Chan 19:9 - Chahta Holisso Holitopa 1886

⁹ Mihmʋt anonti nan ai apesa yash ont chukowa cha, Chisʋs ash o̱, Katima ko̱ ish minti tok oh cho? im achi tok. Yohmi kia Chisʋs ash ot nana ik im acho ki tok.

Chan 19:9 Iomraidhean Croise

Mahlu 26:63

Yohmi kia Chisʋs ʋt nana ik acho ki tok. Mihma na holitompa isht a̱sha pehlichi i̱ shahli ʋt anumpuli mʋt, Chishno ak osh Klaist Chihowa Ushi chia hatuk okmʋt, keyukma nana hatuk okmʋt, ish pim anola he mak o̱ Chihowa okcha̱ya pulla ka isht a chim apesa lishke, im achi tok.

Mahlu 27:27

Yʋmma foka ma nahullo mi̱ko in tʋshka chipota ʋhleha hash osh Chisʋs a̱ ishtiʋt nana ai apesa yo̱ isht ona mʋt, tʋshka chipota ʋhleha ha̱ mominchit ont im itʋnahli tok.

ʋBanumpa Luk Ʋt Holissochi Tok 23:9

Mihmʋt anumpa lauachit nana isht im asilhhʋchi tok: yohmi kia yʋmmak ash ot afalaminchi kʋt nana kia ik im acho ki tok.

Chan 18:28

Yohmi ma Chisʋs ash Kaiafas a̱ im ai ishit iʋt, nan ai apesa yo̱ okla isht ona tok: yʋmmʋt onnahinli ha tok; yohmi kʋt nan‐ʋbanʋblit ont ia ya̱ ai impa he tuk ʋt, im ai okpuloka hinla hatuk osh ilapo ak okʋto nan ai‐apesa ya̱ okla pit ik chukowo ki tok.

Chan 18:33

Mihma Pailat ʋt atuklanchit nan‐ai‐apesa yash ont chukowa cha, Chisʋs a̱ i̱ howa mʋt, Chishno ak osh Chu okla i̱ mi̱ko chia mak oh cho? im achi tok.

Chan 18:34

Mihma Chisʋs ʋt afalaminchi mʋt, Chishno akinli hosh, keyukmʋt, inla yak osh ʋno a̱ isht a chim anolikmá, nanta tuk o̱ ilʋppa ish achi cho? im achi tok.

Chan 18:37

Yohmi hatuk o̱ Pailat ash osh, Mih kʋto mi̱ko chia akinli hotuma? im achi ma, Chisʋs ʋt afalaminchit, Mi̱ko sia mak atuk o̱ ish mihʋshke. Nan ai a̱hlika atokolit anoli la he ilʋppak osh sa toba cha, anonti ilʋppa pulla hatuk mak o̱ a̱yʋt yakni a̱ ʋla li tuk oke. Nan ai a̱hlika yo̱ anukfoyuka aiyukali hokʋto, ʋm anumpa ha̱ haponaklo bano hoke, achi tok.

Chan 19:10

Yohmi ma Pailat ash ot, Chik sʋm anumpulo mak oh cho? ʋno ʋt ititaiyukhʋna ya̱ a chi ahonʋhlichi la hi ʋt ʋm ʋlhpesa, anonti chi̱ hotofi la hi ʋt ʋm ʋlhpesa aiena ka chik ithaiyano cho?

Chan 19:8

Yohmi hatuk o̱ Pailat ʋt anumpa yʋmma haklo mʋt, nukshopa kʋt isht i̱ shahli tok.

Chan 8:14

Chisʋs ash ot afalaminchi mʋt Atokoli kʋt ʋno akinli hosh il ai anoli li akinli kia, nan ai atokoli li ka a̱hli hoke: ʋno ak okʋto kanima yo̱ a minti li tuk: mikmʋt kanima yo̱ atia la he aiena kʋt ithanali hoka; amba hʋchishno ʋto kanima yo̱ a minti li tuk, micha kanima yo̱ atia la he aiena ka hʋsh akostinincha he keyushke.

Filippian 1:28

Micha nana hoh kia hʋchim i̱ sanali puta ka ik hʋchi nukhlakancho kashke: yohmikmʋno yʋmmak okʋto ai okpuloka hi yosh isht ai im atokowa, amba hʋchishno ano isht ai okcha̱ya he Chihowa a minti mak osh isht hʋchim atokowa hoke.

Nan Apesa 13:6

Yʋmohmi ma ohoyo hash osh i̱ hatak a̱ ont im anolit, Chitokaka a minti hosh hatak ʋt ʋm ʋla kʋt i̱ nashuka yʋt Chitokaka im enchil nashuka chiyuhmi, holitopa fehna tuk: yohmi kia a minti tuk a̱ ak i̱ ponaklo, hohchifo hak kia ik sʋm anolo tuk oke.