Choshua 2:9 - Chahta Holisso Holitopa 1886

⁹ Hatak tuklo kash o̱, Yakni ya̱ Chihowa ʋt hʋch ima tok a̱ ithana lishke; yohmi ho̱ isht a hʋchi̱ nukshopa yʋt pi onʋtoyulʋshke; hʋchishno ak atuk pulla mak o̱ yakni ilʋppa okla ai asha tuk moma kʋt bihinla chiyuhmishke.

Choshua 2:9 Iomraidhean Croise

Genesis 35:5

Micha bina ha̱ kanʋllichi cha ilhkoli tok: mihma tʋmaha holihta apakfoyupʋt aiasha ka̱ Chitokaka i̱ nukshopa kʋt onʋtonla hatuk o̱, Chekob ushi ʋhleha ha̱ ik hliolo tok.

2 Samuel 17:10

Mikma hatak chilita nukwia iksho chu̱kʋsh ʋt koi chito itilaui kash kia bilʋt kʋnia hi oke: chi̱ki ʋt hatak chilita, micha apehʋt okla aiasha kʋt hatak chilita nukwia iksho ka Islael moma kʋt ithana hokʋt.

2 Mi̱ko 5:15

Mihmʋt i̱ bina ai achʋfa yash momʋt falamʋt Chitokaka immi hatak ash im ona cha, itikba ya̱ hieli tok: micha, Yakeh! yakni moma ka Chitokaka yʋt iksho, amba Islael takla ak illa hoka ithaiyana lishke: yʋmohmi ka himak a̱ nan ishit yukpali ya̱ chin tishu ha̱ ish im ishashke, chim asilhha lishke, achi tok.

2 Mi̱ko 7:6

I̱ shahli hʋt Silia tʋshka chipota yash itichanʋlli puta, micha issuba puta, tʋshka chipota laua yʋt a̱ya ohmi ho̱ haklochi tuk oka; mihma, Yakeh! Islael i̱ mi̱ko ʋt Helh okla i̱ mi̱ko ʋhleha, micha Echip i̱ mi̱ko ʋhleha ha̱ tohno tuk o̱, ant pitiba chi̱ hoke, okla itim achi tok.

Atʋloa 112:10

Hʋttak ik ʋlhpeso ʋt pesa cha, im okpula hi oke; in nuti ya̱ killisli̱hi̱chi cha, bilʋt kʋnia hi oke; hʋttak ik ʋlhpeso ʋhlehah nan ahni ʋt ont okpulot taha hi oke.

Atʋloa 115:16

Ʋba putta kʋt Chihowa hak o̱ immi hoke, amba yakni yokʋno hʋttak im ʋlla ʋhleha ha̱ ima tok oke.

Eksotʋs 18:11

Himak a̱ Chihowah ak osh naholba puta moma i̱ shahli ka̱ ithana lishke; nana ka̱ ilefehnʋchi hosh yʋmohmi tuk a̱ i̱ shahli hoka, achi tok.

Eksotʋs 23:27

An nukshopa ka̱ chi tikba ya̱ pila likmʋt, okla moma ish im ona ka̱ ishit kanchi la chi̱ hoke; micha chin tʋnʋp moma ka̱ chi̱ filʋmmichi la hi oke.

Numbas 20:14

Mihma Moses ʋt Katesh a̱ ʋttʋt anumpa shali ʋhleha ha̱ ha̱ Etom i̱ mi̱ko ya̱ pit i̱ pilʋt, Chitibapishi Islael ʋt yak achishke, nan isht ilbʋsha pi onʋtoyula moma ka̱ ish ithanʋshke.

Numbas 20:24

Alon ʋt im okla ha̱ ont ibafohka chi̱ hoke, oka Melibah ya̱ ʋm anumpa ha̱ i̱ sanalit hʋsh filʋmmi tuk oka, yakni Islael im ʋlla ʋhleha ima li tok a̱ chukowa he keyu hoke.

Mahlu 20:15

Ʋno ʋmmi hatuk ʋt ʋno nana aiahni li hosh kanimihchi la hi ʋt ʋm ʋlhpesa keyu̱? ʋno ak osh si achukma kak o̱, chi nishkin ʋt ik ʋlhpeso hoh cho? achi tok.

Tutelonomi 11:25

Hatak nana kia hʋchi tikba ya̱ hikia he keyu ka chi̱ hoke; hʋchin Chitokaka Chihowah yʋt hʋchim achi tuk mak osh, yakni hʋsh ano̱ho̱wa moma ka̱ hʋchi̱ nukshopa, micha hʋchi̱ komunta aiena ka̱ onocha chi̱ hoke.

