Choshua 1:5 - Chahta Holisso Holitopa 1886

⁵ Chi okcha̱yʋt ish ahanta nitak moma ka hatak nana kia chi tikba hikia he keyushke: Moses a̱ awant a̱ya li tok ʋt, yʋmmak inli ho̱ chohmit chi awant a̱ya la chi̱ hoke: nana ka ak chim ai a̱hlot chissa la he keyu hoke.

Choshua 1:5 Iomraidhean Croise

Genesis 39:2

Atuk o̱ Chihowah yʋt Chosef a̱ ibafoyuka na hatak nana amosholit, im aia̱hli achukma atok: mihma i̱ shahli Echip hatak in chuka ya̱ ahanta tok.

1 Mi̱ko 1:37

Chihowa ʋt a̱ shahli mi̱ko ya̱ ibafoyuka chatuk ʋt chiyuhmit Solomon a̱ ibafoyuka cha, im ai ombinili holitompa ya̱ chitoli kʋt a̱ shahli mi̱ko Lewi im ai ombinili holitompa ya̱ i̱ shahlichashke, achi tok.

1 Mi̱ko 11:38

Atukma yakohma hi oke, nana chi̱ miha li moma ka ish haiyaklo cha, a̱ hina puta ka ish a noho̱wʋt aiʋlhpiesa kak o̱ sa tikba ish a yʋmohmi cha, a̱ nan ʋlhpisa puta, micha ʋm anumpa ʋlhpisa puta ka an tishu Lewi atok a̱ chohmit ish ieshikma, chibafoyuka lish, Lewi im ikbi li tok a̱ chohmichit, chin chuka kʋllot hikia ho̱ chim ikbi lish, Islael a̱ chima la hi oke.

1 Mi̱ko 6:13

Mikmʋt Islael im ʋlla ʋhleha takla ahanta likmʋt, ʋm okla Islael a̱ kanchi la he keyu hoke, achi tok.

1 Mi̱ko 8:57

Pin Chitokaka Chihowa ʋt pi̱ki ʋhleha ha̱ ibafoyuka tok, chohmit pibafoyukashke: ik pisso, micha ik pi kancho kashke.

Atʋloa 46:11

Nan u̱ha i̱ Chihowa yosh pibafoiyukka hoke; Chekob i̱ Chitokaka yak osh pim ahlʋkuffi chaha yoke. [Yukopa.

Eksotʋs 3:12

Mihma, Chiba foyuka li pulla chi̱ hoke, mikma chipila li tuk a̱ ilʋppak osh chim isht atokowa ya chi̱ hoke; okla ha̱ pehlichit Echip a̱ ish kohchikmʋt, nʋnih paknaka ilʋppa Chitokaka hʋsh aiokpʋcha hi oke, achi tok.

Mahlu 28:20

Nan oklu̱ha ka nana ho̱ hʋchim apesa li tuk a̱ holitobla he mak o̱ hʋsh im abahanchashke: yohmikma yakeh! ʋno ʋt hʋchi awant a̱ya li̱ bilia ho̱, yakni ʋt ont ai ʋhla hi oke, achi tok oke. Amen.

Loman 8:31

Yakohmi kʋno nana ilʋppa puta imma hokʋno nanta hak o̱ il acha hinla ho̱? Chihowa hak osh pi̱ kana hokma, kʋta hosh pi̱ sanala hinla ho̱?

Loman 8:37

Yʋmmak illa keyu, nan oklu̱ha ilʋppa puta ka ilap pi̱ hullo tuk pulla kak o̱ im aiyachi yak kia il i̱ shahli hoke.

Tutelonomi 20:1

Tanampit kohchʋt ish ia tuk osh, issuba puta, micha tʋnʋp iti chunaha puta, micha okla laua kʋt chi̱ shahli ho̱, ish pisakmʋt chik i̱ nukshopo kashke: chin Chitokaka Chihowah (yʋmmak) osh Echip yakni ya̱ apehlichit chi kohchi tok ʋt chiba foyuka hoka.

Tutelonomi 20:4

Hʋchin Chitokaka Chihowah ak osh hʋchin tʋnʋp a̱ hʋchim itibit, hʋchi okchalincha chi̱ hosh hʋchi awant ia hoka im acha hi oke.

Tutelonomi 31:23

Mihma Nʋn ushi Choshua ya̱ anumpa imʋt, chi kʋllashke, micha chi aiyimitashke, anumpa kʋllo im ilonochi li tok mak o̱ Islael im ʋlla ʋhleha ha̱ pehlichit yakni ya̱ isht ish chukowa chi̱ hoke; mikma chibafoyuka la chi̱ hoke, achi tok.

