Chan 15:8 - Chahta Holisso Holitopa 1886

⁸ Hʋsh ʋni fehna yʋmmak okmak o̱, A̱ki ʋt isht a holitopa ai a̱hla he; yohmikma nan ʋm ai ithʋna hʋchia mak a hi oke.

Chan 15:8 Iomraidhean Croise

Mahlu 5:16

Hʋchi̱ pʋla hʋt hatak puta itikba ya̱ ik a tommi pulla na inla a̱sha kʋt nana hʋsh akaniohmi hochukma puta ka pisa cha, I̱ki ʋba binili ka holitoblashke.

Mahlu 5:44

Amba ʋno ʋto, Hʋchin tʋnʋp ʋhleha ha̱ hʋsh i̱ hullo cha, nana okpuloka hʋchim anukfillit miha aiena ka, nana achukma ho̱ im ahnit hʋsh mihashke; hʋchi̱ nukkilli ma ai achukma hi o̱ isht hʋsh i̱ yʋmohmikmʋt, hʋchi kanimachit, hʋchi ilbʋshachikma, ʋba isht hʋsh anumpohonlashke.

Mahlu 9:8

Yohmi ma okla chinto kʋt pisa mʋt, nukhlakanchʋt, hatak a̱ nan‐isht im ai a̱hli yohmi ka ima tok Chihowa ash o̱ ai okpahanchi tok.

ʋBanumpa Luk Ʋt Holissochi Tok 6:35

Amba hʋchishno ʋto hʋchin tʋnʋp puta ka hʋsh i̱ hullo, mikmʋt nana achukma ho̱ hʋsh yʋmohmikmʋt; anonti nana kia isht ai ʋlhtoba hi a̱ ik aiahno hosh hʋsh i̱ potashke: yohmikma isht a hʋchim ʋlhtoba hokʋto chinta he; micha Nana moma imaiya im ʋlla hʋchia ha hi hoke. Yʋmmak okʋt ilap a̱ ik aiokpacho, micha nan ʋlhpesa keyu ʋhleha aiena ka i̱ kana achukma yoka.

Chan 13:35

Hʋchishno bi̱ka yʋt hʋsh it i̱ hullo ilʋppa pulla kak o̱ nan ʋm ai ithʋna hʋchia hatuk a̱, hatak moma kʋt isht ithaiyana he mak oke, achi tok.

Chan 15:5

Ʋno ak osh pa̱kʋpi sia hokma, hʋchishno ʋto naksish hʋchia hoke. Kʋna hosh ʋno a̱ sʋbai acha̱fa na anonti ilap ma ibai acha̱fa li hokma, mihi yosh ʋni fehna chatuk oke: ʋno ak o̱ keyukma nana hʋsh kanihma he keyu hoke.

Chan 8:31

Yohmi ma Chisʋs ash ot i̱ yimmi tuk ʋhleha Chu okla hash o̱, Ʋm anumpa ha̱ hʋsh halʋlli kʋt hʋch ik issokmʋt, nan ʋm ai ithʋna a̱hli fehna hʋchia mak a chi̱ hoke.

1 Kolinhlian 10:31

Yʋmohmi hoka hʋsh impa, keyukmʋt na hʋsh ishko, keyukmʋt nana ho̱ hʋsh yʋmihchi hokmʋt, Chihowa isht a holitopa chi̱ ho̱, mominchit hʋsh yʋmohmashke.

1 Kolinhlian 6:20

Nan ai ʋlli ho̱ isht hʋsh ai ʋlhtoba hatok: yʋmohmi hokʋt hʋchi haknip, micha hʋch imi shilombish, yʋmmak okʋt Chihowa immi hoka, Chihowa ya̱ isht hʋsh holitoblashke.

Filippian 1:11

Yʋmohmit Chisʋs Klaist ak atuk mak o̱ nan ai ʋlhpiesa isht ai ʋni isht a hʋchi alotowa na, Chihowa yʋt isht a holitopʋt isht anumpa he yak oke.

Titus 2:10

Micha ik hu̱kopo, amba nan oklu̱ha ka ai a̱hli achukma he; yʋmohmi cha Chihowa pi Okchalinchi im anumpa ha̱ nan oklu̱ha ka isht a holitobla chi̱ ka ish i̱ mihi̱hashke.

Titus 2:5

Mikmʋt kostini, haui anukfila iksho, ilap in chuka antʋt, nan isht ahanta, hochukma, ilap i̱ hatak im antia achukma aiena chi̱ ka im abahanchashke.

1 Pita 2:12

Nana hʋsh a kaniohmi kʋt achukma hosh ʋbanumpa ik ithano okla ha̱ iba takla hʋsh ahantashke: yohmi na nana ik achukmo yʋmihchi chohmichit hʋchi̱ sanalit anumpohonli kia, nana achukma puta hʋsh yimihinchi ka pihi̱sakmʋt, Chihowa yʋt i̱ nowʋt a̱ya nitak oka yʋmma okla holitoblashke.

1 Pita 4:11

Hatak kanima hosh anumpuli hokmʋt, Chihowa im anumpa hʋt abʋchi kak o̱ anumpulashke; hatak kanima hosh ʋbanumpuli ilbʋsha ya̱ nan isht im ahanta hokmʋt, Chihowa hʋt kanimihchit hlampkochi kak o̱ isht ahantashke: yohmi na Chihowa hʋt Chisʋs Klaist ak atuk pulla kak o̱ nan oklu̱ha ka isht a holitopashke, yʋmmak o̱ isht a holitopa, mi̱kot ahantʋt bilia yʋt immit biliashke. Amen.