२ तीमोथी 1:16 - चेपाङ

¹⁶ ओनेसिफरस र ओउको माचरकाय प्रभुइ योःन्‌मय बइसास्‍याउपाना, धइतिदाह्‍य्‌सा ओउइ गच्‍युक पल्‍त ङाकहाङ वाङ्‌ति ङाकाय हउसला बयो मुना। ङा झेलकनहाङ परओ कारनइ, ओउ जुगाङमा रासो नाःलेल।

२ तीमोथी 1:16 Iomraidhean Croise

खबरदुत 21:33

ओउ सेनाको हाकिमि पावलको द्‍याङ्‍तो आलाक्‍तिको पावलकाय पक्रआकान, अनि ओउकाय निसज्‍यो साङ्‍लाइ पाःन्‌साको लागि लयको सेनालमकाय आग्‍या जाह्‍ङाकान। अनि ओउइ मान्‍तालमको हुलकाय ह्‍वताकान, “इ मान्‍ता सु खेना, र इ मान्‍ताइ दोह जाह्‍ङाकान?”

खबरदुत 28:20

ओउतझ्‍यान्‍ते ङाइ निङकाय क्रुस्‍सा र इ कुरा तोसाको लागि निङकाय गोतो खेनाङ। नि इस्राएलिलमइ आसा-भरोसा जाह्‍ङो वाङ्‍साखेओ ख्रिस्‍तकहाङ ङाइ बिस्‍वास जाह्‍ङोझ्‍यान्‍ते देङे ङा इ साङ्‍लाहाङ पाःन्‌तिमुओ मुनाङ।”

२ तीमोथी 1:12

ओउतझ्‍यान्‍तेले देङे ङा इहाङ झेलकनखा दुख दोःति मुनाङ। तर इ कुराहाङखे ङा जुगाङमा रासङल, धइतिदाह्‍य्‌सा ङाइ सुकाय बिस्‍वास जाह्‍ङो मुनाङ त दाह्‍यो कुरा ङाइ पेतोकुसि चिःओ मुनाङ। परमेस्‍वरइ दोह कुरा ङाकाय बिस्‍वास दुवारा सुम्‍पति बइसास्‍यावो मुना, ओउ कुराखे लय द्‍याह्‍न्‌ति वाङ्‍माच्‍युकसम्‍म ख्रिस्‍तइले सुरछ्‍या जाह्‍ङ्‌ति गम्‍सास्‍याउना त दाह्‍यो कुराहाङमा ङा पक्‍का मुनाङ।

२ तीमोथी 1:17

जब ओउ रोमहाङ वाङा, ओउइ ङाकाय ङाइमाच्‍युकसम्‍म जुदा थाउहाङ बोःङाताङ।

२ तीमोथी 1:18

परमेस्‍वरइ जुदा मान्‍तालमकाय न्‍याय जाह्‍ङ्‍सास्‍यावो दिनहाङ, प्रभुइ ओउकाय योःन्‌मय बयो स्‍याउपाना त दाह्‍य्‌ति ङाइ प्राथना जाह्‍ङ्‍नाङ। ङा एफिससहाङ मुतोकहाङ ओउइ ङाकाय गच्‍युक सहयोग जाह्‍ङाताङ त दाह्‍यो कुरामा नाङइ चिःओले मुतेना।

२ तीमोथी 1:8

ओउतझ्‍यान्‍ते निको प्रभुको बारेहाङ मान्‍तालमकाय गभाइ बइसा जुगाङमा रासलाम, अनि ओउतले ङा प्रभुको लागि झेलकनहाङ परओको बारेहाङमा रासलाम। बरु ङाकुसले पेओ खबरको लागि दुख दोःसाकाय तयार स्‍याव, अनि ओउ दुख सहसाको लागिखे परमेस्‍वरइले जिःङ बइसास्‍याउलेना।

२ तीमोथी 4:19

प्रिस्‍किला र अकिलास, अनि ओनेसिफरसको जुदा माचरलमकाय ङाको अभिबादन मुना त दाह्‍य्‌ति तोति बयु।