Efeshan 1:7 - Chahta Holisso Holitopa 1886

⁷ Yʋmmak ash pulla im issish o̱ isht a pi ʋlhtoba mʋt, isht i̱ kana yʋt chinto pulla hatuk mak o̱ nan pim ai ashʋchi yʋt pi̱ kashofa hoke:

Efeshan 1:7 Iomraidhean Croise

Atʋloa 130:4

Yohmih kia chi̱ nukshopa chi̱ kak o̱, nan ʋsshʋchi i̱ kʋshuffi chia hoke.

Atʋloa 130:7

Islael ma, Chihowa ha̱ pit ish anukchietashke; Chihowa hʋt isht i̱ hullo im a̱sha cha, isht a hlʋkuffi mʋt i̱ lawa hoka̱.

Atʋloa 86:5

A̱ Shahli chia hʋt chi̱ pa̱ha̱ya moma ka̱ i̱ kʋshuffih achukma, micha i̱ hullo chinto chia hoka̱.

Eksotʋs 34:7

Tahlepa sipokni hoh kia i̱ nukha̱klot bilia, ik ʋlhpieso, micha anumpa kobʋffi, micha aiashʋchi aiena ka̱ i̱ kashofi, micha anumpa hʋt onʋtola he ʋlhpesa ya̱ hlakoficha he keyu, i̱ki puta ik ai ʋlhpeso atuk mak o̱ im ʋlla ʋhleha puta ka̱, micha ʋlla ʋhleha hash im ʋlla ʋhleha ai iti shali ont atuchina, micha ont ai ushta kia im a̱ya yoke, achi tok.

Mahlu 20:28

Hatak Ushi ʋt ilapo ak o̱ nan isht im ʋtta chi̱ ho̱ a̱ya ha tok keyu: amba nan isht ʋtta chi̱, mikmʋt laua ho̱ ilap im ilhfiopak a̱ isht chumpa chi̱ aiena hosh a̱ya tok a̱, mih mak o̱ hʋsh chiyuhmashke, achi tok.

Mahlu 26:28

Ilʋppak okʋt sʋssish nan isht ʋlhpisa himona, laua kʋt nan ai ashʋchika puta isht i̱ kashofa he mak o̱, hlatapa hatuk oka.

Mahlu 6:12

Mikmʋt nana il aheka puta ish pi̱ kashofi kʋt, pishno ʋt nana pim aheka puta il i̱ kashofi chatuk a̱ ish chiyuhmichashke.

Mark i̱ Holisso 14:24

Mihma, Ilʋppʋt sʋssish nan‐isht‐ʋlhpisa himona hosh la̱wa ka i̱ fohopa mak oke.

ʋBanumpa Luk Ʋt Holissochi Tok 24:47

Micha ile kostinincha he, mikmʋt ai ashʋchika puta isht a kashofa he aiena kʋt yʋmma hohchifo ho̱ isht anumpa kʋt, ʋmmona ka Chelusalem ak o̱ ai isht ia hosh, oklushi moma isht im anumpa hi oke, achi hosh yakohmit holihi̱so hoke.

Chan 20:23

Kʋna im ai ashʋchika yo̱ hʋsh i kashofi hoka, i̱ kashofa he mak oke; mikmʋt kʋna im ai ashʋchika yo̱ hʋch ik i̱ kashofo hokma, ik i̱ kashofo ka he mak oke, im achi tok.

Apostel isht Anumpa 10:43

Yʋmmak o̱ hopaii moma kʋt, yʋmma hohchifo pulla hatuk mak o̱, kʋna ho kia i̱ yimmi hokʋt ai ashʋchika puta kʋt isht a kashofa ahayucha hi a̱, atokolit okla anohonli tok; achi tok.

Apostel isht Anumpa 2:38

Yʋmohmi ma Pita yashot, Hʋsh moma kʋt ile kostininchit, nan ai ashʋchika puta isht kashofa chi̱ ka, Chisʋs Klaist hohchifo ha̱, im a hʋchi baptismashke; yohmikmʋt Shilombish Holitopa holhpila ka hʋsh isha he mak oke.

Apostel isht Anumpa 20:28

Yʋmohmi hoka hʋchishno akinli, micha nan iaka̱ya ʋhleha moma, Shilombish Holitopa yʋt mihi yo̱ apesʋchi puta hʋch ikbi tok a̱, ahah! ahnit Chihowa im iksa puta ilap im issish akinli ho̱ isht chumpa tok a̱, mominchit hʋsh pehlichashke.

Apostel isht Anumpa 3:19

Yʋmohmi hoka ile kostininchit im anukfila inla hʋchi anukfohkashke; yʋmohmi na nitak hochukma Chitokaka itikba a mihinti kʋt ahanlakma, nan hʋsh ai ashʋchika puta kʋt hʋchi̱ kashofa hi oke.

Loman 2:4

Micha Chihowa isht chi̱ kana ya̱ isht ish ile kostinincha he atuk ʋt chik ithaiyano hosh, isht chi̱ kana fehnʋt, chim ile salalit, na palʋmmi chi onocha hi osh ile halanli aiena ka ish shitelama cho?

