Choshua 13:3 - Chahta Holisso Holitopa 1886

³ Siho, yʋmmʋt Echip itikba talaia ka ʋttʋt ia hosh falʋmmi pilla Eklon, yʋmmʋt Kenanait im aholhtina ya̱ ont ʋhli: Filistin okla i̱ hochitoka tahlapi, Kasahlait ʋhleha, micha Ashtohlait ʋhleha, Eshkalonait ʋhleha, Kittait ʋhleha, micha Eklonait ʋhleha, Afait ʋhleha ak kia aiena:

Choshua 13:3 Iomraidhean Croise

Genesis 10:6

Mikma Ham ushi ʋhleha hʋt Kush, micha Mislaim, micha Fut, micha Kenan ak atok.

Genesis 15:18

Mih nitak fehna Chihowah yʋt Eblam a̱ nana itim apesʋt, Echip okhina yak o̱ aiʋhlit ia hosh okhina chito Euflates okhina ont ʋhli;

1 Mi̱ko 8:65

Nitak yʋmma Solomon, micha Islael moma kʋt apehʋt, okla chito, Hamalh ont a chukowa ka ʋttʋt ia hosh Echip okhina ya̱ ont ʋhli hosh, pin Chitokaka Chihowa itikba ya̱, nitak untuklo cha nitak untuklo, nitak auah ushta ʋlhpiesa ho̱ impʋchi ha̱ isht aiasha tok.

Tutelonomi 2:23

Mihma Afim ʋhleha yʋmmʋt Haselim a̱ aiashʋt Assa ont ʋhli tuk a̱, Kaftolim yʋmmʋt Kafto ashʋt kohcha tuk ʋt ai ishit kanchi cha, ʋlhtobʋt aiasha tok.

Choshua 13:13

Yohmi kia Islael im ʋlla ʋhleha hʋt Keshulait ʋhleha, micha Maachahlait ʋhleha ha̱ aieninchit tihlelit ik kocha wehlo tok; amba Keshulait ʋhleha, micha Maachahlait ʋhleha aiena kʋt Islael a̱ apehʋt aiasha na himak nitak a̱ ant ai ʋhli hoke.

Nan Apesa 16:5

Mihma Filistin okla i̱ hochitoka ʋhleha hʋt im ʋla cha, Ish haksichi cha, isht im ai i̱ hlampko chito kʋt kanima yak o̱ itola ka, micha kaniohmi kak osh il imaiya hinla aiena ka ish im akostininchi na e takchi cha, il ilbʋshalashke; mikma e moyuma kʋt tʋli hʋta tushahli tahlepa auah achʋfa ho̱ e chimashke, im achi tok.

Nan Apesa 3:3

Yakohmi ak atok, Filistin hochitoka tahlapi, micha Kenanait ʋhleha moma, micha Sitonian ʋhleha, micha Hifait ʋhleha Lebanon ai asha, Baal‐hemon nʋnih asht isht ia hosh Hamalh a chukowa ont ai ʋhli tok.

1 Samuel 5:1

Mihma Filistin ʋhleha hʋt Chitokaka im itombi holitopa ya̱ Ebenese ya̱ ai ishi cha, Ashtot a̱ isht ona tok.

1 Samuel 5:10

Yʋmohmi ma Chitokaka im itombi holitopa ya̱ Eklon ak o̱ pila tok. Atuk o̱ yakohmi tok, Chitokaka im itombi holitopa ʋt Eklon a̱ ʋla ma, Eklonait ʋhleha hash osh pa̱yʋt, Islael in Chitokaka im itombi holitopa ya̱ pishno ma, micha pim okla aiena ka isht ʋbit pi tahla chi̱ hosh ishit pim ʋlʋshke, achi tok.

1 Samuel 5:8

Yʋmohmi ho̱ hoyot Filistin okla i̱ hochitoka puta ka itʋnahli cha, Islael in Chitokaka im itombi holitopa ya̱ e katiohmicha chi̱ cho? achi tok. Mihma afalamichit, Islael in Chitokaka im itombi holitopa ya̱ falʋmmichit Kalh a̱ isht onashke, achi tok. Mihma Islael in Chitokaka im itombi holitopa ya̱ yʋmma isht ona tok.

1 Samuel 6:4

Mihma afalamichit, Nanta ho̱ nan ashʋchi isht ʋlhtoba ya̱ il i̱ falʋmmincha chi̱ cho? achi tok. Mihma afalamichit, Hlachowa yash tʋli holisso lakna yosh holbʋt toba tahlapi, micha tʋli holisso lakna yosh pinti holbʋt toba tahlapi, Filistin okla i̱ hochitoka ʋhleha holhtina kak inli chohmi ho̱ ililli okpulo achʋfa hosh hʋsh moma, micha hʋchi̱ hochitoka aiena ka onʋtoyula beka hatuk oka, achi tok.