Filippian 2:12 - Chahta Holisso Holitopa 1886

¹² Yʋmohmi ka a̱ holitopa ʋhleha ma! hʋs sʋm antia chatuk ʋt hʋchi takla anta li kak bano keyu, amba himonasi yokak heno ik saksho ka i̱ shahlichit hʋs sʋm antia kʋt, nukshumpʋt wʋnihinchi hosh hʋchishno inli aiokcha̱ya ya̱ hʋsh atahlashke.

Filippian 2:12 Iomraidhean Croise

Atʋloa 119:120

Chi̱ sʋ komuta kak osh sʋn nipi ʋt wʋnni̱hi̱chishke, micha nan ish ʋpehi̱sa ka̱ i̱ sʋ nukshopa hoke.

Atʋloa 2:11

Chihowa ha̱ i̱ nukshopa hosh hʋsh im antiashke, micha wʋnni̱hi̱chi hosh hʋchi yokpashke.

Mahlu 11:12

Yohmi ma Chan Baptist ʋt ahanta nitak atuk a̱ ai ʋhlit mihinti ka, ʋba apehlichika ya̱ ishi bʋnna kʋt achilita fehna, yohmikma achilita puta kʋt onʋtulʋt ihi̱shi na himakʋshke.

Mahlu 11:29

Ʋm ikonla abana yak o̱ isht hʋsh il abanali cha, ʋno ak o̱ hʋs sʋm ai ithʋnashke: ʋno ak osh chu̱kʋsh yohbi, micha chu̱kʋsh akanlosi aiena sia hoka: yohmik mak osh hʋchi shilombish puta a foha hi a̱ hʋsh ahayucha he mak oke.

Apostel isht Anumpa 16:29

Mihma pʋla ha̱ pit hoyo cha, mʋlet pit chukowʋt wʋnihinchi hosh ʋla mʋt, Pal, micha Sailʋs ita tuklo itikba ya̱ ant hlipia tok.

Apostel isht Anumpa 9:6

Yohmi ma yʋmmak ashot nukhlakanchʋt wʋnihinchi mʋt, Chitokaka ma! nanta hak o̱ katiohmi la hi a̱, si sʋm ahni cho? achi tok. Mihma Chitokaka yʋt, Wakaya cha, iʋt tʋmaha ha̱ ont ish chukowakmak o̱, nana ish kaniohma chi̱ kʋt, chim annoa chi̱ hoke; im achi tok.

Loman 2:7

Yohmi kʋt kʋna hosh nuktaiyalʋt achunanchit nan achukma yʋmohmi kʋt, isht a holitopa, micha isht annoa achukma, micha isht ai illa he keyu hoho̱yo hokʋno isht ai okcha̱ya bilia he im apesa hi oke.

1 Kolinhlian 15:58

Yʋmohmi hoka itibapishi li a̱ holitopa ʋhleha ma! hʋsh kʋllo cha ik hʋchi fitekacho kish, ʋlhtoba iksho ka hi osh Chitokaka hʋsh in toksʋli keyu kʋt hʋsh ithaiyana hokʋt, Chitokaka im atoksʋli ya̱ lauachit hʋsh toksahanlashke.

1 Kolinhlian 2:3

Yohmi mʋt isht a hlampko iksho, mihmʋt komunta, micha wʋnihinchi fehna hosh hʋchin takla ya̱ ahanta li tok.

1 Kolinhlian 4:14

Hʋchi hofahyali la he osh ilʋppa puta ka holissochi li keyu, amba ʋm ʋlla a̱ holitopa hʋsh chiyuhmi kʋt ahah! hʋsh aha̱na chi̱ kak o̱ hʋchi̱ miha lishke.

2 Kolinhlian 7:15

Yohmi ka nukshohumpa, micha wʋnihinchi aiena hosh yʋmmak ash hʋsh aiokpʋchi cha, nana ka mominchit hʋsh im antia tuk a̱ ithaiyana momʋt, yʋmmak ash ot im anukfila isht hʋchi̱ kana kʋt in laiyawa atampa hoke.

Efeshan 6:5

Yuka ʋhleha ma! yakni ilʋppak inli haknip isht hʋchi̱ nahullo ya i̱ nukwiyʋt wʋnihinchit, chu̱kʋsh apissali kʋt, Klaist ak inli ho̱ chohmichit hʋsh im antiashke.

Filippian 1:27

Nana hʋsh a kaniohmi kʋt Klaist im anumpa ak o̱ isht ai ʋlhpesa kak banashke: yohmi na onʋt hʋchi pesa li hokmá, keyukmʋt kanima a̱ya li ik saksho hokmá nana kia na hʋchim a kaniohmi puta yʋmmʋt shilombish achʋfa, im anukfila achʋfa hosh ʋbanumpa ai yimmi ka hʋsh it iba foho̱ʋt kʋllot hʋsh hieli ho̱ haha̱klo lashke.