Tutelonomi 2:25

Himak nitak a̱ oklushi puta shutik nutaka aiasha kʋt, chi annowa ka̱ haklo puta ka̱ chi̱ komunta, micha chi̱ nukshopa onochit ishtia likma, chishno pulla kak o̱ wʋni̱hinchi cha, komi̱hincha chi̱ hoke, achi tok.

Tutelonomi 28:10

Mikma okla moma yakni paknaka aiasha kʋt Chihowah hohchifo ak o̱ ishit chi hohchifo ka̱ ithaiyana hi oke; micha chi̱ nukshopa hi oke.

Tutelonomi 32:8

Chaha Moma i̱ Shahli ʋt oklushi puta ka̱ i̱ yakni ya chi̱ ho̱ ita kʋshkoli tok, Alam ushi ʋhleha ha̱ ita filʋmmichi mʋt, Islael im ʋlla ʋhleha ho̱lhtina ha tuk mak o̱, okla im ai ʋhli ya̱ apesa tok.

Heblu 11:31

Na yimmi pulla kak osh Lehab ohoyo haui yatuk ʋt, yimma he keyu ʋhleha hoka ibafo̱kʋt illi tok keyu, na ti̱kba pisa ʋhleha hoka i̱ kanʋt ilap in chuka yoka ik chukowá, im ahni hatok okʋt.

Choshua 2:11

Hʋchishno ak atuk pulla mak o̱ nana ilʋppa puta ka e haklo mak inli ho̱, pi chu̱kʋsh ʋt bihinla tok; yohmi na hatak kanima kia chilitʋt im anukfila kʋt i̱ fo̱ka kia iksho ki tok: Chitokaka hʋchin Chihowa yʋmmak osh peh pakna ʋba a holitopa, mikmʋt nutaka yakni aiena ka in Chihowa hoka.

Choshua 2:24

Mihmʋt yʋmmak ash osh Choshua ya̱, Chihowa ʋt yakni moma pibbak a̱ fohki tuk pullʋshke: pishno ak atuk pulla mak o̱ yakni yʋmma ai asha kʋt momʋt bihinla chiyuhmi hoka, im achi tok.

Choshua 2:8

Yohmi tuk o̱ tʋshkit ik oklo ki̱sha ho̱, aboha pakna ya̱ ohoyo hash osh im ai ona cha;

Choshua 5:1

Atuk o̱ yakohmi tok, Amolait okla i̱ mi̱ko ʋhleha Chatan hʋshi ai okatula imma aiasha tuk, micha Kenanait okla i̱ mi̱ko ʋhleha okhʋta lapalika ai asha tuk aiena kʋt, Chihowa ʋt Chatan oka ya̱ Islael im ʋlla ʋhleha itikba ya̱ a shilelit tahli na tanʋblit e taha tuk a̱ haklo mʋt, chu̱kʋsh ʋt bihinla tok; micha Islael im ʋlla ʋhleha hak a tok pulla mak o̱ himmakma hatak nana kia chilitʋt im anukfila kʋt iksho kamohmi tok.

Choshua 6:2

Yohmi ho̱ Chihowa ʋt Choshua ya̱, Cheliko, micha yʋmma i̱ mi̱ko, mikmʋt tʋshka hlampko hochukma, chilitʋt nukwia iksho ʋhleha aiena ka moma chibbak a̱ fohki li ka ish pisashke, im achi tok.

Choshua 9:10

Micha Chatan mish‐tʋnnʋp Amolait okla i̱ mi̱ko tuklo, Heshbon i̱ mi̱ko Sihon, micha Bashan i̱ mi̱ko Ok Ashtalolh ʋtta aiena ka kaniohmichi tuk puta ka e haklo hatuk osh.

Choshua 9:24

Mihma afalamichit Choshua ya̱, Chitokaka chin Chihowa ʋt in tishu Moses a̱ im apesʋt, yakni moma ka hʋch ima cha, okla chi tikba aiasha moma ka ʋbit tahla he miha tok a̱ chin tishu ʋhleha hʋt haha̱klo pulla ak atok: yohmi kak o̱ hʋchishno pulla kak o̱ pim ilhfiopak isht pi nukshopa fehna hatuk osh, ilʋppa e yʋmihchi tuk oke.

Choshua 9:9

Mihma, Yakni hopaki fehna ho̱ minti hosh Chitokaka chin Chihowa hohchifo pulla kak o̱, chin tishu ʋhleha hʋt ʋla hoke: Echip a̱ kaniohmihinchi tok puta kʋt annoa,

Nan Apesa 7:14

Mihma ilap ai achʋfa yʋt afalamichi mʋt, Ilʋppʋt inla keyu, amba Kiteon Choash ushi, Islael hatak i̱ bʋshpo falaia mak oke: Chitokaka yʋt Mitian, micha in tʋshka chipota moma ka ibbak a̱ fohki hoka, achi tok.