Filippian 2:3 - Chahta Holisso Holitopa 1886

³ Anumpa isht itachowa shahli, keyukmʋt ilefehnʋchi nanasi kʋt ik ʋlhtaho kashke; amba chu̱kʋsh akanlosi hosh moyuma kʋt inla yʋt achukma kʋt ilap a̱ i̱ shahli ho̱ anukfillashke.

Filippian 2:3 Iomraidhean Croise

ʋBanumpa Luk Ʋt Holissochi Tok 18:14

Yohmi kʋt hatak ilʋppʋt nan im aia̱hli achukma kʋt achʋfa yash i̱ shahli hosh in chuka ona tok a̱ hʋchim anoli lishke: kʋna hosh ile fehnʋchikmʋt, aka ona he; mikma kʋna hosh ile akanlosichi hokmʋt, holitopa hi oka, achi tok.

Loman 12:10

Itibapishi chiyuhmit it i̱ kana fehnʋt hʋsh it i̱ hullashke; hʋsh iti holitobli kʋt hʋsh it im i̱ shahlashke.

Loman 13:13

Nitak itʋnowa yak o̱ chiyuhmit ai ʋlhpiesa hosh il itʋnowashke: haksi, micha tasimbot tasali keyu, itiba nusit isht a haui keyu, itachowa, micha it i̱ potʋnnot hʋch ik it i̱ nukkillo kashke.

Loman 2:8

Amba kʋna hosh Chihowa ya̱ i̱ sanali, micha anumpa ai a̱hli ik holitoblo hosh, amba nan ai ʋlhpiesa keyu a yʋmohmi yokʋno, isht i̱ nukkilli chinto kʋt onʋtuyula hi oke,

1 Kolinhlian 15:9

Apostel ʋhleha moma ik alauwo sia, yohmi kʋt apostel hohchifa he si ʋlhpesa keyu, Chihowa in chʋch a̱ ilbʋshali li tok okʋt.

1 Kolinhlian 3:3

Haknip nan ai ahni hʋchia moma hoka iti̱ potʋnno, micha itachowa anonti iti̱ filamohli aiena kʋt hʋch itin takla aiasha hoka, haknip nan ai ahni mak o̱ hʋchia moma, micha hatak im anukfila yo̱ chohmit hʋsh itʋnoho̱wa keyu̱?

2 Kolinhlian 12:20

Yʋmmak keyukma ona likmʋt, itachowa, it i̱ potʋnno, it i̱ nokowa, it i̱ nukhobela, a̱shaka nana a mihachi, iti̱ shukshoʋt na mihachi, ilefehnʋchi, itakʋshkoa, hʋsh aiena cha ʋlhpesʋt hʋsh ma̱ya na, hʋchi ahayuchi la hetuk ash osh keyu ho̱ hʋchi ahayuchi li, yohmikmʋt a kaniohmi li̱ hʋs sa pisa hetuk ash o̱ keyu hosh, hʋchim otaiyani la he ká, ahnit sa nukshohumpa:

Kaleshan 5:15

Amba iti koblit, ʋpʋt hʋsh ititahli hokmʋt, iti okpʋnit hʋch ik iti tahlo ka chi̱ kʋt, ahah! hʋsh ahnashke.

Kaleshan 5:26

Nana ik ahobo a holitopa ya̱ ahnit it i̱ nokowʋchit, it i̱ potʋnnot kiloh ai asho kashke.

Efeshan 4:2

Chu̱kʋsh akanlosi, micha chu̱kʋsh yohbi, micha anukhobela sʋlahʋt, iti̱ hullot, it im i̱ nuktaiyalʋt;

Efeshan 5:21

Chihowa i̱ nukshohompa hosh hʋsh it im antiashke.

Filippian 2:14

Nana moma ka ik ahninchot na miha keyu, micha anumpa ita chowa mʋt iksho ho̱ hʋsh yʋmihchashke.

Koloshan 3:12

Yʋmohmi hoka Chihowa im ʋlhtoka nan ashʋchi iksho, holitopa hʋchia hokʋt hiahni, i̱ kana, anukfila akanlosi, chu̱kʋsh yohbi, anukhobela sʋlahʋt nuktaiyala aiena kak o̱ hʋsh foyukashke.

Koloshan 3:8

Yohmi tuk kia himak okʋno hʋchishno ʋt nokowa, nukhobela, i̱ nukkilli, ik ahobalot anumpuli, anumpa isht hofahya, hʋch itih ha̱ akocha ilʋppa moma kak kia hʋsh kanchashke.

1 Timohli 6:4

Ilefehnʋchi isht alotʋt, nan ithana keyu, amba tasimbot nan isht a ponaklo ak bano isht anumpohonli, micha anumpa isht itachowa aiena yʋmmak o̱ a minti hosh nan it i̱ potʋnno, it i̱ nukowa anumpa, kanimanchit isht anumpuli, anukfila okpulo,

1 Pita 3:8

Ai ishtaiyopi ka moyumʋt hʋchim anukfila hʋt ai achʋfa cha, it i̱ nukha̱klot, itibapishi ʋt i̱ hullo chiyuhmit, inla i̱ kanʋt chu̱kʋsh akanlosi mʋt aienashke.

1 Pita 5:5

Yʋmmak i̱ chiyuhmit himita hʋchia hʋt asʋnonchi ya̱ hʋsh im antiashke; a̱hli, moyuma kʋt hʋsh it im antia cha, im anukfila akanlosi ho̱ isht hʋsh shemashke: yohmi ka Chihowa hokʋt ilapunla yano i̱ sanali cha, im anukfila akanlosi yokʋno isht i̱ kana ya̱ ima chatuk oka.