१ तीमोथी 6:12 - चेपाङ

¹² नाङइ जाह्‍ङो सत्‍य बिस्‍वासको लागि पेओ युद्‍ध जाह्‍ङु। लयइ ख्रिस्‍तहाङ जाह्‍ङो बिस्‍वासको बारेहाङ नाङइ नाःतो मान्‍तालमकाय तोतेआकान, र ओउतोक बेलाहाङले परमेस्‍वरइ नाङकाय अजम्‍बरि रुवाङको लागि गोत्‍तेआ। अनि द्‍याहखे, परमेस्‍वरइ नाङकाय बइसास्‍यावो ओउ अजम्‍बरि रुवाङकाय नाङइ पेतोहाइति बल्‍योकुसि पक्रति गमु।

१ तीमोथी 6:12 Iomraidhean Croise

१ थेसलोनिकि 2:12

निइ निङकाय हउसला अनि सान्‍तवना बइनेआलाङ्‍सु, र परमेस्‍वरको मान-सम्‍मान स्‍यावो खालको रुवाङ याक्‍साको लागि निङकाय बिन्‍ति जाह्‍ङ्‍नेआलाङ्‍सु। धइतिदाह्‍य्‌सा परमेस्‍वरइ निङकाय लयको राज्‍य र महिमाहाङ सहभागि स्‍याउलाङ गोत्‍सास्‍याउधय मुना।

२ थेसलोनिकि 2:14

निइ निङकाय पेओ खबर प्रचार जाह्‍ङ्‍तोकहाङ परमेस्‍वरइ निङकाय मुक्‍तिको लागि गोत्‍सास्‍यावा, अनि द्‍याहखे निङइ ओउ पेओ खबरहाङ बिस्‍वास जाह्‍ङ्‌ति निको प्रभु येसु ख्रिस्‍तको महिमाको भाक दोःसा खाइतेनानि।

१ तीमोथी 1:18

तिमोथि, नाङ ङाको लयको चोः लेखाले खेतेना, ओउतझ्‍यान्‍ते केहि अगमबक्‍तालमइ नाङको बारेहाङ नोःओ अगमबानि अनुसार ङाइ नाङकाय इ आग्‍या बइनेनाङ। ओउ अगमबानिइ नाङकाय प्रभुको लागि युद्‍ध जाह्‍ङ्‍साको लागि साहस बइतेपाना।

१ तीमोथी 1:19

लयको बिस्‍वासकाय ख्रिस्‍तहाङ गम्‍ति सुद्‍ध बिबेक अनुसार काम जाह्‍ङु। धइतिदाह्‍य्‌सा गच्‍युक मान्‍तालमइ लयको बिबेककाय इन्‍कार जाह्‍ङोझ्‍यान्‍ते ख्रिस्‍तहाङ लयको बिस्‍वासकाय दल्‍ताक्‍ति गम्‍सा खाइनिलि।

१ तीमोथी 4:14

अगमबक्‍तालमइ नोःतोकहाङ र मन्‍दलिको अगुवालमइ नाङको तालाङहाङ क्रुत झाम्‍ति आसिक बइतोकहाङ, परमेस्‍वरइ नाङकाय बइसास्‍यावो ग्‍वालामि बरदानकाय नाङइ जुगाङमा म्‍हेःजेलाम।

१ तीमोथी 6:13

जुदा थोककाय रुवाङ बइसास्‍यावो परमेस्‍वर, र पन्‍तियस पिलातसको ङ्‍हा लयको बिस्‍वासको पेओ गभाइ बइसास्‍यावो ख्रिस्‍त येसुको ङ्‍हा, ङाइ नाङकाय तोनेनाङ,

१ तीमोथी 6:19

ओउतहाइतिले ओउमयइ लयमयको लागि सत्‍य धन-सम्‍पति त्‍युह्‍म्‌नानि, र ओउखे ओउमयको लोन्‍हेको रुवाङको लागि बल्‍यो तोस स्‍याउलेना, र ओउत जाह्‍ङ्‍तोकहाङखे ओउमयइ सत्‍य रुवाङ दोःलेनय।

२ तीमोथी 1:9

निइ जाह्‍ङो कामको कारनइ खेल, तर परमेस्‍वरको उदेस्‍य र अनुग्रहको कारनइ जाह्‍ङ्‍धार्‌ना परमेस्‍वरइले निकाय दल्‍ताक्‍सास्‍यावा र लयको मान्‍ता स्‍याउसाको लागि गोत्‍सास्‍यावा। इ अनुग्रहखे सङ्‍सारको सुरु स्‍याउसासय ङ्‍हाखाले परमेस्‍वरइ येसु ख्रिस्‍तहाङ निको लागि बइसास्‍यावो खेतो।

२ तीमोथी 2:2

नाःतो साछिलमको माझहाङ ङाइ स्‍यानो स्‍यानरायपाय नाङइ सायोले मुतेना। द्‍याहखे नाङइ ओउ स्‍यानराय अरु मान्‍तालमकायमा स्‍यान्‍सा खायो बिस्‍वासिलो मान्‍तालमकाय स्‍यानु।

२ तीमोथी 4:7

ङाइ पेतोकुसिले युद्‍ध जाह्‍ङालाङ। ङाइ तनो काम द्‍योकालाङ, र ङाइ बिस्‍वासकाय दल्‍ताक्‍ति गमो मुनाङ।