Chan 12:44 - Chahta Holisso Holitopa 1886

⁴⁴ Chisʋs ʋt chitoli hosh, Kʋna hosh ʋno a̱ a̱ yimmi kʋt ʋno ak o̱ a̱ yimmi ho̱ keyu, amba auet sa kanchi tok yʋmmak o̱ i̱ yimmi mak oke.

Chan 12:44 Iomraidhean Croise

Mahlu 10:40

Kʋna hosh hʋchi aiokpʋchi hokʋt, ʋno a̱ si aiokpʋchikma; anonti kʋna hosh ʋno a̱ si aiokpʋchi kʋt, auet sa kanchi tok ma aiokpʋchi hoke.

Mark i̱ Holisso 9:23

Mihma Chisʋs ash osh chi yimma hinla hok ma, na‐yimmi hokʋno nan oklu̱ha kʋt ai i̱ yʋmohma hinla hoke, im achi tok.

Mark i̱ Holisso 9:37

Kʋna hosh sa hohchifo pulla hatuk mak o̱ ʋlla ilʋppa chohmi achʋfona ka holitoblikmʋt, ʋno ak o̱ sa holitobli hoke: mikma kʋna hosh ʋno a̱ sa holitoblik mʋt, ʋno ak o̱ sa holitobli ho̱ keyu, amba auet sa kanchi tok ak oke, im achi tok.

Chan 11:43

Yakohmichit anumpulit ont in taha mʋt, chitoli hosh anumpulit, Lasalʋs ma! auet kohchá, achi tok.

Chan 13:20

A̱hlishke, a̱hli mak o̱ hʋchim achi lishke, Kʋna kia ʋno ak osh nan tohno li ho̱ a̱ya ka ahninchi hokʋt, ʋno ak o̱ si ahninchi hoke; micha kʋna kia, ʋno a̱ si ahninchi hokmʋt, auet sa kanchi tok mak o̱ ahninchi hoke; im achi tok.

Chan 5:24

A̱hlishke, a̱hli mak o̱ hʋchim achi lishke; Kʋna hosh ʋm anumpa ha̱ haklo cha, auet sa kanchi tok a̱ pit i̱ yimmi hokʋto, ai‐okcha̱yʋt bilia ya̱ ahayuchi; mikmʋt isht ai ilbʋsha he anumpa hʋt ik onʋtulo ka hi oke: amba ai‐illi ha̱ a kohchʋt ai‐okcha̱ya yo̱ ona hoke.

Chan 7:28

Mihma Chisʋs ʋt tempel anu̱kaka ya̱ nana ai ithʋnanchi hosh anta tuk ash osh chitolit, Ʋno a̱ hʋs sʋthana mʋt, anonti kanima yo̱ a minti li tuk ma hʋsh ithanʋshke; yohmi ka ʋno akinli ahni li hosh a̱ya li keyu, amba auet sa kanchi tok yʋmmak osh aia̱hli mak atuk o̱ yʋmma chik ithanoshke.

1 Pita 1:21

Hʋchishno yʋt yʋmmak atuk pulla kak o̱ Chihowa ha̱ hʋch i̱ yimmi pulla kʋt, yʋmmak osh illi tuk a̱ falaminchit tanichi cha, isht a holitopa ka ima tok oka; ai okcha̱ya ya̱ Chihowa yak o̱ im ai ishi la he ai ahnit, hʋch i̱ yimmashke.