Choshua 2:4 - Chahta Holisso Holitopa 1886

⁴ Mihma ohoyo hash osh hatak tuklo kash o̱ ishit luhmi tok; yohmi cha ilʋppak o̱ achi tok, Hatak okʋto ʋm ʋla mʋhli tuk, yohmi kia kanima a minti ka ak ithano ke tuk:

Choshua 2:4 Iomraidhean Croise

2 Mi̱ko 6:19

Mihma Elisha yʋt, Hina yʋt ilʋppak keyu, micha tʋmaha hʋt ilʋppak keyu hoke; hʋs siakaiya na hatak hʋsh hoyo ka hʋch isht ona lashke, im achi tok. Atuk ak osh pehliechit, Samalia ak o̱ isht ona tok.

Eksotʋs 1:19

Mihma ʋlla eshi ka̱ apesʋchi ohoyo hash osh Falaoh ha̱, Heblu ohoyo ʋhleha hʋt Echip ohoyo ʋhleha ha̱ chohmi keyu hoka; tu̱shpa hatuk osh ʋlla eshi ka̱ apesʋchi ohoyo ʋhleha hʋt ik im ono ki̱sha ho̱, ʋlla eshi hoke, im achi tok.

Chemis 2:25

Yohmi ka yʋmmak inli chohmi hosh ohoyo haui Lehab ʋt nan isht ahanta ilʋppa pulla hosh okla yakni pisʋt a̱ya tuk a̱ pehlichit ishi tuk osh, hina inla ha̱ pit tihleli hosh isht ai ʋlhpiesa tok keyu̱?

Choshua 2:3

Yohmi ma Cheliko i̱ mi̱ko ash osh Lahab a̱ anumpa i̱ pilʋt, Hatak chim ʋlʋt chin chuka chukowa tuk a̱ ish kohchashke: yʋmmʋt yakni moma ka pisʋt tahla chi̱ hosh a̱ya hatuk oka, pit im achi tok.

Choshua 2:5

Atuk osh yakohmi tuk, okhlilit taha holihta okhissa yʋt ʋlhkʋma chi̱ foka ma, hatak tuklo kash osh kohcha tuk oke: kanima ho̱ hatak tuklo kash osh ia tuk a̱ ak ithanoshke: chekosi hʋsh iakaiyashke; hʋsh sakka hinla hokʋt.

Choshua 6:17

Tʋmaha holihta yʋmmak fehna, mikmʋt yʋmma anu̱kaka ai asha aiena kʋt Chihowa hak o̱ nan isht ai im ʋlhpisa chi̱ mak oke; ohoyo haui Lahab ak illa, yʋmma, micha api̱hʋt in chuka ma̱ya tuk moma kʋto, hatak na pisa e tihleli tuk o̱ a̱ya ka luhmi tuk okʋt okcha̱ya chi̱ hoke.

Choshua 6:25

Mihma Choshua ʋt hatak Cheliko yakni pisa chi̱ ho̱ tihleli na a̱ya tuk a̱ luhmi tuk atuk o̱ Lahab ohoyo haui ash micha i̱ki in chuka achʋfa, micha immi hatuk aiena ka Choshua ʋt okchalinchi tok; yohmi tuk o̱ Islael okla ha̱ iba taklʋt a chukʋt ahanta na himak nitak a̱ ant ai ʋhli hoke.