२ तीमोथी 1:12 - चेपाङ

¹² ओउतझ्‍यान्‍तेले देङे ङा इहाङ झेलकनखा दुख दोःति मुनाङ। तर इ कुराहाङखे ङा जुगाङमा रासङल, धइतिदाह्‍य्‌सा ङाइ सुकाय बिस्‍वास जाह्‍ङो मुनाङ त दाह्‍यो कुरा ङाइ पेतोकुसि चिःओ मुनाङ। परमेस्‍वरइ दोह कुरा ङाकाय बिस्‍वास दुवारा सुम्‍पति बइसास्‍यावो मुना, ओउ कुराखे लय द्‍याह्‍न्‌ति वाङ्‍माच्‍युकसम्‍म ख्रिस्‍तइले सुरछ्‍या जाह्‍ङ्‌ति गम्‍सास्‍याउना त दाह्‍यो कुराहाङमा ङा पक्‍का मुनाङ।

२ तीमोथी 1:12 Iomraidhean Croise

लुका 10:12

ङाइ निङकाय तोनेनाङ्‍स, परमेस्‍वरइ जुदा मान्‍तालमकाय न्‍याय जाह्‍ङ्‍सास्‍यावो दिनहाङ, ओउ सहरको मान्‍तालमको हालतसयपाय बरु पापइ ब्‍लिङो सदोम सहरको मान्‍तालमको हालत सहसा खाइतोस्‍याउना!”

लुका 23:46

अनि ताह्‍ङो हाउनयहाङ हिह्‌ति येसुइ तोसास्‍यावा, “अ आपा, ङाइ ङाको ग्‍वालाम नाङकायले सुम्‍पति बइनेनाङ।” उच्‍युक नोबति येसु सिसास्‍यावा।

खबरदुत 13:46

तर पावल र बर्‌नबासखे झन् साहसि स्‍याउति नोःसा फाःङाकाचु, “परमेस्‍वरको आखरखे ङ्‍हा निङ यहुदिलमकायले तोसा आबस्‍यक खेतो। तर निङइ इ आखरकाय इन्‍कार जाह्‍ङोझ्‍यान्‍ते र लयमयकाय अजम्‍बरि रुवाङको लागि ज्‍योतो ताःमालोझ्‍यान्‍ते, द्‍याह निङकाय फेति नि अरु जातिको मान्‍तालमकहाङ आल्‍नाङ्‍सु।

खबरदुत 13:50

तर यहुदिलमइ सहरको अगुवालम र ताह्‍ङो ओहोदाको धार्‌मिक मोम्‍चोलमकायमा पावल र बर्‌नबासको बिरोतहाङ कुल काआकानि, र ओउमयइ ओउनिसकाय सतावत जाह्‍ङ्‌ति ओउमयको छेत्रसय लगार्‌ति ल्‍होकाथाच।

खबरदुत 21:13

तर ओउ दाह्‍या, “निङ एतहाइति र्‌याति धइति ते ङाकाय ल्‍हुङतुकहाङ दुखि जाह्‍ङ्‍तेनानाङ्‍स? ङा यरुसलेमहाङ आल्‍ति झेलकनहाङ परसा मात्र खेल, प्रभु येसुको लागि सिसामा तयार मुनाङ।”

खबरदुत 7:59

ओउमयइ स्‍तिफनसकाय बाङइ आप्‍धयले खेइतो, ओउइ प्रभुकाय बिन्‍ति जाह्‍ङाकान, “अ प्रभु येसु, ङाको ग्‍वालामकाय सुइकार जाह्‍ङ्‍सास्‍याउपाना।”

खबरदुत 9:16

र ङाको मय्‍ङको कारनइ ओउइ गुच्‍युक दुख दोःसा परना त दाह्‍यो कुरा ङाइ ओउकाय छ्‍यान्‍लेनाङ।”

१ थेसलोनिकि 2:16

ओउमयइ निकाय अरु जातिको मान्‍तालमको लागि मुक्‍ति दोःओ आखर प्रचार जाह्‍ङ्‍साकाय रोकसा कोसिस जाह्‍ङ्‍धय मुनय, र एतहाइति ओउमयइ झन्-झन् नाःतो पापलम जाह्‍ङो मुनय। अनि परमेस्‍वर ओउमयकुस रिस वाङ्‍सास्‍यावोझ्‍यान्‍ते, अन्‍तिमहाङ द्‍याहखे रेह्‍न्‌तोले परमेस्‍वरइ ओउमयकाय दन्‍द बइसास्‍याउलेना।

