Choshua 4:10 - Chahta Holisso Holitopa 1886

¹⁰ Na holitompa isht asha itombi holitopa yash shoyuli hatuk ʋt Chatan iklʋna ya̱ hieli na, Chihowa ʋt nana im apesa ho̱ Choshua ʋt okla ha̱ im anumpohonli tuk a̱ ont ʋlhtaha tok; yʋmmʋt Moses ʋt Choshua i̱ miha tok mak atok; yohmi ho̱ okla hʋt tu̱shpʋt tanʋbli tok.

Choshua 4:10 Iomraidhean Croise

Atʋloa 119:60

Chim ʋnnumpah ʋlhpisa putta ka̱ hulittobli la chi̱ kʋt, ak ahchibalo hosh tu̱shpa lih chatuk oke.

Eksotʋs 12:39

Mihma tansh yamʋska Echip ai ishit kohcha ka̱ ik shatʋmmo hatuk oka, pʋska luboa ik shatʋmmo nunachi tok; Echip a̱ kocha pit tihleli, mihma a̱sha he keyu hatuk okʋt, micha ilhpak kia ik ila tahlo tuk atok.

2 Kolinhlian 6:2

Ai okpancha he nitak ʋt takali ma chi haha̱klo li tok; anonti isht ai okcha̱ya nitak ʋt takali ma chi on chʋfʋt chi apelahanchi li tok, yʋmmʋt achi hoka: yohmi hoka yakeh! himonasi ya̱ aiokpahancha he nitak ʋt takali hoke; yakeh! himonasi yak osh isht ai okcha̱ya he nitak ʋt takali hoke.

Tutelonomi 31:9

Mihmʋt Moses ʋt nan ʋlhpisa ilʋppa holissochi cha, Lefai ushi ʋhleha naholitompa isht asha Chihowah nan itim apesa a fohka itombi holitopa sholi tuk a̱, micha Islael im asʋnonchi moma ka̱ ibbak fohki tok.

Choshua 24:11

Mihma Chatan a̱ hlopullit Cheliko ya̱ hʋsh la tok oke; mihma Cheliko okla Amolait ʋhleha, micha Pelissait ʋhleha, micha Kenanait ʋhleha, micha Hitait ʋhleha, micha Kikashait ʋhleha, micha Hifait ʋhleha, micha Chebusait ʋhleha aiena kʋt hʋchin tanampi tok; mihma hʋch ibbak fohki li tok oke.

Choshua 3:13

Atukma yakohma chi̱ hoke, na holitompa isht asha Chihowa, yakni moma in Chihowa im itombi holitopa shoyuli hatuk iyi pʋtha yʋt Chatan okhina ya̱ oka hika mak inli ho̱, Chatan oka yʋt ita hokofa na, oka ibetʋp imma minti hatuk ʋt itʋnahachit hikia chi̱ hoke, achi tok.

Choshua 4:11

Atuk o̱ yakohmi tok, okla hʋt momʋt tanʋblit taiyaha ma, okla hʋt pi̱sa ho̱, Chihowa im itombi holitopa, micha na holitompa isht asha aiena kʋt tanʋbli tok.

Choshua 4:9

Mihma Choshua ʋt Chatan iklʋna na holitompa isht asha Chihowa nan it im apesa ʋt afoyuka itombi holitopa shoyuli iyi yʋt a hieli tuk a̱ tʋli auah tuklo ho̱ hiohlichi tok: yohmi tok o̱ himak nitak kia yʋmma aiashʋshke.