Loman 3:24

Chisʋs Klaist ʋt isht ʋlhtoba ya̱ atobbi tok pulla mak o̱, Chihowa isht i̱ kana ya̱ pilla isht ai im ʋlhpiesa hatuk oke:

Loman 3:25

Yʋmmak oka im issish a̱ anukchieto hokmak o̱, Chihowa hʋt haiakʋchi tok; yohmi hosh Chihowa hʋt na palʋmmi onocha hi osh ile halanlit, tikba nan ai ashahanchi tok a̱ i̱ kashofi kʋt, nan isht ai ʋlhpiesa otʋnincha hi osh yʋmohmi tok:

Loman 9:23

Micha ilap isht a holitopa la̱wa fehna ka i̱ nuk ha̱klo onʋtuyula he nan ai ʋlhto puta, yʋmmʋt isht a holitopa pisa hi o̱ tikbanli im ataiyahli hatok ʋt, pishno yak fehna ka pi hoho̱yo hatok; Chu okla hak bano keyu, amba Chentail okla hak kia ai isht otʋnincha he ai ahni hatok okma, nanta katihmi cho?

1 Kolinhlian 1:30

Yohmi kia hʋchishno ʋto yʋmmak atuk mak o̱ Klaist Chisʋs a̱ hʋsh ibai achʋfa ka yʋmmak o̱ Chihowa pulla kak o̱ isht pi a hopoyuksa, micha isht pi ai ʋlhpiesa, micha isht pi a kashofa, micha isht pi ai ʋlbi yoke:

2 Kolinhlian 8:9

Hʋpin Chitokaka Chisʋs Klaist, yʋmmak okʋt nan in laua yatuk kia, hʋchishno pulla kak o̱ ilbʋsha yo̱ toba tok; yʋmmʋt nan ilbʋsha pulla hatuk mak o̱ na hʋchin laua chi̱ hatok ʋt hʋsh ithana hoke.

Efeshan 1:14

Yʋmmak okʋt nana il ai isha he ʋlhpesa ka il isha he atokowa isht ʋlhpisa hosh ma̱ha̱ya tuk o̱ falaminchit chumpʋt a pim atahli tok a̱ il ishi na, yʋmma im a holitopa yʋt isht annoho̱wak mak a he oke.

Efeshan 1:18

Nan isht hʋsh anukfilli i̱ holhponayo yʋt in tohwikeli na, ai okcha̱ya hʋsh pihi̱sa hi o̱ hʋchi atokoli kʋt kaniohmi, micha ʋbanumpa yimmi a̱hli ya̱ isht a holitopa chinto il ai isha hi ʋt kaniohmi,

Efeshan 1:6

Yohmi kʋt isht i̱ kana chinto yʋt isht anno̱howa he, yʋmmak pulla ho̱ Holitopa achʋfa yʋmma a pi ahninchi tok.

Efeshan 1:8

Yohmi kʋt hopoyuksa biekʋt im anukfila chinto hosh, isht i̱ kana yʋmma chitolechit pihi̱ma tok oke;

Efeshan 2:4

Yohmi tok kia Chihowa nan i̱ nukha̱klo chinto im ai ʋlhta̱yak pulla hosh, nan isht i̱ hullo chito ho̱ isht pi̱ hullo hatuk osh,

Efeshan 2:7

Yohmi hosh himak a pilla ma Klaist Chisʋs pulla ho̱ pi̱ nukha̱klo tuk ʋt, isht i̱ kana chinto fehna ka isht otʋnincha chi̱ hatok.

Efeshan 3:16

Isht im a holitopa chinto fehna ka hʋch ima na, imi Shilombish ʋt chu̱kʋsh isht hlampko isht hʋchi hlampkohonchi;

Efeshan 3:8

Ʋno ʋt ʋbanumpa yimmi moma ik lauwo ka ik a lauwo sia hoh kia, isht i̱ kana ilʋppa ʋma na Klaist nan isht yukpali kʋna hosh ithʋnʋt hlopullicha he keyu a̱, Chentail a̱ isht im anumpuli la hi atok.

Filippian 4:19

Yohmi ka an Chihowa holitopa fehna kʋt Chisʋs Klaist pulla kak o̱ nana a hʋchi bʋnna moma ka hʋchim atahla hi oke.

Koloshan 1:14

Yʋmmak o̱ im issish isht ʋlbi ai okcha̱ya, nan ai ashʋchi isht kashofa mak o̱ il eshi hoke:

Koloshan 1:27

Yʋmmak ash o̱ Chihowa hʋt anumpa luma hatok ilʋppak ash isht a holitopa chinto kʋt Chentail ai itintakla otʋni kʋt kaniohmi ka im otʋnincha he ai ahni tok; yʋmmʋt Klaist hʋchi anukfoyuka a holitopa isha he isht ai ahni yoke.