१ थेसलोनिकि 5:4

तर ङाको राप्‍तो बिस्‍वासि होयालम, निङखे च्‍याकोहाङ याको मान्‍तालम लेखा खेतेइलि, ओउतझ्‍यान्‍ते ओउ दिनइखे निङकाय कुःरेउइ लेखा ग्‍याह्‍ङ्‍ताक्‍तेइलि।

१ तीमोथी 6:20

तिमोथि, परमेस्‍वरइ नाङको जिम्‍माहाङ बइसास्‍यावो सत्‍य आखरकाय पेतोकुसि सुरछ्‍या जाह्‍ङ्‌ति गमु। परमेस्‍वरको नजरहाङ महत्‍वको खेमालो कुरालम, र मान्‍तालमइ “ग्‍यान” त तोओ तर ओउखे परमेस्‍वरको सत्‍य आखरको बिरोतहाङ खेना त खेयाखे ओउतताह्‍ङो कुरा साइसाकाय इन्‍कार जाह्‍ङु।

२ तीमोथी 1:14

परमेस्‍वरइ नाङकाय बिस्‍वास दुवारा सुम्‍पति बइसास्‍यावो सत्‍य आखरकाय, निकहाङ याक्‍सास्‍यावो पबित्र ग्‍वालामको जिःङ दुवारा पेतोकुसि सुरछ्‍या जाह्‍ङ्‌ति गमु।

२ तीमोथी 1:16

ओनेसिफरस र ओउको माचरकाय प्रभुइ योःन्‌मय बइसास्‍याउपाना, धइतिदाह्‍य्‌सा ओउइ गच्‍युक पल्‍त ङाकहाङ वाङ्‌ति ङाकाय हउसला बयो मुना। ङा झेलकनहाङ परओ कारनइ, ओउ जुगाङमा रासो नाःलेल।

२ तीमोथी 1:18

परमेस्‍वरइ जुदा मान्‍तालमकाय न्‍याय जाह्‍ङ्‍सास्‍यावो दिनहाङ, प्रभुइ ओउकाय योःन्‌मय बयो स्‍याउपाना त दाह्‍य्‌ति ङाइ प्राथना जाह्‍ङ्‍नाङ। ङा एफिससहाङ मुतोकहाङ ओउइ ङाकाय गच्‍युक सहयोग जाह्‍ङाताङ त दाह्‍यो कुरामा नाङइ चिःओले मुतेना।

२ तीमोथी 1:8

ओउतझ्‍यान्‍ते निको प्रभुको बारेहाङ मान्‍तालमकाय गभाइ बइसा जुगाङमा रासलाम, अनि ओउतले ङा प्रभुको लागि झेलकनहाङ परओको बारेहाङमा रासलाम। बरु ङाकुसले पेओ खबरको लागि दुख दोःसाकाय तयार स्‍याव, अनि ओउ दुख सहसाको लागिखे परमेस्‍वरइले जिःङ बइसास्‍याउलेना।

२ तीमोथी 2:9

र ओउ पेओ खबर प्रचार जाह्‍ङो कारनइले ङा देङे दुख दोःति मुनाङ र अपराधिको रुपहाङ झेलकनहाङ साङ्‍लाइ पाःन्‌तिगमो मुनाङ। तर परमेस्‍वरको आखरकायखे साङ्‍लाइ पाःन्‌सा खाइलेल।

२ तीमोथी 4:8

द्‍याहखे ङाको लागि धार्‌मिक्‍ताको मुकुत गमो मुना। निको धर्‌मि न्‍यायधिस प्रभुइ लय द्‍याह्‍न्‌ति वाङ्‍सास्‍याउतोक बेलाहाङ ओउ मुकुत ङाकाय बइसास्‍याउना, र ओउ मुकुतखे ङाकाय मात्र खेमात, प्रभु द्‍याह्‍न्‌ति वाङ्‍साखेओ ल्‍यामकाय चोङाइति योतिमुओ जुदाकायले बइसास्‍याउलेना।

तीतस् 3:8

ङाइ तोओ इ कुरालमखे बिस्‍वास जाह्‍ङ्‍सा ज्‍योओ सत्‍य कुराले खेना। बिसेस जाह्‍ङ्‌ति नाङइखे ङाइ तोओ इ कुरालम मान्‍तालमइ पेतोकुसि चिःतोसम्‍म स्‍यानो ङा चाहनाङ। ओउतस्‍याउतोक बेलाहाङ परमेस्‍वरहाङ बिस्‍वास जाह्‍ङो मान्‍तालम पेओ कामलम जाह्‍ङ्‍साको लागि होसियार स्‍याउलेनय। ओउ कुरालमखे जुदा मान्‍तालमको लागि पेतो र फाइदाको लागि स्‍याउलेना।