1 Samuel 8:3 - Chahta Holisso Holitopa 1886

³ Mihma ushi ʋhleha hash osh a noho̱wa tok ik a̱yo hosh, amba naksika fullotʋt nana ahayuchi ai ʋlhpesa keyu asitia, micha habenʋchi ishi cha, ai ʋlhpesa ka shanaiyʋchi tok.

1 Samuel 8:3 Iomraidhean Croise

2 Samuel 15:4

Micha Absalom ʋt, Yakni ya̱ nanapesa tobʋt ahanta likbano; yohmi na hatak nana kia nana it i̱ kaniohmi, keyukmʋt nana im a kaniohmi kʋt ʋno ak o̱ ʋm ʋla na ai ʋlhpiesa kak o̱ i̱ yʋmihchi lashke, achi tok.

Atʋloa 15:5

I̱ tʋli hulisso ya̱ chelichih atʋpah keyuh, micha hʋttak ai ʋlhpiesa ya̱ im a sʋnalit nan i̱ kahli ya̱ ishih keyu hoke. Ilʋppa̱ puttah yʋmihchi ʋt ik kʋnʋllo ho̱ billia hi oke.

Atʋloa 26:10

Yʋmma̱ ibbak a̱ nan okpʋni ʋt a foiyukkah, micha ibbak ishtimpakimma yʋt nan iʋlli yo̱ isht ʋluttoa hoke.

Eksotʋs 18:21

Micha okla moma ka̱ akohchʋt hatak kʋllo, Chitokaka i̱ nukwi̱ya, hatak a̱hli, nan anushkunna ya̱ shitilema ak o̱ ish ahayuchashke; micha yohmi kak o̱, tahlepa sipokni pehlichi, tahlepa pehlichi, pokoli tahlapi pehlichi, micha pokoli pehlichi ish i̱ hiohlechashke.

Eksotʋs 23:6

Chim ilbʋsha ʋt nan ʋm ʋlhpesa̱ ka̱ ish shanaiyʋcha he keyu hoke.

Eksotʋs 23:8

Micha nahʋlbina ya̱ ish isha he keyu hoke; nahʋlbina yʋt hopoyuksa nishkin lʋblichi, micha aiʋlhpiesa im anumpa ha̱ shanaiyʋchi yoke.

Tutelonomi 16:19

Aiʋlhpiesa ʋlhpisa ka̱ ish shanaiyacha he keyu: hahatak yohmi hoka, ish ahna he keyu, micha nahʋlbina ish isha he keyu; na hʋlbina hʋt hopoyuksa nishkin a̱ lʋplichi hoke; micha aiʋlhpiesa im anumpa ha̱ shanaiyʋchi hoke.

1 Timohli 3:3

Oka homi ishko shahli keyu, na fahama keyu, ai ʋlhpiesa keyu isht a hofahya he nan isht ahayuchi bʋnna keyu; amba nuktanlʋt, ik itachowo, tʋli holisso i̱ hullo keyu;

1 Timohli 6:10

Yohmi ka tʋli holisso i̱ hullo kak osh nan ik achukmo moma ka hakshish isht a toba hoke; yʋmmak o̱ kaniohmi kʋt anuksitiʋt hoho̱yo kak osh, ʋbanumpa ha̱ i̱ filʋmmi cha, nan isht a nukha̱klo laua ka isht ile nʋhlit ile hlopullihinchi tok oke.

1 Samuel 12:2

Yʋmohmi ka Yakeh! himak a̱ mi̱ko ʋt hʋchi tikba a nowʋshke: mikma sa sipoknit noshkobo tohbit sa taiyahʋshke: mikma yakeh! sʋso ʋhleha hʋt hʋchi takla aha̱shwʋshke: micha ʋlla sa momʋt mihintit himak nitak a̱ ont ʋhli ka hʋchi tikba a noho̱wa li tuk oke.

1 Samuel 2:35

Mikma naholitompa isht ʋtta ai a̱hli nana ʋm anukfila, sa chu̱kʋsh aiena a sa nukfoyuka kak o̱ a yʋmihchi ho̱ il atokolit hilechi la hi oke; mikmʋt chuka kʋllot hikia ho̱ im ikbi la hi oke: mikma Nan ahamʋt ʋm ʋlhtoka itikba ya̱ a noho̱wa na bilia hi oke.