Koloshan 2:13

Yohmi kʋt hʋchishno ʋt nana hʋsh ai ashʋchi isht illi, micha hʋchi haknip hakshup ik tapo atuk a̱ nana hʋsh ai ashʋchi puta ka hʋchi̱ kashofi cha, yʋmmak ash iba ta̱klʋchit hʋchi okchalinchi tuk oke:

Koloshan 2:2

Yʋmohmi ho̱ chu̱kʋsh ʋt it i̱ hullot itʋshekonompa hosh chu̱kʋsh ʋt hopoho̱hlashke: yʋmohmi hosh ai yimmi a̱hli isht ai yukpa chinto ka ai a̱hlit ithana he, yohmi hosh Chihowa yʋmmʋt I̱ki, micha Klaist isht anumpa luma hatok ma otʋnihincha he ak atok;

1 Timohli 2:6

Yʋmmak okʋt moma ka ʋlhtoba mak osh ilap inlit il im issa kʋt, anumpa a̱hli ilʋppʋt ont ai ʋlhpiesakma anoho̱wa hi a tok oke.

Titus 2:14

Yohmi kʋt yʋmmak ash osh ai ashʋchika puta ka a pi hlakofihinchi cha, pi kashofi na ilap immi okla holitopa fehna e toba cha, nan toksʋli achukma puta ka a yiminta hosh isht il ahanta he mak o̱, pi ʋlhtoba hosh illi tok.

Titus 3:6

Yohmi kʋt yʋmmak ash o̱ Chisʋs Klaist pi okchalinchi yʋt nan atahli tok ak pulla kak o̱, lauachi fehna hosh pi o̱ fohobli tok:

Heblu 9:22

Yohmi ka ʋba nan ʋlhpisa yak atuk pulla mak o̱ nan oklu̱ha kʋt moma chohmit issish isht a kashofa hoke; micha issish hlatahampa keyu hokʋno nan ai ashʋchika isht a kashofa iksho hoke.

1 Pita 2:24

Yʋmmak osh nan il ai ashʋchika ya̱ ilap haknip fehna ak o̱ ilap inlit il onochi hosh iti ya̱ takali tok: yohmi ho̱ nan ai ashʋchika puta il im ihinli hosh, nan ai ʋlhpiesa ya̱ il im okcha̱ya chi̱ ha tok: yʋmmʋt fahama tok ak o̱ isht hʋchi hlakofi hoke.

1 Pita 3:18

Yohmi ka Klaist ak kia himonna ma nan ai ashʋchika pulla kak o̱ ai ʋlhpesa yʋt ik ai ʋlhpeso yak o̱ ʋlhtobʋt isht ilbʋsha tok; yohmi hosh pi pehliechit Chihowa ya̱ isht pim ona chi̱ ha tok: haknip okʋto illi ha tok kia, amba shilombish okʋto okcha̱ya tok:

1 Chan 2:12

Ʋlla chipunta hʋchia ma! yʋmma hohchifo pulla ho̱ na hʋchim ai ashʋchika yʋt isht a hʋchi kashofa hatuk oka, pit hʋchi̱ holissochi lishke.

1 Chan 2:2

Yʋmmak osh na pim ai ashʋchika ya̱, ʋlhtoba kʋt pishno pimmi hak bano keyu, amba yakni moma nan ashʋchi aiena ka oklu̱ha ʋlhtoba mak oke.

1 Chan 4:10

Pishno ak osh Chihowa ya̱ il i̱ hullo tok o̱ keyu, amba ilap ak osh pishno a̱ pi̱ hullo cha, na pim ai ashʋchika yʋt isht ʋlhtoba hi a̱, Ushi a̱ auet kanchi tok ilʋppak osh nan i̱ hullo mak oke.

Nan Otʋni 14:4

Ilʋppak ash osh ohoyo nana kia isht a liteha tok keyu ʋhleha hoke; ohoyo himithoa hatak haleli keyu ho̱ chiyuhmi ʋhleha hoke. Ilʋppak ash osh Chukfʋlhpobushi, yʋmmʋt kanima yo̱ ia hoh kia, iakaiya ʋhleha mak oke. Ilʋppak o̱ hatak puta ai itintakla a kohchit chumpa tok o̱, Chihowa, micha Chukfʋlhpobushi ita tuklo ka immi nawaya ʋmmona ʋhleha hoke.

Nan Otʋni 5:9

Micha taloa himona ka okla taloho̱wa kʋt, Chishno ak osh chilli hosh oklushi ilaiyuka, im anumpa ilaiyuka puyuta, hatak okla moma a kohchi hosh Chihowa immi e toba chi̱ ka, chishno chim issish ak o̱ isht ish pi chumpa hatuk; yohmi hosh Chihowa ha̱ na holitompa isht imʋtta, micha mi̱ko ʋhleha aiena ka ish pikbi tok: atuk o̱ yakni pakna ka a mi̱kot il ai asha chi̱ hoka, Chishno ak osh holisso hash ish ishi cha, isht ashana yash ish tiwa he ʋt a chim ʋlhpiesa hoke, ahanchi tok.