Chan 4:23 - Chahta Holisso Holitopa 1886

²³ Yohmi kia Chihowa pit aiokpʋchi aia̱hli ʋhleha hʋt shilombish, mikmʋt aia̱hli aiena mak o̱ isht aiokpahancha hi a̱, hʋshi kanʋlli at ʋlhpisa hʋt mihinti ho̱, anonti himonasi a̱ ʋla hoke: yʋmma chohmi hosh ilapa̱ aiokpʋcha he ak o̱ I̱ki ʋt hoyo hoka.

Chan 4:23 Iomraidhean Croise

Atʋloa 147:11

I̱ nukshopa cha im isht i̱ hullo anukchieto ʋhleha hak o̱ Chihowa hʋt isht a yokpa yoke.

Atʋloa 17:1

Chihowa ma, ai ʋlhpiesa ka̱ ish haklashke; pa̱ha̱ya li ka̱ ish haiyaklashke; nan ilahobbi keyu ittiʋlbi yo̱ ʋm ʋnnumpah ilbʋssha yʋt a kohcha ka̱ ish hʋponaklashke.

Atʋloa 32:2

Kʋna ho̱ Chihowa hʋt ayushoba onucchih keyukma̱, nan ilahobbi ʋt imi chu̱kʋsh a foiyukkah keyu yʋt hʋttak na̱ yokpa yoke.

Atʋloa 51:6

Yakeh, chu̱kʋsh a̱ ai a̱hli ak o̱ ish ahni hatuk osh, ʋm anukfila ha̱ hupoyuksa yak o̱ is sʋthʋnanchi hokbano.

Chan 1:17

Nan‐ʋlhpisa yokʋto Moses ak atuk mak o̱ ʋlhpihi̱sa tok: amba nan isht i̱ kana, micha nan‐aia̱hlika aiena hokʋto Chisʋs Klaist ak o̱ a minti tok.

Chan 12:23

Mihma Chisʋs ʋt afalaminchi mʋt, Hatak Ushi ʋt a holitopa he tuk a̱ hʋshi kanʋlli ʋlhpisa kʋt ai onʋshke.

Chan 16:2

Sinakak puta ka okla a hʋchi kohchicha he; a̱hli, kʋna hosh hʋchibi hokmʋt, Chihowa ha̱ holitoblichi mak o̱ im ahoba he nitak ʋt mihinti hoke.

Chan 16:32

Inta! hatak ʋt ilap in chuka aiyukali ka ai ita fimimpʋt ilap banochit hʋs sa̱ filʋmma chi̱ ka hʋshi kanʋlli ai ʋlhpisa kʋt mihinti tuk osh, anonti himak okʋno ai ona hoke; yohmi kia A̱ki ak osh si ahina hoka, ʋno ak illa he keyushke.

Chan 4:21

Mihma Chisʋs ash ot, Ohoyo chia mʋt is sa̱ yimmashke; nʋnih ilʋppa, micha Chelusalem aiena kak kia ma̱yʋt I̱ki a̱ pit hʋsh aiokpʋcha he keyu ka hi a̱ hʋshi kanʋlli ʋlhpisa hʋt mihinti hoke.

Chan 5:25

A̱hlishke, a̱hli mak o̱ hʋchim achi lishke; Illi yʋt Chihowa Ushi im anumpa ha̱ hakla he hʋshi kanʋlli ai ʋlhpisa kʋt mihintit, himonasi ak kia ʋlʋshke; yohmi ka haklo hokʋto, yʋmmʋt okcha̱ya he mak oke.

Chan 5:28

Hʋshi kanʋlli ai ʋlhpisa kʋt mihinti yʋmmak okʋno a‐hollopi ya̱ ʋlbehʋt ma̱ya kʋt, momʋt yʋmma im anumpa ha̱ haklo cha, kocha wiha he;

Loman 1:9

Yohmi ka yʋmmak oka ilap Ushi im ʋbanumpa hak o̱ ai isht sa shilombish oka isht in toksahanli li kʋt, anumpa ilbʋsha anumpuli li puta kʋt pit hʋch ithaiyana bieka hosh, isht hʋchi anumpohonli li kʋt ak isso kamohmi hoka, Chihowa yak osh nan atokowa si anoli yoke.

Loman 8:15

Yohmi ka anonti isht a hʋchi nukshopa chi̱ hosh yuka im anukfila ho̱ hʋsh ishi hatok keyu; amba ʋlla im anukfila ho̱ hʋsh ishi hatok ak o̱, pishno ʋt Abba, Pi̱ki, il achishke.

Loman 8:26

Yʋmmak i̱ chiyuhmit Shilombish ak kia ik a pi hlampko puta ka pi apelahanchi fehna hoke: nana ka il asilhha he tuk ai ʋlhpiesa kʋt pishno ak inli kʋt il ithana keyu hoka; amba Shilombish ash inli hosh isht a hi̱hi̱ha isht anumpa he keyu puta kak o̱ pi anukfokihinchi hoke.

Kaleshan 4:6

Yohmi tok a̱ ushi ʋhleha hʋchia hoka, Chihowa yʋt Ush imi Shilombish a̱ hʋchi chu̱kʋsh a̱ anukfohki na Abba I̱ki achit tahpahanla hoke.

Efeshan 6:18

Shilombish anukfoyuka hosh anumpa ilbʋsha puta im anumpohonlit, asihi̱hla hosh achunanchit ahah! aha̱ni, micha ʋbanumpa yimmi puta ka isht hʋsh asihi̱hlashke:

Filippian 3:3

Pishno ak okʋto hakshup tʋpa shilombish anukfoyukʋt Chihowa holitoblichi, micha Chisʋs Klaist ai yukpa pia, yohmi kʋt haknip a̱ ai anukchieto keyu pia hoke.

Choshua 24:14

Yʋmohmi hoka Chihowa ya̱ hʋsh holitobli cha, chu̱kʋsh a̱hli, micha apissali bieka hosh hʋsh im antiashke; micha na holbʋt toba puta hʋch i̱ki ʋhleha hʋt okhina mish tʋnnʋp, micha Echip a̱ aiokpʋchi tok a̱ hʋsh kanchashke; micha Chihowa yak o̱ hʋsh im antiashke.

1 Pita 2:9

Amba isht atiaka ʋlhtoka, mi̱ko i̱ na holitompa isht ʋtta; oklushi holitopa, Chihowa immi ai a̱hli fehna hʋchia hoke: yohmi ka yʋmmak osh hʋchi̱ ho̱wʋt ai okhlilika ya̱ a kohchit im atohwikeli chinto ka hʋchi foyuki tuk o̱, ilap isht aiokpahancha he a̱ puta ka otʋninchit hʋsh ano̱honla he a tok:

1 Samuel 12:24

Peh Chihowa ya̱ hʋsh i̱ nukwia cha, aia̱hlit chu̱kʋsh oklu̱ha hosh hʋsh im antiashke: nana achinto fehna hʋchim atahli tuk a̱ hʋsh anukfillashke.