kʋna kia ik ithano ho̱, amba Ushi ʋt ak illa; micha Ushi ʋt kʋna ho̱ im otʋninchi mak bano hoke, achi tok.

Chan 13:3

Chisʋs ʋt, I̱ki ʋt nana moma ka ilap ak o̱ ibbak a̱ fohki tok, micha ilapʋt Chihowa hak o̱ a minti ha tok osh, anonti Chihowa hak o̱ im ia chi̱ kʋt ithaiyana mʋt,

Chan 17:11

Himak okʋno yakni paknaka ya̱ himmakma ik si ai iksho mak oke; yohmi kia ilʋppak okʋto yakni a̱ ai aha̱shwa na ʋno ʋt chim a̱ya li mak oke. A̱ki holitopa ma! is sʋma tok ʋhleha ilʋppak oka chishno chi̱ hohchifo pulla hatuk mak o̱ ish apesahanchi na yʋmmak mʋt ai itibai achʋfa kʋt pishno a̱ chiyuhmashke.

Chan 17:12

Pehliechit yakni paknaka ai ahanta li moma kʋto chi̱ hohchifo pulla ho̱ isht ai apesahanchi li tok: is sʋma tok ʋhleha yʋmmak oka apesahanchi li ma, achʋfa kia ik kʋnio ho̱, amba Holisso Holitopa ʋt ont ai a̱hla chi̱ kak o̱, nan‐okpʋni ushi ak illa tuk oke.

Chan 17:5

Yohmi ka, A̱ki ma! yakni ʋt iksho mak o̱ na holitopa ka isht chiba holitopa li ya tok mak o̱, himak a̱ chishno a̱ ai il a aieninchit is sa holitoblichashke.

Apostel isht Anumpa 5:31

Yʋmmak o̱ Mi̱ko, micha Nan okchalinchi aiena cha, ilekostininchi Islael a̱ anukfohki, micha ai ashʋchika aiena ma kashofa chi̱ ka, Chihowa yʋt ilap ibbak ishtimpak imma ya̱ isht holitobli tok oke.

Efeshan 1:10

Yʋmmʋt nitak ʋt ont ai ʋlhpiesakma, nana puta ʋba ai asha, micha yakni pakna ai asha aiena ka itahobit achʋfalechit, Klaist yʋmma fehna ka i̱ nutakacha he ak atok:

Koloshan 1:18

Yohmi ka yʋmmak osh chʋch haknip a̱ i̱ noshkobo yoke: yʋmmʋt nana moma ka ai in tikbʋt holitopa cha, ai isht ia ʋmmona illi tuk osh falamʋt tani ʋhleha ha̱ im Ʋttahpi yoke.

2 Hlessalonian 1:12

Yʋmohmi ka pin Chitokaka Chisʋs Klaist hohchifo hʋt, hʋchi a holitopakma, pin Chihowa, micha Chitokaka Chisʋs Klaist nan isht i̱ kana pulla ho̱ yʋmmak ash hʋchi a holitopashke.

Heblu 1:4

Nan iesha he im ai ʋlhpiesa hatuk ʋt ieshi hatuk osh, ilap hohchifo isht a holitopa kak osh enchil ʋhleha ha̱ i̱ shahli fehna hatuk osh kaniohmit holitopa kʋt yʋmma i̱ shahli fehna hoke.

Heblu 1:9

Chishno yokʋt nan ai ʋlhpiesa kak o̱ ish i̱ hullo cha, nan ik ʋlhpeso yokʋno ish i̱ nukkillishke; yohmi ka Chihowa, chin Chihowa yak osh nan isht ai yukpa bilia ya̱ laua i̱ shahli ho̱ isht chi ahʋmmi kʋt, ish ai itilaui tuk a̱ i̱ shahli chikbi tok.