Filippian 1:29

Hʋchishno ʋto Klaist pulla kak o̱ yʋmma hʋsh i̱ yimmi kak bano keyu, amba yʋmma pulla kak o̱ nan isht hʋsh im ilbʋsha he hʋchim ʋlhpisa hoka:

Filippian 1:6

Ilʋppa fehna ka sai yimmi hatuk osh, Nan toksʋli achukma isht a hʋchi wakaya kʋt, ai a̱hlichit Chisʋs Klaist i̱ nitak a̱ hʋch isht ona he, ilʋppa fehna ka sai yimmi hatuk oke.

Filippian 2:19

Yohmi kia chekikma Timohliʋs a̱ hʋchi pila la chi̱, yʋmohmi hosh hʋchi a kaniohmi ka akostininchi lish, sai yukpa chi̱ kʋt, ahnit Chitokaka Chisʋs a̱ anukchieto lishke.

Filippian 4:1

Yʋmohmi ka itibapishi li a̱ holitopa, micha i̱ palata li, isht sai yukpa, micha isht sa holitopa hʋchia ma! kʋllot hikiʋt Chitokaka ya̱ hʋsh ibai achʋfashke, holitopa fehna ʋhleha ma!

Filippian 4:15

Yʋmohmi ka Filippian ʋhleha hʋchia ma! ʋbanumpa hʋt anumpa ʋmmona ka Masetonia ya̱ akohchʋt ia li ma, chʋch nana kia nana isht apela he ʋma na ishi la hetuk ash imma ka yʋmohmi keyu ma, amba hʋchishno ak illa tuk ʋt hʋsh ithaiyanashke.

1 Hlessalonian 1:3

Pin Chitokaka Chisʋs Klaist ibafoyukʋt na hʋchi yimmi kʋt na hʋsh yʋmihchi, micha na hʋsh i̱ hullo aiena kʋt na hʋsh toksahanli, micha ai okcha̱ya pisa he ahnit nuktaiyalʋt hʋsh achunanchi aiena ka Chihowa Pi̱ki itikba ya̱ ithaiyanʋt e bilia hoke:

2 Timohli 2:10

Yohmi ka ai‐okcha̱ya pisa he ʋlhtoka tok ʋhleha atuk pulla kak o̱ na‐palʋmmi puta pihi̱sa li kʋt, yʋmmak kia Chisʋs Klaist ʋt ai‐okcha̱ya ataiyahli tok a̱, micha nan isht a holitopa aiena ka isha chi̱ ka si yʋmohmi hoke.

Heblu 12:1

Yʋmohmi ka nan atokowa anoli puta kʋt hoshonti chinto ka chiyuhmit yakohmi hosh isht a pi apakfoyupa ak inli hokʋt, na weki puta, micha nan ai ashʋchi yʋt nan isht ahomba iksho isht a pi apakfoyupa a moma ka naksika e boyuhli cha, a mʋllela he pit tikba ituyula ka nuktaiyalʋt achunanchit e mʋllihinlashke,

Heblu 4:1

Yʋmohmi hoka im afoha e chukowa he pim issa tok a̱ takali moma hoka, hʋsh kanima kʋt hʋch ik ono ahoba hinla ka, ahah! il ai ahnashke.

Heblu 4:11

Yohmi hoka afoha yʋmma e chukowa chi̱ kʋt il achunanchi fehnashke; ik yimmo hosh itohonla tok a̱sh o̱ chiyuhmit hatak kʋna kia ik itulo kashke.

Heblu 5:9

Mihmʋt nana kʋt ai a̱hlit im ʋlhtaiyaha kak osh, im antia puta hokʋno ai okcha̱yʋt bilia ya̱ im atahli yoke:

1 Pita 2:11

A̱ holitopa ʋhleha ma! nana hʋchim ai ahni li kʋt hatak ik ithano, micha ilap i̱ yakni keyu ai itʋnowa chiyuhmit, haknip imma nan ahni, yʋmmʋt shilombish in tanampi yoka hʋsh i̱ filaha̱mashke:

2 Pita 3:18

Amba isht i̱ kana hʋchi anukfo̱kʋt hʋsh yʋmohmi kʋt i̱ shahlichit ma̱ha̱yʋt, pin Chitokaka pi Okchalinchi Chisʋs Klaist a̱ hʋsh ithaiyana kʋt i̱ shahlichit hʋsh ma̱ha̱yashke. Yʋmmak oka isht a holitopa yokʋt, himonasi, micha himak a pilla ka immit biliashke. Amen.