Choshua 2:11 - Chahta Holisso Holitopa 1886

¹¹ Hʋchishno ak atuk pulla mak o̱ nana ilʋppa puta ka e haklo mak inli ho̱, pi chu̱kʋsh ʋt bihinla tok; yohmi na hatak kanima kia chilitʋt im anukfila kʋt i̱ fo̱ka kia iksho ki tok: Chitokaka hʋchin Chihowa yʋmmak osh peh pakna ʋba a holitopa, mikmʋt nutaka yakni aiena ka in Chihowa hoka.

Choshua 2:11 Iomraidhean Croise

Tutelonomi 4:39

Yʋmohmi hoka, himak nitak a̱ ish ithaiyanashke, micha chi chu̱kʋsh a̱ isht ish anukfillashke; Chihowah ak osh ʋba yakni, micha nutaka yakni aiena ka̱ yʋmmak osh Chitokaka yoke, inla kʋt iksho hoke.

Choshua 5:1

Atuk o̱ yakohmi tok, Amolait okla i̱ mi̱ko ʋhleha Chatan hʋshi ai okatula imma aiasha tuk, micha Kenanait okla i̱ mi̱ko ʋhleha okhʋta lapalika ai asha tuk aiena kʋt, Chihowa ʋt Chatan oka ya̱ Islael im ʋlla ʋhleha itikba ya̱ a shilelit tahli na tanʋblit e taha tuk a̱ haklo mʋt, chu̱kʋsh ʋt bihinla tok; micha Islael im ʋlla ʋhleha hak a tok pulla mak o̱ himmakma hatak nana kia chilitʋt im anukfila kʋt iksho kamohmi tok.

Choshua 7:5

Mihma Ai okla hash osh pokoli tuchina akucha hannali foka ho̱ ai ʋbi tok: holihta okhissa itikba a hliolit isht ia mʋt, Shebalim a̱ isht ona hatuk osh takla ya̱ okʋtahʋt ia ka ai issot kanchi tok: yohmi hatuk o̱ okla chu̱kʋsh ʋt bilʋt oka yo̱ chiyuhmi tok.

Atʋloa 102:15

Mikma̱ oklushi putta kʋt Chihowa hohchifo ha̱ i̱ nukshopakma̱, yakni i̱ mi̱ko moma kʋt chim ahulittopa ya̱ hulittoblashke.

Atʋloa 83:18

Mikma̱ chishno chi hohchifo hʋt Chihowa, chishno ak illa hosh chi chaha kʋt yakni momah i̱ Shahli chia hatuk a̱ oklah ithanashke.

1 Mi̱ko 8:60

Yohmi ho̱ okla moma yakni paknaka aiasha kʋt, Chihowa ak osh Chitokaka ya, mikma inla ʋt iksho ka ithaiyanashke.

Nan Otʋni 6:16

Mihmʋt nʋnih chaha puta, micha tʋli hochito aiena kash o̱, Auet hʋsh pi o̱ kinahli cha, ai o̱ binili holitompa o̱ binili ka̱ i̱ nashuka, micha Chukfʋlhpobushi nan isht i̱ nukkilli aiena hatuk ma pisht hʋsh i̱ luhmashke.

Atʋloa 22:14

Oka yo̱ chohmit sʋ hlatʋpʋshke; mikma̱ sʋf foni poiyutta kʋt tʋhlohlishke; sʋ chu̱kʋsh ʋt foi akmo yo̱ chohmit sʋkfoka iklʋnna ya̱ a bilʋshke.

Choshua 14:8

Yohmi kia itibapishi li ʋhleha si api̱hʋt ia tuk ʋt okla chu̱kʋsh a̱ bileli tok: amba ʋno ʋto Chitokaka an Chihowa ya̱ ai oklu̱hʋt iakaiya li tok.

Tutelonomi 20:8

Mikmʋt ʋlhtoka ʋhleha hʋt achakalichit okla ha im anumpulit, Hatak nanta hosh nukshopa, micha chu̱kʋsh elli cho? yʋmmak okʋt falamʋt in chuka iashke, keyukma chu̱kʋsh elli ka̱ chohmit itibapishi ʋhleha hʋt chu̱kʋsh elli na, acha hi oke.

Tutelonomi 1:28

Katima hak o̱ il ia chi̱ cho? pitibapishi ʋhleha hʋt, Okla hatak hochito, micha chaha kʋt pi̱ shahli hoke; tʋmaha holihta ʋt hochito, micha aholihta kʋt shutik a̱ ona hoke; micha Anakim ushi ʋhleha ha̱ yʋmma il api̱sa tuk oke, achit pi chu̱kʋsh a̱ iellichishke, hʋsh achi tok.

Eksotʋs 15:14

Okla hʋt haklo cha, nukshopa hi oke; Palestina aiasha okla ha̱ nukha̱klo yosh chu̱kʋsh a̱ isha hi oke.

Eksotʋs 15:15

Yohmi ma Etom holitopa ʋhleha hʋt nukhlakancha hi oke; Moab hatak kʋllo ʋhleha ha̱ wʋnihinchi yosh onʋtola hi oke, Kenan aiasha okla hʋt momʋt bilʋt tʋmoa hi oke.

2 Mi̱ko 5:15

Mihmʋt i̱ bina ai achʋfa yash momʋt falamʋt Chitokaka immi hatak ash im ona cha, itikba ya̱ hieli tok: micha, Yakeh! yakni moma ka Chitokaka yʋt iksho, amba Islael takla ak illa hoka ithaiyana lishke: yʋmohmi ka himak a̱ nan ishit yukpali ya̱ chin tishu ha̱ ish im ishashke, chim asilhha lishke, achi tok.

Atʋloa 58:7

Bilʋt taha kʋt oka yosh yʋnʋllit kʋnia ka̱ chohmashke; im uskinʋki ya̱ o̱ hili̱hi̱chit hu̱ssa hoh kia, tʋptuʋt yushtumushli yak o̱ chiyuhmashke.

Choshua 2:24

Mihmʋt yʋmmak ash osh Choshua ya̱, Chihowa ʋt yakni moma pibbak a̱ fohki tuk pullʋshke: pishno ak atuk pulla mak o̱ yakni yʋmma ai asha kʋt momʋt bihinla chiyuhmi hoka, im achi tok.

Choshua 9:24

Mihma afalamichit Choshua ya̱, Chitokaka chin Chihowa ʋt in tishu Moses a̱ im apesʋt, yakni moma ka hʋch ima cha, okla chi tikba aiasha moma ka ʋbit tahla he miha tok a̱ chin tishu ʋhleha hʋt haha̱klo pulla ak atok: yohmi kak o̱ hʋchishno pulla kak o̱ pim ilhfiopak isht pi nukshopa fehna hatuk osh, ilʋppa e yʋmihchi tuk oke.