Heblu 12:2

Chisʋs nan isht a pi yimmi ka pi nukfohkichi, micha atahli, yʋmmak osh nan isht ilaiyukpa yʋt itikba auet takali kak osh ʋlhpesa ahnit, ititaiyukhʋua ya̱ takalit, nan isht a hofahya nan isht ik im ahobo tok osh, Chihowa ai o̱ binili holitompa isht impakimma yak o̱ binili ka hʋsh pihi̱sashke.

Heblu 2:9

Yohmi kia Chisʋs, yʋmmak okʋt enchil ʋhleha ha̱ lumʋt ik lauwo hosh toba tok kia, nan‐illi isht ilbʋsha ka pihi̱sa kak osh isht a holitopa chinto ka isht iachuka ka e pihi̱sʋshke; yohmi na Chihowa isht i̱ kana pulla hatuk mak o̱ yʋmmak ash ot hatak moyuma ka ʋlhtoba hosh illa hi atok.

1 Pita 3:22

Yʋmmak okʋt ʋba yakni yoka ona tuk osh, Chihowa im isht im pakimma yak o̱ binili hoke; yʋmmak oka enchil, micha mi̱ko, micha nan ʋlhtoka puta kʋt i̱ nutʋt im antia he ya tok.

2 Pita 1:17

Yohmi ka, Ilʋppak osh Sʋso a̱ holitopa yoke, yʋmmak o̱ nan isht ʋm ʋlhpiesa hoke, ahanchi anumpa yosh Holitopa chinto ka a minti hosh im ʋla kak osh isht a holitopa, micha isht annoa achukma ka I̱ki Chihowa yak o̱ im ai eshi tok.

3 Chan 1:7

Yʋmmak okʋt yʋmma hohchifo pulla hatuk mak o̱ Chentail a̱ nanasi kia ik im ai esho hosh itʋnowʋt a̱ya hatuk oka.

Nan Otʋni 1:5

Micha Nan atokowa anoli ai a̱hli, mikmʋt illi tuk osh falamʋt tani kʋt illi ʋhleha hak o̱ Ʋttahpi hosh holitopa i̱ shahli; micha mi̱ko yakni pakna ai asha puta I̱ shahli Chisʋs Klaist mak o̱ a minti hosh hʋchi anukfoyukashke. Hʋp i̱ hullo cha, na hʋpim ai ashʋchika puta hatuk ma ilap im issish ak inli ho̱ isht achifʋt hʋp i̱ kashofi cha,

Nan Otʋni 11:15

Atuk o̱ enchil isht untuklo kash ot olachi tok: mihma anumpa ola chinto kʋt ʋba aholitopa ya̱ auet takali kʋt, Yakni ilʋppa apehlichika puta kʋt hʋpin Chitokaka, mikmʋt Ushi Klaist ita tuklo im apehlichika yo̱ tobʋshke; yohmi hatuk o̱ mihi yosh mi̱kot ahanta na biliʋt bilia hi oke.

Nan Otʋni 19:16

Yohmi kʋt mi̱ko puta i̱ Mi̱ko, mikmʋt chitokaka puta in Chitokaka hohchifo hosh yʋmma im anchi, mikmʋt iyubi ita tuklo ka ai o̱ holisso hoke.

Nan Otʋni 3:21

Kʋna hosh nana ka imaiyachit a hlopulli hokʋto, mihi yosh, ʋno ʋt imaiyachit a hlopulli lish, A̱ki a̱ awant im ai o̱ binili holitompa ya̱ a binili li kʋt, yʋmmak inli ho̱ chohmit ʋm ai o̱ binili holitompa ya̱ a binila chi̱ ka, im apesa la he mak oke.

Nan Otʋni 5:12

Chitolit miha hosh, Chukfʋlhpobushi illi tok ʋt nan isht im ai a̱hla he, micha nan u̱ha in laua, mikmʋt isht a hopoyuksa, micha isht hlampko, mikmʋt isht ahninchi, micha isht aholitopa, mikmʋt isht aiokpanchi aiena ka a chimmi ha he ʋt chim ʋlhpesa hoke, ahanchi ho̱ haklo li tok.