Tutelonomi 4:31

(Chin Chitokaka Chihowah yʋt nan i̱ nukha̱klo Chitokaka yokʋt) chi kancha he keyu hoke, micha ishit chi ʋmohmicha he keyu hoke, micha hʋchi̱ki ʋhleha ha̱ anumpa kʋllo im il onochit nan itim apesa tuk ʋt im a haksa he keyu hoke.

Tutelonomi 7:24

Micha i̱ mi̱ko ʋhleha ha̱ chibbak fohkikma, shutik nutaka ya̱ hohchifo ha̱ mosholichit ish kancha chi̱ hoke: hatak nana kia chi tikba ya̱ hikia he keyu ho̱, ish mosholicha hi oke.

2 Timohli 4:17

Yohmi kia Chitokaka yʋt si awant hikia tok; micha sa hlampkohonchi na ʋbanumpa isht anumpohonli li chatuk ʋt ai a̱hli fehnʋt ʋno ak o̱ isht ai otʋni ho̱, Chentail moyuma kʋt haiyaklo tok: yohmi ma koi chito itakha ya̱ sa kohchi tok.

Heblu 13:5

Nana hʋsh it i̱ kakiohmi kʋt nana it im anushkunna kʋt ik hʋchim iksho kashke; micha nana kaniohmi hosh hʋchim a̱sha hokmʋt isht hʋchim ʋlhpiesashke; yʋmmʋt, Chissʋt ia la himma keyu, micha hʋchi kanchi la himma keyu, ahanchi tok oka.

Choshua 1:17

Moses a̱ nana moyuma ka il i̱ haponaklo beka tok okʋt, chishno ma e chi̱ haponakla he bano hoke: peh Chitokaka chin Chihowa ʋt Moses a̱ awant a̱ya beka tok ʋt, chohmit chishno ma chi awant a̱ya hokbano, il ahnishke.

Choshua 1:9

Ʋno ak osh chim apesa li tuk keyu cho? kʋllot chim anukfila cha, nukwia ikshot ish amosholashke: ik chi nukshopo kashke, micha chi chu̱kʋsh ik iello kashke: kanima ish a̱ya puta ka Chitokaka chin Chihowa ʋt chi awant a̱ya hoka, achi tok.

Choshua 10:8

Mihma Chihowa ʋt Choshua ya̱ Ish i̱ nukshopa ná: chibbak a̱ fohki li mak oka; hatak achʋfa kia chi tikba ya̱ hikia he keyu hoke, im achi tok.

Choshua 21:44

Mihma Chihowa yʋt anumpa kʋllo il onochit i̱ki ʋhleha ha̱ i̱ mihi̱ha tok mak osh afullota fohʋchi tok: mihma in tʋnʋp moma ka hatak achʋfa kia itikba ik hikio tok; Chihowa yʋt in tʋnʋp a̱ mominchit ibbak a̱ fohki tok oka.

Choshua 3:7

Mihma Chihowa ʋt Choshua ya̱ Himak nitak ak o̱ Islael im ʋlla moyuma itikba ya̱ chi holitoblichit isht ia la chi̱ hoke; yohmi ho̱ Moses a̱ awant a̱ya li tok ʋt, anonti chishno ma chi awant a̱ya la chi̱ ka, okla hʋt ithanashke.

Choshua 6:27

Yakohmit Chihowa ʋt Choshua ya̱ awant a̱ya tok: yohmi ho̱ yʋmma isht annoa kʋt yakni moma ka ai annoho̱wa tok.

Nan Apesa 2:18

Mihma Chihowa yʋt nan apesa ʋhleha ha̱ i̱ hilechikmʋt, yʋmohmikmʋt Chihowa yʋt nan apesa ya̱ ibafoyukʋt, nan apesa ʋt okcha̱ya itintakla ka in tʋnʋp ʋhleha ibbak a̱ a hlakofihinchi beka tok: ilbʋshali, micha apistikeli hatuk o̱ kifa̱ha̱ha ka Chihowa yʋt i̱ nukha̱klo hatok.

Nan Apesa 6:16

Mihma Chihowa yʋt, Chibafoyuka li pulla chi̱ hoke; mikma Mitianait ʋhleha ha̱ hatak achʋfa chiyuhmichit issot ish kancha chi̱ hoke, im achi tok.

1 Samuel 10:7

Atukma nan isht atokowa puta ilʋppʋt chim ʋlakma, yakohma chiké, nana ish a yʋmohma he ʋlhpiesa kʋt ish pisakmʋt, ish yʋmohmashke, Chitokaka yʋt chiba foyuka hoka.