Efeshan 2:16 - Chahta Holisso Holitopa 1886

¹⁶ Yohmi kʋt ititaiyukhʋna pulla ho̱ tuklo ka haknip achʋfa isht ikbit, yʋmmak o̱ it i̱ nukkilli tuk a̱ ai illichi cha, Chihowa ya̱ it i̱ kanʋcha chi̱ hatok:

Efeshan 2:16 Iomraidhean Croise

Loman 5:10

Yohmi ka in tʋnʋp pia moma kash ot, Ushi yʋt illi tok pulla kak o̱ Chihowa ya̱ isht a il it i̱ nanaiya hatuk okmʋt, il it i̱ nanaiya ha yokʋt, ilap okcha̱ya pulla kak o̱ isht i̱ shahli fehnʋt isht a pi okcha̱ya hinla hoke.

Koloshan 2:14

Nan isht ʋlhpisa ibbak isht holisso a̱ kashofi tok, yʋmmʋt pi̱ sanali, micha pim ai ʋlhpiesa keyu hosh pi ai ititakla hikia tok a̱ ishit kanchit, im ititaiyukhʋna ya̱ ahonʋhlichi tok oke:

Efeshan 2:15

Yohmi kʋt nan isht it i̱ nukkilli nan isht ʋlhpisa yʋt im ʋlhpisa tok, haknip isht ilbʋsha cha, ishit kanchi tok: yohmi hosh tuklo ka hatak himona achʋfa il ai ikbi cha, it i̱ nanaiyʋcha chi̱ hatok:

Kaleshan 2:20

Klaist a̱ ititaiyukhʋna iba takalit sʋlli hoke: yohmi kia si okcha̱ya hoke; yohmi kʋt ʋno ak o̱ keyu, amba Klaist ak osh okcha̱yʋt sa foyuka hoke; himak a̱ okcha̱yʋt haknip a halaia li moma hokʋto, Chihowa Ushi, yʋmmʋt a̱ hullot si ʋlhtobʋt illi tok a̱ i̱ yimmi li hosh si okcha̱ya hoke.

Loman 8:3

Yohmi ka ʋba nan ʋlhpisa yʋt nana ka ik atahlo kʋt, haknip ak atuk pulla kak o̱ ik ai a̱hlo hatuk o̱, Chihowa hʋt ilap Ushi ak inli ho̱ ai ashʋchika isht ʋlhtoba mak o̱ hatak nan ashʋchi haknip a̱ hobachit auet kanchi hosh, haknip ak o̱ ai ashʋchika ya̱ ai i̱ palʋmminchi tok:

Loman 8:7

Haknip nan ai ahni kak o̱ isht ahanta hokʋto Chihowa i̱ nukkilli yoka; yohmi kʋt Chihowa i̱ nan ʋlhpisa ya̱ im antia keyu, micha yohma hi o̱ keyu kamohmi mʋhlishke.

Loman 6:6

Yohmi ka ai ashʋchika haknip ʋt okpulot kʋnia na himak a pilla hokʋno ai ashʋchika yʋno il i̱ yuka he keyu mak o̱, pim anukfila tikba yʋt ititaiyukhʋna yak o̱ yʋmma ibai illi hatok, ilʋppa il ithana hoka.

1 Kolinhlian 10:17

Pishno ʋt pi laua kia, pʋska achʋfa, anonti haknip achʋfa pia hoke; pʋska achʋfa yʋmma momʋt iloh itibai ishi hokʋt.

Efeshan 3:6

Yʋmohmi na Chentail ʋt ʋbanumpa pulla ho̱ iba taklʋt nan ai isha he ʋlhpesa toba, micha haknip ai achʋfa toba cha, Klaist pulla ho̱ nan im ihi̱sa tok a̱ ibai isha he atok:

Efeshan 4:4

Yohmi ka haknip achʋfa, micha Shilombish achʋfa hosh aiasha, yʋmmak inli ho̱ chohmit hʋsh a yʋmohma he hʋchi ʋlhtoka tok ʋt, ai okcha̱ya pisa he hʋsh ai ahni kʋt achʋfa hoke.

Koloshan 3:15

Micha it i̱ nanaiyʋchi Chihowa a minti ʋt hʋchi chu̱kʋsh a̱ foyukʋt nana hʋchim apesashke, yʋmmak a he ak o̱ haknip achʋfa hʋsh toba chi̱ hosh hʋchi ʋlhtoka tok oke: micha yak oke, hʋsh ahnashke.